ސޫރިޔާގެ އިރުމަތީ ޣޫތާގައި ސަރުކާރު ސިފައިންނާއި ހަނގުރާމަވެރިންނާއި ދެމެދު ބަދަލުކުރެވެމުންދާ ޙަމަލާތަކުންނާއި، ސަރުކާރުން ސިފައިން އަޅަމުންދާ ބޮންތަކުން ސަލާމަތްވުމަށް އެތައް ހާސް ބަޔަކު ޣޫތާގެ މެދުތެރެއަށް ޖަމާވަމުން އެބަދެއެވެ.

ރިޕޯޓްތައް ބުނާ ގޮތުގައި ބައެއް މީހުން ޣޫތާއިން ސަލާމަތްވެގެން، އެރަށުން ބޭރަށްވެސް އެބަދެއެވެ.

ވެރިރަށް ދިމިޝްޤުގެ އިރުމަތިން އޮންނަ އިރުމަތީ ޣޫތާ މިހާރު އޮތީ ރައީސް ބައްޝާރުލް އައްސަދުގެ ވެރިކަމާއި ދެކޮޅަށް ހަނގުރާމަކުރަމުންދާ ހަނގުރާމަވެރި 3 ޖަމާޢަތެއްގެ ބާރުގެ ދަށުގައެވެ. އަދި އެރަށް ހިފުމަށް އެކި ދިމަދިމާލުން އެރަށް ހިސާރުކޮށްގެން ތިބި ސަރުކާރު ސިފައިން ދަނީ މަސައްކަތްކުރަމުންނެވެ. މިދިޔަ މަހުގެ މެދުތެރޭގައި ފެށި މިހަމަލާތަކަށް ފަހު މިހާރު ޣޫތާގެ 10 އިންސައްތަ އޮތީ ސިފައިންގެ ބާރުގެ ދަށުގައި ކަމަށް ސޫރިޔާ ސިފައިން ބުނެއެވެ.

4 ލައްކައެއްހާ މީހުންގެ އާބާދީއެއް އޮންނަ އިރުމަތީ ޣޫތާގައި ހާލުގައި ޖެހިފައިތިބި މީހުންނަށް އެހީވުމަށް އދގެ އެހީގެ ޤާފިލާއެއް އެސަރަހައްދަށް ވަންނަން އާދިއްތަ ދުވަހުވެސް މަސައްކަތްކުރިއެވެ. އެހެން ނަމަވެސް ސޫރިޔާ ސަރުކާރުގެ ހުއްދަ ނުލިބުމުގެ ސަބަބުން އެކަން ނުވީކަމަށް އދއިން ބުންޏެވެ.

ހަމަލާ ބަދަލުކުރުން ހުއްޓާލުމަށް އދއިން ގޮވާލި ނަމަވެސް ހަނގުރާމަވެރިންނާއި ސިފައިންނާއި ދެމެދު އަދިވެސް ދަނީ ޙަމަލާ ބަދަލުކުރަމުންނެވެ. އަދި ކޮންމެ ދުވަހަކުވެސް 5 ގަޑިއިރަށް ޙަމަލާ ބަދަލުކުރުން ހުއްޓާލުމަށް ސޫރިޔާ ސިފައިންނަށް މަދަދުވެރިވާ ރަޝިޔާއިން އެންގިނަމަވެސް، އެއަށް ވެސް އެއްވެސް ފަރާތަކުން އިހްތިރާމެއް ނުކުރެއެވެ.

ފެބްރުއަރީ މަހުގެ 18 ވަނަ ދުވަހު އިރުމަތީ ޣޫތާ ހިފުމަށް ސޫރިޔާ ސިފައިން މަސައްކަތް ފެށި ފަހުން، މިހާތަނަށް ޙަމަލާތަކުގައި 600 އަށް ވުރެ ގިނަ މީހުން މަރުވެފައިވާއިރު، ގިނައިން މަރުވެފައިވަނީ ކުށެއް ނެތް އަންހެނުންނާއި ކުޑަކުދިންނެވެ. އެހެން ނަމަވެސް ސަރުކާރު ސިފައިން ބުނަމުންދަނީ އެމީހުން ހަމަލާދެނީ ހަނގުރާމަވެރިންނަށް އަމާޒުކޮށް ކަމަށެވެ.

އިރުމަތީ ޣޫތާއަކީ މިވަގުތު ހަނގުރާމަވެރިންގެ އަތް ދަށުގައި އޮތް ސޫރިޔާގެ މައި ރަށްތަކުގެ ތެރެއިން އެންމެ ފަހު ރަށެވެ.