ސަރުކާރުގެ އިސްވެރިންނަށް ފިޔަވަޅު އަޅާނެކަމުގެ އިންޒާރު ދީފައިވަނިކޮށް ރާއްޖޭގެ މައްސަލަ އަނެއްކާވެސް ޔޫރަޕިއަން ޕާލަމެންޓަށް!

ރާއްޖޭގެ މައްސަލަ އަނެއްކާވެސް ވިލާތުގެ ޔޫރަޕިއަން ޕާލަމެންޓުގައި އެޖެންޑާކޮށްފިއެވެ.

ވިލާތުގެ އިއްތިޙާދުގެ ޕާލަމެންޓްގެ އިތުރުން ވިލާތުގެ އިއްތިޙާދުގެ އެހެން ގުނަވަންތަކުންވެސް ރާއްޖޭގެ މައްސަލައިގައި ބަޔާންތައް ނެރެ، ޤަރާރުތައް ފާސްކުރަމުންދާއިރު، ޔޫރަޕިއަން ޕާލަމެންޓްގައި ރާއްޖޭގެ މައްސަލަ މިފަހަރު އެޖެންޑާކޮށްފައިވަނީ ފަރަންސޭސިވިލާތުގެ ސްޓްރަސްބާގްގައި މިމަހުގެ 12 އިން 15 އަށް ކުރިއަށްދާ ސެޝަންގައެވެ.

ޔޫރަޕިއަން ޕާލަމެންޓަށް މިފަހަރު ހުށަހަޅާ ޤަރާރު ސްޕޮންސަރކުރަނީ އީޔޫ ޕާލަމެންޓްގެ 7 ޕާލަމެންޓްރީ ގްރޫޕަކުންނެވެ. އާއްމު ގޮތެއްގައި ބައިނަލްއަޤްވާމީ މުޖްތަމައުން މިހާރު ގޮވާލަމުންދާ ކަންކަމަށް މިފަހަރުގެ ޤަރާރުގައިވެސް ގޮވާލާނެއެވެ. އޭގެ ތެރޭގައި ކުއްލި ނުރައްކަލުގެ ޙާލަތު އުވާލުމާއި، ރައްޔިތުންގެ މަޖިލީހާއި ޝަރުޢީ ކޯޓުތަކަށް މިނިވަންކަމާއިއެކު މަސައްކަތްކުރެވޭނެ މާހައުލެއް ޤާއިމްކުރުމާއި، މީޑިއާގެ މިނިވަންކަން ދިނުން ހިމެނެއެވެ.

ޔޫރަޕިއަން ޔޫނިއަންއިން ދިވެހި ސަރުކާރުގެ އިސް ފަރާތްތަކާއި ދެކޮޅަށް ދަތިކުރުމުގެ ފިޔަވަޅު އަޅާނެކަމުގެ އިންޒާރު ދީފައިވަނިކޮށް، މިޤަރާރުގައިވަނީ އަޅާނެ ފިޔަވަޅުތައް ލިސްޓްކުރުމަށް ގޮވާލާފައެވެ. މިޤަރާރު ފާސްވެއްޖެނަމަ ވިލާތުގެ އިއްތިޙާދުން ދިވެހި ސަރުކާރުގެ އިސްވެރިންނާއި ދެކޮޅަށް ދަތިކުރުމުގެ ފިޔަވަޅު އަޅާނެކަމަށް ދެމުން އައި އިންޒާރުތަކަށް ނިމުމެއް އައިސް، ދަތިކުރުމުގެ ފިޔަވަޅުތައް އެޅުމުގެ އަމަލީ މަސައްކަތް ފެށޭނެކަމަށް ޚާރިޖީ ދާއިރާގެ ބޭފުޅުން ފާހަގަކުރައްވައެވެ.

މި ޤަރާރުގެ ދާއިމީ ދެލިކޮޕީ އިއްވާނީ ރާއްޖެ ގަޑިން ބުރާސްފަތި ދުވަހުގެ މެންދުރުފަހު 2:30 ގައި ކުރިއަށްދާ ސެޝަންގައެވެ. އަދި ޤަރާރަށް ވޯޓަށް އަހާނީ ބުރާސްފަހު ދުވަހު ރާއްޖެގަޑިން 4:30 ގައި އޮންނަ ސެޝަންގައެވެ.