ޤުދުސްއަކީ ފަލަސްތީނުގެ ވެރިރަށުގެ ގޮތުގައި ބަލައިގަތުމަށް އެމެރިކާގެ ރައީސް ޑޮނަލްޑް ޓްރަމްޕް ނިންމެވުމުން، އެކަމާއި ދެކޮޅަށް ތެދުވި ފަލަސްތީނުގެ އާއްމުންނާއި ޔަހޫދީ ސިފައިންނާއި ދެމެދު ކުރިމަތިލުންތަކެއް ހިނގައިފިއެވެ. ރިޕޯޓްތައް ބުނާ ގޮތުގައި އިރުމަތީ ޤުދުސްގެ އިތުރުން ރާމަﷲ އާއި، ހުޅަނގު އައްސޭރި އަދި ޣައްޒާގައި ޓްރަމްޕްގެ ނިންމެވުމާއި ދެކޮޅަށް މުޒާހަރާ ކޮށްފައިވެއެވެ.
ފަލަސްތީނުގެ ސަރުކާރުންވަނީ އިހުތިޖާޖަށް ނިކުތުމަށް އެޤައުމުގެ ރައްޔިތުންނަށް ގޮވާލާފައެވެ. އަދި ޙަމާސް ޖަމާޢަތުން ވަނީ ތިންވަނަ އިންތިފާޟާއަކަށް ނިކުތުމަށް ފަލަސްތީނުގެ ރައްޔިތުންނަށް ގޮވާލާފައެވެ. ޤުދުސްގެ ޤަދީމީ ސަރަހައްދުގައި ބުރާސްފަތި ދުވަހު ފިހާރަތައް ވެސް ހުރީ ބަންދު ކޮށްފައެވެ.
ރާމަﷲގައި މުޒާހަރާކުރި ފަލަސްތީނުގެ އާއްމުންގެ ތެރެއަށް ޔަހޫދީ ސިފައިންވަނީ ކަރުނަ ގޭހާއި ސްޓަން ގްރެނޭޑް އުކާފައެވެ. މުޒާހަރާކުރި މީހުން ވަނީ އިސްރާއީލް ސިފައިންނާއި ދިމާއަށް އޮށްގައު އުކައި، ޓަޔަރުތަކާއި ކަރުދާސް ފޮށިގަނޑުތަކުގައި ރޯކޮށްފައެވެ. އަދި ފަލަސްތީނުގެ މުޒާހަރާކުރަން ނިކުތް ބައެއް މީހުންނާއި އިސްރާއީލް ސިފައިންގެ ބައެއް މީހުންނަށް އަނިޔާވެގެން ފަރުވާދޭން ޖެހުނެވެ.
"ޑޮނަލްޑް ޓްރަމްޕް ބުނީ ޤުދުސްއަކީ ޔަހޫދީންގެ ތަނެކޭ. ނުވާނެ އެހެނެއް. ޤުދުސްއަކީ އަބަދުވެސް ފަލަސްތީނުގެ ތަނެއް"، މުޒާހަރާއަށް ނިކުމެ ހުރި އަންހެނަކު ބުންޏެވެ.
ޣައްޒާއާއި އިސްރާއީލް ގުޅޭ ސަރަހައްދީ ރޮނގުގައި ވެސް ހަމަނުޖެހުން ހިނގިއެވެ. އަދި ބައިތުއްލަހަމްގައިވެސް މުޒާހަރާކުރި މީހުންނާއި އިސްރާއީލް ސިފައިންނާއި ދެމެދު ހަމަނުޖެހުން ހިނގިއިރު، ރާމަﷲ އާއި ޤުދުސް ގުޅޭ ސަރަހައްދީ ރޮނގުގައި އިސްރާއީލް ސިފައިންނާއި ދިމާއަށް އޮށްގައު އުކަމުންދިޔަ ކުޑަ ކުދިންތަކެއްގެ ގަޔަށް އިސްރާއީލް ސިފައިން ވަނީ ސްޕޮންޖް ވަޒަން ޖަހާފައެވެ. ފަލަސްތީނުގެ ރެޑް ކްރެސެންޓުން ބުރާސްފަތި ދުވަހު ބުނީ އެކި ސަރަހައްދުތަކުގައި ހިނގި ހަމަނުޖެހުންތަކުގައި ފަންސާހަށް ވުރެ ގިނަ މީހުންނަށް އަނިޔާވިއިރު، އެކަކު އޮތީ ސީރިއަސް ހާލަތެއްގައި ކަމަށެވެ.
ފަލަސްތީނުގެ ސަރުކާރާއި ޙަމާސް ޖަމާޢަތުން ވެސް ވަނީ ހުކުރު ދުވަހުވެސް އެމެރިކާގެ ނިންމުމާއި ދެކޮޅަށް އިހުތިޖާޖަށް ނިކުތުމަށް ފަލަސްތީނުގެ ރައްޔިތުންނަށް ގޮވާލާފައެވެ.
