ޗެމްޕިއަންސް ލީގު: މެސީގެ 100 ވަނަ ލަނޑާ އެކު ބާސާ ކުއާޓާއަށް

ޔުއެފާ ޗެމްޕިއަންސް ލީގުގައި ލިއޮނެލް މެސީ ކާމިޔާބުކުރި 100 ވަނަ ލަނޑާ އެކު ބާސެލޯނާ އިން ކުއާޓާ ފައިނަލުގެ ޖާގައެއް ކަށަވަރުކޮށްފިއެވެ.

ބާސާ ކުއާޓާއަށް ދަތުރުކުރީ 4-1 ގެ އެގްރިގޭޓް ނަތީޖާއަކުން އިނގިރޭސި ޗެމްޕިއަނުން ކަމަށްވާ ޗެލްސީ ބަލިކޮށްގެންނެވެ. މި ދެ ޓީމު ޗެލްސީގެ ދަނޑުގައި ކުޅުނު ފުރަތަމަ ލެގުގެ މެޗު 1-1 އިން އެއްވަރުވި އިރު ބާސާގެ ދަނޑުގައި ކުޅުނު ދެވަނަ ލެގުގެ މެޗު 3-0 އިން ކާމިޔާބުކުރީ ބާސާއެވެ. މި ދެ ޓީމު ބައްދަލުކުރި ފުރަތަމަ ލެގުގައި ބެންޗެން ކުޅެން އެރި އުސްމާން ޑެމްބޭލޭ ބާސާގެ ފުރަތަމަ އެގާރާގައި ހިމެނިގެން ކުޅުނުއިރު ޗެލްސީގެ ފުރަތަމަ އެގާރައިން, އެ ޓީމާއި އަލަށް ގުޅުނު ފްރާންސްގެ ފޯވާޑް އޮލިވިއާ ޖިރޫއަށް ވަނީ ފުރުސަތު ދީފައެވެ.

ފުރަތަމަ ހާފު ފެށިގެން ބާސާއިން ވަނީ ޗެލްސީގެ ގޯލަށް ނުރައްކާކުރުމަށް މަސައްކަތްކޮށްފައެވެ. މެޗުގެ ފުރަތަމަ ލަނޑު ފެނިގެންދިޔައީ މެޗުގެ ތިންވަނަ މިނެޓުގައެވެ. ލުއިސް ސުއަރޭޒްގެ އެހީތެރިކަމާ އެކު ބާސާއަށް މި ލަނޑު ޖަހައިދިނީ މެސީއެވެ. މި ލަނޑަށްފަހު ޗެލްސީއިން ކުރިޔަށް ޖެހި ހަމަލާ އުފެއްދުމަށް މަސައްކަތްކުރިއިރު ބާސާގެ ޑިފެންސް ލައިނުން ވަނީ މި ހަމަލާތައް ހުއްޓުވާފައެވެ. ބާސާގެ ދެވަނަ ލަނޑު ކައުންޓާގައި މެސީ ތަނަވަސްކޮށްދިން ފުރުސަތަކުން މެޗުގެ 20 ވަނަ މިނެޓުގައި ޖަހައިދިނީ ޑެމްބޭލޭއެވެ. މި ހާފުގެ އެންމެ ފަހު މިނެޓުގައި ޗެލްސީގެ މާކޯސް އަލޮންސޯ ފޮނުވާލި ހަމަލާއެއް ބާސާގެ ގޯލުގެ ދަނޑިއަށް އަމާޒުވެފައިވެއެވެ.

ދެ ލަނޑުގެ ލީޑެއްގައި އޮވެ ބާސާއިން ފުރަތަމަ ހާފު ނިންމާލިއިރު ޗެލްސީ އިން ދެވަނަ ހާފު ފަށާފައި ވަނީ ވަރަގަދަކޮށެވެ. އެ ޓީމުން ވަނީ މި ހާފުގައި ބާސާގެ ގޯލަށް ފުލުފުލުގައި ނުރައްކާތެރި ހަމަލާތަކެއް ފޮނުވާލާފައެވެ. ޗެލްސީއަށް އެ ޓީމަށް ލިބުނު ފުރުސަތުތަކުގެ ބޭނުން ހިފިފައިނުވާއިރު ބާސާއިން ވަނީ 63 ވަނަ މިނެޓުގައި އިތުރު ލަނޑެއް ޖަހާ ލީޑު ފުޅާކޮށްފައެވެ. މި ލަނޑު ވެސް ސުއަރޭޒްގެ އެހީތެރިކަމާއެކު ބާސާއަށް ޖަހައިދިނީ މެސީއެވެ. މިއީ ޗެމްޕިއަންސް ލީގުގައި މެސީ ކާމިޔާބުކުރި 100 ވަނަ ލަނޑެވެ. މި ހާފުގެ އެންމެ ފަހު މިނެޓުގައި ވެސް ޗެލްސީގެ ކުޅުންތެރިޔަކު ފޮނުވާލި ހަމަލާއެއް ބާސާގެ ގޯލުގެ ހުރަސް ދަނޑިއަށް އަމާޒުވެފައިވެއެވެ.

މި މެޗުގައި ޖެހި ދެ ލަނޑާ އެކު މެސީ ވަނީ އިނގިރޭސި ޓީމުތަކާއި ދެކޮޅަށް އެންމެ ފަހުން ކުޅުނު 18 މެޗުގައި 10 ލަނޑު ޖަހާފައެވެ. މި މެޗުގައި މެސީ ޖެހި ފުރަތަމަ ލަނޑަކީ އޭނާގެ ކެރިއަރުގައި ވެސް ޖެހި އެންމެ އަވަސް ލަނޑެވެ. ޗެމްޕިއަންސް ލިގުގައި މެސީ 100 ލަނޑު ހަމަކޮށްފައިވާއިރު އޭނާ އެ އަދަދު ހަމަކޮށްފައި ވަނީ ކްރިސްޓިއާނޯ ރޮނާލްޑޯއަށް ވުރެ 14 މެޗު މަދުން ކުޅެގެންނެވެ. ހަމައެހެންމެ މިއީ ބާސާ އިން ޗެމްޕިއަންސް ލީގުގެ ކުއާޓާ ފައިނަލުގައި ޖެހިޖެހިގެން ވާދަކުރާ 11 ވަނަ ސީޒަނެވެ.

ޗެމްޕިއަންސް ލީގުގެ ކުއާޓާގައި ވާދަކުރާ ޓީމުތައް ކަށަވަރުވެފައިވާއިރު ކުއާޓާ ފައިނަލުގެ ގުރު ނެގުން އޮންނާނީ ހުކުރު ދުވަހުގެ ހަވީރުއެވެ. ބާސާގެ އިތުރުން ކުއާޓާއަށް ދަތުރުކޮށްފައި ވަނީ ބަޔާން މިއުނިކާއި ލިވަޕޫލް، ރެއާލް މެޑްރިޑް، ޔުވެންޓަސް އަދި މެންޗެސްޓާ ސިޓީ އަދި ރޯމާގެ އިތުރުން ސެވިއްޔާއެވެ.