ކުއްލި ނުރައްކަލުގެ ހާލަތު ނިމުމުންވެސް ވަކީލުންގެ ބައްދަލުވުމަށް ދެނީ 30 މިނެޓު!
ފުލުހުން ކުރިން ބުނެފައިވަނީ 30 މިނެޓުގެ ވަގުތެއް ދޭނީ ކުއްލި ނުރައްކަލުގެ ހާލަތު ނިމުމަކަށް އަންނަންދެން ކަމަށް
ޤާނޫނީ ވަކީލުން ބޭއްވި ނޫސްވެރިންގެ ބައްދަލުވުމެއްގައި ވަކީލާ ހިސާން ހުސެއިން
ކުއްލި ނުރައްކަލުގެ ހާލަތު ނިމުމުންވެސް ވަކީލުންގެ ބައްދަލުވުމަށް ދެމުންގެންދަނީ 30 މިނެޓުކަމަށް ވަކީލުން ވިދާޅުވެއްޖެ އެވެ.
ފެބުރުއަރީ މަހުގެ 13 ވަނަ ދުވަހު ފުލުހުން ކުރި އިއުލާނެއްގައި ބުނެފައިވަނީ ކުއްލި ނުރައްކަލުގެ ހާލަތު ނިމުމަކަށް އަންނަންދެން ފުލުހުން ތަހުގީގުކުރަމުންދާ މައްސަލަތަކުގައި ތަހުގީގުކުރާ ވަގުތުތައް ފިޔަވާ އެހެން ވަގުތުތަކުގައި ވަކީލުންނާ ބައްދަލުކުރުމަށް ދުވާލަކު 30 މިނެޓަށް ވުރެ ދިގު ނުވާ ގޮތަކަށް ވަކީލުންނަށް ފުރުސަތު ދިނުމަށް ހަމަޖެހިފައިވާ ކަމަށެވެ. އަދި އެ ދުވަހުން ފެށިގެން ކުއްލި ނުރައްކަލުގެ ހާލަތުުގެ މުއްދަތުގެ ތެރޭގަިއ ވަކީލުންގެ ބައްދަލުވުމަށް ދެމުންގެންދަނީ 30 މިނެޓުގެ ވަގުތެކެވެ.
ފެބުރުއަރީ މަހުގެ 5 ވަނަ ދުވަހު ރައީސް އަބްދުﷲ ޔާމީންގެ ޤަރާރަކުން އިއުލާންކުރެއްވި ކުއްލި ނުރައްކަލުގެ ހާލަތު 45 ދުވަސް ފަހުން ސަރުކާރުން ނިމުމަކަށް މިދިޔަ ބުރާސްފަތި ދުވަހު ވަނީ ގެނެސްފަ އެވެ.
ހައްޔަރުގައި ތިބި ގިނަ ބޭފުޅުންތަކެއްގެ ވަކީލެއްގެ ގޮތުގައި މަސައްކަތް ކުރައްވަމުންގެންދަވާ ޤާނޫނީ ވަކީލާ ހިސާން ހުސެއިން ވިދާޅުވީ ކުއްލި ނުރައްކަލުގެ ހާލަތު ނިމުމަކަށް ގެނެސްފައިވާއިރުވެސް އަދިވެސް ވަކީލުންނަށް ދެނީ 30 މިނެޓުގެ ވަގުތެއްކަމަށެވެ. އަދި ފުލުހުންގެ އިއުލާންގައިވެސް ވަނީ 30 މިނެޓުގެ ވަގުތެއް ދިނުމަށް ނިންމީ ކުއްލި ނުރައްކަލުގެ މުއްދަތުގައި އެކަނި ކަމަށާއި، އަދި މިހާރު ކުއްލި ނުރައްކަލުގެ ހާލަތު ނިމުމަކަށް އައިިސްފައިވާކަންވެސް ހިސާން ވަނީ ފާހަގަކުރައްވާފަ އެވެ.
ފެބުރުއަރީ މަހުގެ 6 ވަނަ ދުވަހު ކުއްލި ނުރައްކަލުގެ ހާލަތު އިއުލާންކޮށް ގިނަ ބަޔަކު ހައްޔަރުކުރި އެވެ. އޭގެ ތެރޭގައި ކުރީގެ ރައީސް މައުމޫނާއި އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދާއި ކުރީގެ ޕޮލިސް ކޮމިޝަނަރު އަހްމަދު އަރީފާއި ރައްޔިތުންގެ މަޖިލީހުގެ މެމްބަރުންތަކަކާއި ސިފައިންނާއި ފުލުހުންތަކެއްގެ އިތުރުން އާއްމުން ވެސް ހިމެނެ އެވެ.
އެ ބެފުޅުންގެ މައްޗަށް ގިނަ ދައުވާތަކެއް ކުރާއިރު، ކޮންމެ ބޭފުޅެއްގެ މައްޗަށް ޓެރަރިޒަމްގެ ދައުވާވެސް ކުރެ އެވެ.
