ރާއްޖެޓީވީގެ މުވައްޒަފުން މިނިވަން ކުރުމަށް ސީޕީޖޭ އިން ގޮވާލައިފި
16 މާރިޗު 2018 | ހުކުރު 22:43އެންމެން އެއްވެސް ޝަރުތަކާ ނުލާ ދޫކޮށްލުމަށް ގޮވާލާފައިވޭ
ފަޒީން މުޒާހަރާ ކަވަރ ކުރުމުގައި ހަރަކާތްތެރިވަނިކޮށް ހައްޔަރުކުރަނީ
ރާއްޖެޓީވީގެ މުވައްޒަފުން މިނިވަން ކުރުމަށް ކޮމިޓީ ޓު ޕްރޮޓެކްޓް ޖަރނަލިސްޓްސް (ސީޕީޖޭ) އިން ގޮވާލައިފިއެވެ.
ހުކުރު ދުވަހު އެ ޖަމިއްޔާ އިން ކުރި ޓުވީޓެއްގައި ބުނެފައިވަނީ ފުލުހުން ހައްޔަރުކުރި އެންމެން އެއްވެސް ޝަރުތަކާ ނުލާ ދޫކޮށްލުމަށް ރާއްޖޭގެ ކަމާބެހޭ މުއައްސަސާތަކަށް ގޮވާލާކަމަށެވެ.
ސީޕީޖޭ އިން އިތުރަށް ބުނީ އެންމެހާ ރައްޔިތުންނަށް ހިޔާލުފާޅު ކުރުމުގެ މިނިވަންކަން ދިވެހި ސަރުކާރުން ދޭންޖެހޭނެ ކަމަށާއި އެއްވުންތައް ކަވަރު ކުރަން މީޑިއާތަކުން މަސައްކަތް ކުރުމުން ދިވެހި ފުލުހުންނާއި ސިފައިން ބޭނުންކޮށްގެން އެކަން ހުއްޓުވުމަށް ސަރުކާރުން މަސައްކަތް ނުކުރުމަށް ގޮވާލާ ކަމަށެވެ.
ނޫސްވެރިޔާ މުހައްމަދު ފަޒީން މުޒާހަރާ ކަވަރު ކުރުމުގައި ހަރަކާތްތެރިވަނިކޮށް ހައްޔަރުކޮށްފައިވާއިރު ނޫސްވެރިޔާ މުހައްމަދު ވިސާމް ފުލުހުން ހައްޔަރުކުރީ ކޮން ސަރަހައްދަކުން ކަމެއް ސާފެއް ނުވެއެވެ. ރާޢްޖެޓީވީގެ ހެޑް އޮފް ޕްރޮގްރާމްސް، އާމިރު ސަލީމް ހައްޔަރުކޮށްފައި ވަނީ ރާއްޖެޓީވީ އިމާރަތް ކައިރިންނެވެ. އޮފީސް ދޮރުމަތީގައި ހުއްޓައި ފުލުހުން ވަނީ އާމިރާ ސުވާލުކޮށް އައިޑީކާޑު ދެއްކުމަށް އަންގާފައެވެ. އަދި އައިޑީކާޑު ދެއްކުމުން ކޯޓު އަމުރެއްގެ ދަށުން ކަމަށް ބުނެ އާމިރު ވަނީ ހައްޔަރުކޮށްފައެވެ.
