ކ. މާލެ
|
21 މާރޗް 2018 | ބުދަ 08:41
ޣައްޒާފީ (ކ) ދުނިޔޭގައި ހުންނެވި އިރު ސަރްކޯޒީ (ވ)އާ ގާތް ގުޅުމެއް އޮތް
ޣައްޒާފީ (ކ) ދުނިޔޭގައި ހުންނެވި އިރު ސަރްކޯޒީ (ވ)އާ ގާތް ގުޅުމެއް އޮތް
އީޕީއޭ
ނިކޮލަސް ސަރްކޯޒީ
ކެމްޕޭނަށް ޣައްޒާފީ އަތުން މާލީ އެހީ ހޯއްދެވިކަމުގެ ތުހުމަތުގައި ސަރްކޯޒީ ހައްޔަރުކޮށްފި
 
ކެމްޕޭނުގެ މާލީ ބަޔާންތައް އޮޅުވާލިކަމުގެ ދައުވާ މިހާރު ވެސް ސަރްކޯޒީގެ މައްޗަށް ވަނީ އުފުލާފައި

ރިޔާސީ އިންތިޚާބަށް ޚަރަދުކުރަން ލީބިޔާގެ ކުރީގެ ޒައީމް ކާނަލް މުޢައްމަރުލް ޣައްޒާފީގެ އަތުން މާލީ އެހީ ހޯއްދެވިކަމުގެ ތުހުމަތުގައި ފަރަންސޭސީވިލާތުގެ ކުރީގެ ރައީސް ނިކޮލަސް ސަރްކޯޒީ ހައްޔަރުކޮށްފިއެވެ.

އަންގާރަ ދުވަހު ޕެރިހުގެ ފުލުހުން ސަރްކޯޒީ ހައްޔަރުކޮށް ސުވާލުކުރަމުންދާއިރު، ފުލުހުންގެ ބަންދުގައި 48 ގަޑިއިރު ސަރްކޯޒީ ބެހެއްޓޭނެއެވެ.

މިމައްސަލައިގެ ތަހުޤީޤު ފެށީ 2012 ވަނަ އަހަރުގެ ރިޔާސީ އިންތިޚާބުން ސަރްކޯޒީ ބަލިވެވަޑައިގަތް ފަހުން، ޖެހިގެން އައި 2013 ގައެވެ.

މިމައްސަލައިގައި ސަރްކޯޒީގެ ސަރުކާރުގެ ވަޒީރެއް ކަމަށްވާ ބްރައިސް ހޯޓެފޯ ވެސް ހައްޔަރުކޮށް އަންގާރަ ދުވަހު ފަރަންސޭސީ ފުލުހުން ސުވާލުކޮށްފައި ވެއެވެ. މީގެ އިތުރުން ސަރްކޯޒީއާ ގުޅުން އޮންނަ ސްވިޓްޒަލޭންޑްގެ ވިޔަފާރިއެއް ވެސް ހައްޔަރުކުރުމަށް ފަރަންސޭސީ ފުލުހުން ދަނީ މަސައްކަތްކުރަމުންނެވެ. މިދިޔަ ޖެނުއަރީ މަހު އިނގިރޭސިވިލާތުގެ ވެރިރަށް ލަންޑަނުގެ ފުލުހުން އެމީހާ ހައްޔަރުކުރި ނަމަވެސް، އޭނާ ގެންދަނީ އޭނާ އެކްސްޓްރަޑައިޓްކުރުމަށް އިނގިރޭސި ފުލުހުން ކުރަމުންދާ މަސައްކަތް ހުއްޓުވުމަށް ކޯޓަށް ގޮސްފައެވެ.

ސަރްކޯޒީ ކެމްޕޭން ފައިސާ ޣައްޒާފީ އަތުން ހޯއްދެވި ކަމަށް ވިދާޅުވީ ލުބްނާން ދަރިކޮޅުގެ ފަރަންސޭސީ ވިޔަފާރިވެރިއެކެވެ. އަދި އޭނާގެ ވާހަކަތައް ޣައްޒާފީގެ ސަރުކާރުގެ އިސްވެރިން ކަށަވަރުކޮށްދީފައި ވެއެވެ. އޭނާ ބުނާ ގޮތުގައި 2006 ވަނަ އަހަރާއި 2007 ވަނަ އަހަރާ ދެމެދު 200 އަދި 500 ޔޫރޯގެ ނޫޓް އަޅާފައިވާ 3 ފޮށި ސަރްކޯޒީގެ ޗީފް އޮފް ސްޓާފާ އޭނާ ހަވާލުކުރިއެވެ. އަދި އެފައިސާތަކުގެ ޖުމްލަ އަގު 5 މިލިއަން ޔޫރޯއަށް އަރާއިރު، އެފައިސާ އައީ ޣައްޒާފީގެ ފަރާތުން ކަމަށް ވެސް 2016 ވަނަ އަހަރުގެ ނޮވެމްބަރު މަހު ފަރަންސޭސީ ނޫހަކަށް އޭނާ ދިން އިންޓަރވިއުއެއްގައި ބުނެފައި ވެއެވެ.

ލީބިޔާގެ ސަރުކާރުން ނުވަތަ ޣައްޒާފީގެ ފަރާތުން އައި އެއްވެސް ފައިސާއެއް ކެމްޕޭނެއް ޚަރަދުކޮށްފައި ނުވާނެ ކަމަށް ސަރްކޯޒީ އާއި އޭނާގެ އަރިސް ބޭފުޅުން ވިދާޅުވި ނަމަވެސް، އެފައިސާ ފޮނުވި ކަމަށް ލީބިޔާގެ ސޮވަރިން ފަންޑާއި ޣައްޒާފީގެ ސަރުކާރުގައި ހަވާލުވެ ހުންނެވި ބަޝީރު ސާލިޙް ފަރަންސޭސީ މީޑިއާއަށް ވަނީ މައުލޫމާތު ދެއްވާފައެވެ.

ޣައްޒާފީގެ އަތުން ފައިސާ ނެންގެވި މައްސަލައިގައި ސަރްކޯޒީ ހައްޔަރުކޮށް ސުވާލުކުރަމުންދާއިރު، ކެމްޕޭނުގެ މާލީ ބަޔާންތައް އޮޅުވާލި މައްސަލައެއްގައި މިހާރު ވެސް އޭނާގެ މައްޗަށް ދައުވާ އުފުލާފައިވެއެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އަލީ ޔޫސުފް
0%
0%
0%
0%
0%
100%
ކޮމެންޓް