ދިވެހި ދިދަ ނެގި ތެޔޮ ޓޭންކަރުގެ މައްސަލައަކީ ބައެއްގެ ބޮޑު ރޭވުމެއް: އާދަމް ޝަރީފު
11 މާރިޗު 2018 | އާދީއްތަ 12:02މިކަން ފުލުހުންދަނީ ބަލަމުން
އެންސީޓީސީ އިން ބޭއްވި ނޫސްވެރިންގެ ބައްދަލުވުން
ރާއްޖޭގައި ކުއްލި ނުރައްކަލުގެ ހާލަތު އިއުލާނުކޮށްފައި ވަނިކޮށް، ދިވެހި ދިދަ ނެގި ބޯޓެއް އުތުރު ކޮރެއާގެ ބޯޓަކާ މުއާމަލާތްކުރުމަކީ ބައެއްގެ ބޮޑު ރޭވުމެއް ކަމަށް ޑިފެންސް މިނިސްޓަރ އާދަމް ޝަރީފު އުމަރު ވިދާޅުވެއްޖެ އެވެ.
ނޭޝަނަލް ކައުންޓަރ ޓެރަރިޒަމް ސެންޓަރ (އެންސީޓީސީ) އިން ބޭއްވި ޕްރެސް ކޮންފްރެންސްގައި މިނިސްޓަރ ޝަރީފު ވިދާޅުވީ، މިދުވަސްވަރު ރާއްޖޭގައި ހިނގަމުންދާ ކަންކަމާއި މި ބޯޓުގެ މައްސަލައާއި ގުޅުންތަކެއް އެބަ ހުރި ކަމަށާއި މިކަމަކީ ވަރަށް ބޮޑަށް ރާވައިގެން ހިންގާފައިވާ ބޮޑު ކުށެއް ކަމަށެވެ.
އުތުރު ކޮރެއާގެ "ޗޮން މާ ސަން" ނަމަކަށް ކިޔާ އުޅަނދާއި "ޝިން ޔުއާން 18" ނަމަކަށް ކިޔާ ރާއްޖޭގެ ދިދަ ނަގާފައިވާ ކަމަށް ބުނާ އުޅަނދުން ކަނޑުމަތިން މުއާމަލާތްތަކެއް ހިންގި ކަމަށް ބުނެ ޖަޕާނު ސަރުކާރުން ވަނީ މި މައްސަލަ ފެންމަތިކޮށްފަ އެވެ.
" މި ބޯޓުގެ މައުލޫމާތުތައް ކުރިން އެއްވެސް ވަރަކަށް ލިބިފައެއް ނުވޭ. އަޅުގަނޑުމެންނަށް މިކަން އެނގުނީ ޖަޕާނުން ރިޕޯޓް ކުރަމުން. މި މައްސަލަ ފުލުހުން ބަލަމުންދާ އިރު ބޯޓުގެ މައްސަލައަކީ ބައިނަލްއަގްވާމީ މުއައްސަސާތަކެއް ގުޅިގެން ކުރެވިގެންދާ ތަހުގީގެއް ކަމަށް އަޅުގަނޑުމެންނަށް އެންޑޯޒް ކުރެވިފައި މިވަނީ،" އާދަމް ޝަރީފު ވިދާޅުވި އެވެ.
މި މައްސަލައިގައި އެންސީޓީސީ އިން ބައިވެރިވަނީ ދިވެހި ގައުމަށް ނުރައްކާވާ ހިސާބުން ކަމަށާއި އެހެން ނަމަވެސް މިކަމާ ގުޅޭ އެހެން މައްސަލަތައް ބަލާނީ ފުލުހުންގެ މުއައްސަސާއިން ކަމަށް މިނިސްޓަރ ވިދާޅުވި އެވެ. އަދި މި މައްސަލައާ ގުޅޭ މައުލޫމާތުތައް ހިއްސާ ކުރުމުގައި އެންސީޓީސީގެ ދައުރު އޮންނާނެ ކަމަށް އޭނާ ވިދާޅުވި އެވެ.
މިނިސްޓަރ އިތުރަށް ވިދާޅުވީ، އެންސީޓީސީ އިން ކުރަމުންދާ މަސައްކަތުން ރާއްޖެއާ މެދު ކުރިން ގައުމުތަކުން ދެކެމުން އައި ގޮތް ބަދަލު ކުރެވިފައިވާ ކަމަށެވެ. އެގޮތުން ރާއްޖެއަކީ ހައްދުފަހަނަ އަޅާފައިވާ ފިކުރުތައް ޕްރޮމޯޓްކުރާ ގައުމެއްގެ ގޮތުގައި އޮތް ނަމަވެސް، ގިނަ ގައުމުތަކުން ރާއްޖެއަކީ ދީނީ ގޮތުން މެދުމިނަށް ތާއީދު ކުރާ ގައުމެއްކަން އެނގޭނެ ކަމަށް މިނިސްޓަރ ވިދާޅުވި އެވެ.
މި ޕްރެސް ކޮންފްރެންސްގައި ވާހަކަދައްކަވަމުން ބްރިގޭޑިއަ ޖެނެރަލް ޒަކަރިއްޔާ މަންސޫރު ވިދާޅުވީ، އެންސީޓީސީ އިން ބޭރުގެ އެކި ފަރާތްތަކާ ގުޅިގެން މުހިއްމު ގިނަ މަސައްކަތްތަކެއް ކުރަމުންދާ ކަމަށާއި ކުރާ މަސައްކަތުގެ ނަތީޖާ ވަރަށް ރަގަޅަށް ފެންނަ މުންދާ ކަމަށެވެ.
"ރާއްޖޭގެ ސަލާމަތަށް ގިނަ މަސައްކަތްތަކެއް މިއަހަރުވެސް ދަނީ ކުރަމުން. ރާއްޖޭގެ ސުލްހަވެރިކަން ދެމެހެއްޓުމަށް ކުރެވެން ހުރި ހުރިހާ ކަމެއް ކުރާނަން." ޒަކަރިއްޔާ މަންސޫރު ވިދާޅުވި އެވެ.
