މަގޫދޫ ރައްޔިތުން ރާއްޖެޓީވީގެ މުވައްޒަފުންނަށް ޖާފަތެއް އަރުވައިފި
ރާއްޖެޓީވީގެ މަސައްކަތް ގިނަ ބަޔަކު ދަނީ ފާހަގަކުރަމުން
ފ. މަގޫދޫ ރައްޔިތުން ޖާފަތް އެރުވުމުގެ ތެރެއިން
ފ. މަގޫދޫ ރައްޔިތުން ވެސް ރާއްޖެޓީވީގެ މުވައްޒަފުންނަށް ޖާފަތެއް އަރުވައިފިއެވެ.
ހޮނިހިރު ދުވަހުގެރޭ ޖާފަތް އަރުވާފައިވަނީ ރާއްޖެޓީވީގެ މުވައްޒަފުން ކުރަމުންދާ މަސައްކަތާއި ނޫސްވެރިކަމަށް ދިމާވެފައިވާ ބިރުވެރި ގޮންޖެހުންތަކުގެ ތެރޭގައި ރައްޔިތުންނަށް މައުލޫމާތު ފޯރުކޮށްދިނުމަށް ކުރަމުންދާ ހިތްވަރަށް ސާބަސް ދިނުމުގެ ގޮތުން ކަމަށް އެ ރަށުގެ ރައްޔިތުން ބުނެއެވެ.
ފ. މަގޫދޫ އިން ޖާފަތް ގެނައުމުގައި ހަރަކާތްތެރިވި މީހަކު ބުނީ ލިބެމުންދާ އަނިޔާތަކާއެކުވެސް ރާއްޖެޓީވީގެ މުވައްޒަފުން ކުރަމުންގެންދާ މަސައްކަތުގެ އަގު ވަޒަންކުރާ ކަމަށާއި ރާއްޖެޓީވީ އާއިއެކު އެ ރަށުގެ ރައްޔިތުން ދެމިތިބޭނެ ކަމަށެވެ.
ރާއްޖެޓީވީގެ ފަރާތުންވެސް ވަނީ އެ ރަށު ރައްޔިތުންނަށް ޝުކުރު އަދާކޮށްފައެވެ.
ރާއްޖެޓީވީގެ ނިއުސް ޑިރެކްޓަރ މުހައްމަދު ހުޝާމް ވިދާޅުވީ ގިނަ ރައްޔިތުން ރާއްޖެޓީވީގެ މުވައްޒަފުން ކުރާ މަސައްކަތް ބަލައިގަންނަކަމީ ލިބޭ އިތުރު ހިތްވަރެއް ކަމަށެވެ.
މަގޫދޫ ރައްޔިތުންގެ އިތުރުން އއ. ރަސްދޫ އިން ވެސް ވަނީ ރާއްޖެ ޓީވީއަށް ފަރިވަޅެއް އަރުވާފައެވެ. އަދި ތ. ކިނބިދޫ ރައްޔިތުން ވެސް ވަނީ ރާއްޖެޓީވިއަށް ފަރިވަޅެއް އަރުވާފައެވެ. މީގެ އިތުރުން ވެސް އެކި ރަށްރަށުގެ ރައްޔިތުން ދަނީ ރާއްޖެޓީވީގެ މަސައްކަތް ފާހަގަކުރުމުގެ ގޮތުން އެކި ގޮތްގޮތުން އެހީތެރިކަން ފޯރުކޮށްދެމުންނެވެ.
