މާދަމާ ރައީސުލް ޖުމްހޫރިއްޔާ އަބްދުﷲ ޔާމީން އަބްދުލް ޤައްޔޫމްގެ އައުވާނުން ޖަލަށްލެވުމުން އަޑު އުފުލާނެ ބަޔަކު ނުތިބޭނެ ކަމަށް އެމްޑީޕީގެ ނާއިބު ރައީސް މުހައްމަދު ޝިފާޒް ވިދާޅުވެއްޖެއެވެ.

ގުޅިފައިވާ ސިޔާސީ ޕާޓީތަކުން ހުކުރު ދުވަހުގެރޭ އެމްޑީޕީ ހަރުގެ ސަރަހައްދުގައި ބޭއްވި އެއްވުމުގައި ވާހަކަފުޅު ދައްކަވަމުން ޝިފާޒް ވިދާޅުވީ، ރާއްޖޭގައި އިންސާފު ޤާއިމުކުރުމަށް ގޮވާލައި އިހުތިޖާޖު ކުރުމުން ނުހައްޤުން ޖަލަށް ލެވިފައި ތިބި ގިނަ ފަރާތްތައް އެބަތިބި ކަމަށާއި އެ ފަރާތްތައް ޖަލުގައި ތިއްބަސް ޔަޤީންވާ އެއް ކަމަކީ އެ ފަރާތްތައް މިނިވަން ކުރުމަށް ގޮވާލާ އަޑު އުފުލާނެ ބަޔަކު ތިބޭނެކަން ކަމެވެ. އެހެންނަމަވެސް މާދަމާ ރައީސް ޔާމީންގެ އައުވާނުން ޖަލަށްލެވުމުން އެމީހުން މިނިވަން ކުރުމަށް ގޮވާލާ އަޑު އުފާލެ ބަޔަކު ނުތިބޭނެކަން ފާހަގަކުރައްވާ ޝިފާޒް ވަނީ އަނިޔާ އިން ބަރީއަވުމަށް އެ ފަރާތްތަކަށް ގޮވާލައްވާފައެވެ.

"މާދަމާ ރައީސް ޔާމީންގެ އައުވާނުންނަށް މި ހާލަތު ޖެހުނީމައި އެ އަޑު އުފުލާނެ ބަޔަކު ނުތިބޭނެ. އެއީ އެ ބޭފުޅުންނަށް ދިމާވާނެ މައްސަލައަކީ. އެހެންކަމުން އަޅުގަނޑު ދަންނަވާލަން ބޭނުން އަނިޔާ އިން ބަރީއަ ވެވަޑައިގަންނަވާށޭ. ދިވެހިރާއްޖޭގެ ރައްޔިތުން 2008 ހޯދި ޤާނޫނު އަސާސީ ހޯދީ ވަރަށް މާތް މަޤްސަދެއްގައި. އެ ޤާނޫނު އަސާސީ ތަނެއް ނުދޭ އަނިޔާވެރިވުމަކަށް. އެ ޤާނޫނު އަސާސީ ތަންދެނީ މަދަނީ ހައްޤުތައް ހިމާޔަތް ކުރުމަށް. ޑިމޮކްރެޓިކް އުސޫލުތައް މިތާ އަށަގެންނެވުމަށް. އިންސާނީ ކަރާމާތް މި ތަނުގައި ނެގެހެއްޓުމަށް" ޝިފާޒް ވިދާޅުވިއެވެ.

ޝިފާޒް އިތުރަށް ވިދާޅުވީ ރައީސް ޔާމީންއަށް ކަމެއް ދިމާވުމުން ދިވެހި ފުލުހުން ބަލަންޖެހޭ ޤާނޫނެއް ނޯންނާނެ ކަމަށް ވިދާޅުވުން އެއީ ލަދުވެތި ވެވަޑައިގަންނަވަން ޖެހޭ އަމަލެއް ކަމަށާއި ދިވެހި ފުލުހުންގެ ޤާނޫނު މަތިކުރަނީ އެކަންކަން ކުރުމަށް ނޫން ކަމަށެވެ.

"މިއީ ރައީސުލް ޖުމްހޫރީއްޔާގެ މަޤާމުގައި ހުންނެވި ބޭފުޅަކު ދެއްކެވި ނާތަހުޒީބު ހަޑި މުޑުދާރު ވާހަކައެއް. މިފަދަ ކަންކަމުގައި ޖެހިވަޑައިނުގެން ޤައުމަށް ޚިދުމަތް ކުރަން ތިއްބެވި ބަޔަކަށް ދިވެހި ފުލުހުން ވާންޖެހޭ. ދިވެހި ފުލުހުންގެ ޔުނީފޯމުގައި އެ ބޭފުޅުންގެ ބެޖުގައި އެހެރީ ވަރަށް މުހިންމު ބޭނުމެއްގައި ޓު ޕްރޮޓެކްޓް އެންޑް ސާވް ޖައްސަވާފައި. އެ މަޤްސަދު ހާސިލު ކުރުމަށް އެ ބޭފުޅުން މަސައްކަތް ކުރަން ޖެހޭނީ ކުރަމުންދާ ވައްކަންތަކާއި ހިންގަމުންދާ ކޮރަޕްޝަނާއި މާރާމާރީއާ ފަސާދާއަށް ހިތްވަރުދޭކަށް ނޫން އެ ބޭފުޅުން ތިބެން ޖެހޭނީކީ" ޝިފާޒް ވިދާޅުވިއެވެ.

ޝިފާޒް ވިދާޅުވީ ކަމިޔާބު ލިބޭނެ ދުވަސް ކައިރިވެއްޖެ ކަމަށާއި ރައީސް ޔާމީންގެ އަނިޔާވެރިކަމުން ރައްޔިތުން ސަލާމަތް ކުރައްވާނެ ކަމަށެވެ.