މި އަހަރުގެ މޭ މަހު ބާއްވަން ހަމަޖެހިފައިވާ އިނގިރޭސިވިލާތުގެ ޕްރިންސް ހެރީއާއި ހޮލޯވުޑްގެ ތަރި މޭގަން މާކަލްގެ ކައިވެނީގެ ހަފްލާގައި، ދުނިޔޭގެ މަޝްހޫރު އަންހެން ބޭންޑެއް ކަމަށްވާ ސްޕައިސް ގަރލްސްގެ ހުށަހެޅުމެއް ފެނިގެންދާނެ ކަމަށް ދޭހަަވާ ގޮތަކަށް ބޭންޑްގެ މެމްބަރެއް ވާހަކަ ދައްކައިފިއެވެ.
ނިމިގެންދިޔަ ހަފްތާގައި އެމެރިކާގެ "ދަ ރިއަލް" ޓޯކް ޝޯވގައި ގެސްޓް ހޯސްޓެއްގެ ގޮތުގައި ސްޕައިސް ގަރލްސްގެ މެލް ބީ ފެނިގެން ދިޔައެވެ.
ޝޯވގެ ހަތަރު ހޯސްޓުންގެ ތެރެއިން ލޯނީ ލަވް ވަނީ ރޯޔަލް ވެޑިންގއަށް ދައުވަތެއް ލިބިފައިވާ ފަރާތެއް އިނގޭތޯ މެލް ބީއާ ސުވާލު ކޮށްފައެވެ. އެ ހިސާބުން އޭނާ ކައިވެންޏަށް ދާކަން އެނގިގެން ދިޔައެވެ.
"ފަސް ސްޕައިސް ގަރލްސްއަށް ދައުވަތު ލިބުނީ،" މެލް ބުންޏެވެ.
އެހެންކަމުން ކައިވެނީގެ ހަފްލާގައި ސްޕައިސް ގަރލްސްގެ ރިޔޫނިއަންއެއް ފެނިގެންދާނެތޯ ލޯނީ ސުވާލުކުރިއެވެ.
"މިއީ ލައިވް ވީމަ ވާގޮތް،" މިހެން ބުނުމަށް ފަހު މެލް ބީ ކިއު ކާޑުތައް އުކާލާ މަންޒަރު ފެެނެއެވެ. އެއަށްފަހު، އެހެން ނުބުނާ ކަމަށް ހެދެންވެގެން އުޅޭ ކަމަށާއި، "އަހަރެން ވަކިކޮށްފާނެ" ކަމަށް މެލް ބުނެއެވެ.
ޕްރިންސް ހެރީއާއި މޭގަންގެ ކައިވެނި ބާއްވަން ހަމަޖެހިފައިވަނީ 9 މޭގައެވެ.
މެލް މިހެން ވާހަކަ ދައްކާފައި މިވަނީ ސްޕައިސް ގަރލްސްގެ ފަސް މެމްބަރުންގެ ފޮޓޯއެއް ސޯޝަލް މީޑިއާގައި ޝެއާ ކުރިތާ މަހެއްހާ ދުވަސް ފަހުންނެވެ. އަދި ފޮޓޯތަކާ އެކު ސްޕައިސް ގަރލްސްގެ ރިޔޫނިއަންއެއްގެ އަޑުތައް ފެތުރެން ފެށިއެވެ.
