ޕާޓީ ބަދަލުކުރުން މަނާ ކުރާ ބިލް ސަރުކާރުން މަޖިލީހަށް ހުށަހަޅައިފި
މިއީ ފްލޯ ކޮރޮސިންގ އާބެހޭ ބިލެއް
ޕީޕީއެމް ޕާލަމެންޓްރީ ގްރޫޕްގެ ލީޑަރު އަހުމަދު ނިހާނު ހުސައިން މަނިކު
ރައްޔިތުންގެ މަޖިލީހުގެ މެމްބަރަކު އެ މެމްބަރެއް އިންތިހާބުވި ޕާޓީ ދޫކޮށް އެހެން ޕާޓީއަކަށް ބަދަލުވެއްޖެ ނަމަ އެ މެމްބަރެއްގެ ގޮނޑި ގެއްލޭގޮތަށް ބިލެއް ސަރުކާރުން ރައްޔިތުންގެ މަޖިލީހަށް ހުށަހަޅައިފި އެވެ.
"އެންޓި ޑިފެކްޝަން ބިލް"ގެ ނަމުގައި ސަރުކާރުގެ ފަރާތުން މިބިލް ހުށަހެޅުއްވީ ޕީޕީއެމް ޕާލަމެންޓްރީ ގްރޫޕްގެ ލީޑަރު އަހުމަދު ނިހާނު ހުސައިން މަނިކު އެވެ.
މި ބިލަކީ ރާއްޖޭގައި ހިންގަމުންދާ މަލްޓި-ޕާޓީ ސިސްޓަމްގެ ދަށުން ވަކި ސިޔާސީ ޕާޓީއެއްގެ ޓިކެޓްގައި ވާދަކޮށްގެން ރައްޔިތުންގެ މަޖިލީހަށް އިންތިހާބުވުމަށް ފަހު، އެ އިންތިހާބުވި ދައުރުގެ ތެރޭގައި، އިންތިހާބުވި ޕާޓީގެ މެމްބަރުކަމުން ވަކިކޮށްފިނަމަ، ނުވަތަ އަމިއްލައަށް ވަކިވެއްޖެނަމަ، ނުވަތަ އެހެން ޕާޓީއެއްގެ މެމްބަރަކަށް ވެއްޖެނަމަ، އެފަދަ މެމްބަރެއްގެ ގޮނޑި ގެއްލޭނެކަން ކަނޑައެޅުމާއެކު، އެފަދައިން ގޮނޑި ގެއްލޭ ހާލަތްތަކުގައި ބައިލެކްޝަން ބޭއްވުމާ ގުޅޭ އުސޫލުތަކާއި އިޖުރާއާތުތައް ބަޔާން ކުރާ ގާނޫނެ ކެވެ.
ޕާޓީ ބަދަލުކޮށްފިނަމަ ނުވަތަ ވަކިކޮށްފި ނަމަ، އެ މެމްބަރެއްގެ ގޮނޑި ގެއްލޭނެ ކަމަށް ކަނޑައަޅާ ދިނުމަށް ދައުލަތުގެ ބަންޑާރަ ނައިބު މުހައްްމަދު އަނިލް ވަނީ ސުޕްރީމް ކޯޓަށް މައްސަލައެއް ވެސް ހުށަޙަޅާފަ އެވެ. އެމައްސަލައާ ގުޅިގެން ސުޕްރީމް ކޯޓުން ވަނީ މިފަދަ ހާލަތެއްގައި މެމްބަރެއްގެ ގޮނޑި ގެއްލިއްޖެކަން ކަނޑައެޅުމުގެ ބާރު އިލެކްޝަންސް ކޮމިޝަނަށް ދީފަ އެވެ. އަދި ރައްޔިތުންގެ މަޖިލީހުން ފްލޯ ކްރޮސިންގ ގާނޫނެއް ހަދަންޖެހޭކަމަށް ވެސް ބުނެފައި ވެއެވެ.
ސުޕްރީމް ކޯޓުގެ މި ހުކުމާއި ގުޅިގެން އިލެކްޝަންސް ކޮމިޝަނުން ވަނީ ސަރުކާރަށް ނިސްބަތްވާ 12 މެމްބަރަކު ޕީޕީއެމުން ވަކިވުމުން އެ މެމްބަރުންގެ ގޮނޑި ގެއްލިފައިވާ ކަމަށް ކަނޑައަޅާފަ އެވެ. ނަމަވެސް އެ 12 މެމްބަރުން ޕީޕީއެމުން ވަކިވެފައިވަނީ ސުޕްރީމް ކޯޓުގެ އެ ހުކުމުގެ ކުރިންނެވެ.
މީގެ އިތުރުން ސުޕްރީމް ކޯޓުން އެކެއް ފެބްރުއަރީގައި އުއްތަމަ ފަނޑިޔާރު އަބްދުﷲ ސައީދާއެކު އެ ކޯޓުގެ ފަނޑިޔާރުންގެ ފުލް ބެންޗުންވަނީ އެ 12 މެމްބަރުންގެ ގޮނޑު ނުގެއްލޭ ކަމަށާއި އެ މެމްބަރުންގެ ގާނޫނީ ޒިންމާ އަދާކުރުމަށް އެއްވެސް ފަރާތަކުން ހުރަސް އަޅައިގެން ނުވާނެ ކަމަށް އަމުރުކޮށްފަ އެވެ. އަދި ރައްޔިތުންގެ މަޖިލީހުން ހަދަންޖެހޭ ފްލޯ ކޮރޮސިންގ ގާނޫނު ހަދާފައިނުވާތީ ރައްޔިތުންގެ މަޖިލީހުގައި މިވަގުތު ތިބި އެއްވެސް މެމްބަރެއްގެ ގޮނޑި ގެއްލިފައިނުވާ ކަމަށް ސުޕްރީމް ކޯޓުގެ އަމުރުގައި ބުނެފައި ވެއެވެ.
ނަމަވެސް ފަހެއް ފެބްރުއަރީގައި ސަރުކާރުން ކުއްލި ނުރައްކަލުގެ ހާލަތު އިއުލާން ކުރުމަށް ފަހު، ވަނީ ސުޕްރީމް ކޯޓުގެ އުއްތަމަ ފަނޑިޔާރު އަބްދުﷲ ސައީދު އާއި އެކޯޓުގެ ފަނޑިޔާރު އަލީ ހަމީދު އަދި ކުރީގެ ރައީސް މައުމޫން އަބްދުލްގައްޔޫމް ހައްޔަރު ކުރައްވާފަ އެވެ. އޭގެފަހުން ސުޕްރީމް ކޯޓުން ގިނަ އަމުރުތަކެއް ނެރެފައިވާކަން ފާހަގަ ކޮށްލެވެ އެވެ. އެގޮތުން އަނެއްކާވެސް 12 މެމްބަރުން ގޮނޑިއާމެދު ސުވާލު އުފެދޭގޮތަށް ސުޕްރީމް ކޯޓުގެ ދެން ތިއްބެވި ތިން ފަނޑިޔާރުންގެ ބެންޗުން ވަގުތީ އަމުރެއް ނެރެފައިވެ އެވެ.
އެ 12 މެމްބަރުންނަށް މަޖިލީހަށް ވަޑައިގެންނެވުމުގެ ފުރުސަތު ދައުލަތުގެ ސަލާމަތީ ހިދްމަތްތަކުން ދީފައެއް ނުވެއެވެ. ގުޅިފައިވާ ސިޔާސީ ޕާޓީތަކަށް ނިސްބަތްވާ މެމްބަރުންނަށް މަޖިލީހުގެ އިދާރާގެ ތެރެއިން ސިފައިން ހުރަސް އަޅަމުންދާއިރު މަގުމަތިން ފުލުހުން ދަނީ އެ މެމްބަރުން މަޖިލީހަށް ވަޑައިގެންނެވުމަށް ހުރަސް އަޅަމުން ނެވެ.
ނިހާނުގެ އެބިލް މަޖިލީހަށް ހުށަހެޅި ނަމަވެސް އެބިލް އަދި މަޖިލީހުގެ ޖަލްސާއަކަށް އެޖެންޑާ ކޮށްފައެއް ނުވެއެވެ. އެބިލް މިޖިލީހުގެ އިދާރާއަށް ހުށަހެޅީ ހޯމަ ދުވަހު އެވެ.
