އިތުރު ފުލުހުން ހައްޔަރު ނުކުރާނެ ކަމުގެ ޔަޤީންކަމެއް ނޯންނާނެ: ހިސާން
އިންޓަލިޖެންސް ރިޕޯޓަކީ ހެއްކެތް ނޫން
ހިސާން ރާއްޖެ ޓީވީގެ ފަލަ ސުރުޚީގައި
ޤާނޫނު ނަގަހައްޓަން މަސައްކަތް ކުރީތީ ފުލުހުންގެ ތެރެއިން ބަޔަކު ހައްޔަރުކޮށްފައިވާއިރު ހައްޔަރު ނުކޮށްތިބި ފުލުހުންނަށްވެސް އެމީހުން ހައްޔަރު ނުކުރާނެ ކަމުގެ އެއްވެސް ޔަޤީންކަމެއް ނޯންނާނެ ކަމަށް މަޝްހޫރު ޤާނޫނީ ވަކީލް ހިސާން ހުސައިން ވިދާޅުވެއްޖެއެވެ.
ރާއްޖެ ޓީވީން އާދީއްތަ ދުވަހުގެރޭ ގެނެސްދިން ފަލަ ސުރުޚީ ޕްރޮގްރާމްގައި ވާހަކަ ދައްކަވަމުން ހިސާން ވިދާޅުވީ ރައީސް ޔާމީންނަށް ސުޕްރީމް ކޯޓަށް އެއްވެސް އެއްޗެއް ނޭންގޭނެ ކަމަށާއި ވަކި ކަމެއް ވަކި ގޮތަކަށް ކުރުމަށް ސުޕްރީމް ކޯޓަށް ރައީސް ޔާމީނަށް ނޭންގޭނެކަމަށެވެ.
ހިސާން ވިދާޅުވީ ސަރުކާރުގެ ސިޓީ ބިޓީ ފޮނުވާ ނިޒާމަށް ޢަމަލް ކުރުމަކީ ޖުޑިޝަރީއަށް ލާޒިމް ކަމެއް ނޫން ކަމަށާއި އެއީ މުޅިން ވަކި ބާރެއް ކަމަށެވެ. އެހެންކަމުން އެފަދަ ނިޒާމެއްގެ ބޭނުން ހިފުމަކީ ސުޕްރީމް ކޯޓުގެ އަމިއްލަ ކަމެއްކަމަށް ހިސާން ވިދާޅުވިއެވެ. ރައީސުލްޖުމްހޫރިއްޔާއަށް ވެސް ސުޕްރީމް ކޯޓަށް މައްސަލައެއް ނުވަތަ ސިޓީއެއް ވިއަސް ހުށަހެޅުއްވޭނީ ޢާއްމު މީހާއެކޭ އެއްގޮތަށް ސުޕްރީމް ކޯޓުގެ ރިސެޕްޝަން މެދުވެރިކޮށް ކަމަށްވެސް ހިސާން ވިދާޅުވިއެވެ.
އެސްއޯއީގެ ދަށުން ހައްޔަރުކޮށްފައިވާ ސިޔާސީ އިސްބޭފުޅުންނާ ގުޅޭ ގޮތުން ހޯދާފައިވާ ކަމަށް ފުލުހުން ބުނާ ހެކިތަކާ ގުޅޭގޮތުން ހިސާން ވިދާޅުވީ މިފަހަކަށް އައިސް ސިޔާސީ މީހުންނާމެދު ތަހުގީގް ކުރުމަށާއި ހެއްކެތްގެ ގޮތުގައި ބޭނުން ކުރަނީ އިންޓަލިޖެންސް ރިޕޯޓް ކަމަށާއި އެހެންނަމަވެސް އެރިޕޯޓަކީ ދުނިޔޭގެ އެއްވެސް ތަނެއްގައި ހެތްކެތްގެ ގޮތުގައި ބަލައިގަންނަ އެއްޗެއް ނޫން ކަމަށެވެ. ސަބަބކީ އިންޓަލިޖެންސް ރިޕޯޓަކީ އެހަދާ މީހަކަށް ފެންނަ ޚިޔާލީ ކަންތައްކެއްގެ މައްޗަށް ބިނާކޮށް ޚިޔާލީ ވާހަކައަކަށްވުން ކަމަށް ހިސާން ވިދާޅުވިއެވެ.
އޭގެ އިތުރުން މިފަދަ މައްސަލަތުކުގައި އަބަދު ސިއްރު ހެކިން ތިއްބަވަން ޖެހެނީ ކީއްވެތޯ ސުވާލު އުފައްދަވަމުން ހިސާން ވިދާޅުވީ އުސޫލެއްގެ ގޮތުން ކޯޓެއްގެ ހެކި ބަސް ދޭ މީހެއް ދައްކާ ވާހަކަތަކަކީ ތެދުވެރިޔަކު ދައްކާ ވާހަކައަކަށް ވާން ޖެހޭ ކަމަށާޢި ކޮރަޕްޝަންގެ ތުހުމަތު ކުރެވިފައިވާ މީހުންނަކީ ޝަރުއީ ގޮތުން ހެއްކެކަށް ވެސް ނުފެދޭ ބަޔެއްކަމަށެވެ. ނަމަވެސް ސޯޝަލް މީޑިޔާގެ ޒަރީއާއިން އެނގޭގޮތުގައި ހެކިދޭ މީހުންނަކީ އެފަދަ ހެއްކެތް ދެވިދާނެ ބައެއް ނޫންކަމަށް ހިސާން ވިދާޅުވިއެވެ.
"އެ ވިދާޅުވާ ކިތާބީ ހެއްކެއް ނެތް. ބައެއް މީހުން ބަންދުކޮށްފައި ތިބީ ވެސް ހެކި ބަސް ނުދީގެން. ފުލުހުން ބޭނުންވާ ގޮތަށް ހެކި ބަސް ދިނީމަ ބަންދުން ދޫކޮށްލާ. މި މައްސަލައިގެ ތަހުގީގު މިދަނީ ގާނޫނީ ގޮތުން އެއްވެސް ކަހަލަ ސައްހަކަމެއް ލިބޭ ގޮތަކަށް ނޫން." ހިސާން ވިދާޅުވިއެވެ.
ޤާނޫން އަސާސީއާ ޚިލާފަށް ކުރާ ތަހުގީގެއްކަމަށް ވިދާޅުވެ ބައެއް ލީޑަރުން ތަހުގީގަށް އެއްބާރުލުން ނުދެއްވާކަމަށް ދެކެވޭ ވާހަކައަށް އިޝާރާތް ކުރައްވާ ހިސާން ވިދާޅުވީ ގާނޫނުއަސާސީއާ ހިލާފަށް ހިންގާ އެއްވެސް އަމަލަކަށް ރައްޔިތުން އެއްބާރުލުން ދެއްވަން ނުޖެހޭނެ ކަމަށެވެ. އަދި ހުކުމެއް ތަންފީޒުކުރަން އުޅުމުން ފުލުހުންގެ ބަޔަކު ކުށްވެރިވުން މިއީ ދުނިޔޭގައި ފުރަތަމަ ފަހަރަށް ވީ ކަމެއް ކަމަށާއި ސުޕްރީމް ކޯޓުގެ ހުކުމެއް ބަލަގަތުމާއި ނުގަތުން އެއީ އެއްވެސް މީހަކަށް ލިބިފައިވާ ހައްގެއް ނޫން ކަމަށެވެ. އެހެންކަމުން މިހާރު ތިއްބެވި ފުލުހުންވެސް ވިސްނަވަން ޖެހޭ ކަމަށާއި ހައްޔަރު ނުކޮށްތިބި އެއްވެސް ފުލުހަކަށް އެމީހާ ހައްޔަރު ނުކުރާނެ ކަމުގެ ޔަޤީންކަމެއް ނޯންނާނެކަމަށް ހިސާން ވިދާޅުވިއެވެ.
ހިސާން ވިދާޅުވީ ސަލާމަތީ ޚިދުމަތްތަކަށް އޮތީ ޤާނޫން ނެގެހެއްޓުން ކަމަށާއި ކޮށްފައިވާ ހުވާގައިވެސް ބުނެފައިވަނީ އެވާހަކަ ކަމަށެވެ.
" ގާނޫނާ ހިލާފު އަމުރުތަކަށް ތަބާ ނުވުމަށް ލާޒިމުކުރޭ. ސަލާމަތީ ހިދުމަތްތަކުގައި ތިއްބަވާ ބޭފުޅުން މިކަމާ މެދު ވިސްނަވަން ޖެހޭ. މިހާރު ހައްޔަރު ނުކޮށް ތިއްބެވި ބޭފުޅުންގެ ސަލަމާތާއި ރައްކާތެރިކަން ކަށަވަރުނުވޭ. ސަލާމަތީ ހިދުމަތްތަކުން މަސައްކަތްކުރައްވަން ޖެހޭނީ ގާނޫނު އަސާސީ ހިމާޔަތްކުރުމަށް." ހިސާން ވިދާޅުވިއެވެ.
