އެސްޓީއޯ މާލޭ ލީގުގައި ހުކުރު ދުވަހުގެ ހަވީރު ޔުނައިޓެޑް ވިކްޓްރީ އަދި ވިކްޓްރީ ސްޕޯޓްސް ކްލަބް ކުޅޭ މެޗަކީ ވަރަށް މުހިންމު މެޗެއް ކަމަށް ދެ ޓީމުން ވެސް ބުނެފިއެވެ.

މި މެޗުގެ ކުރިން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަމުން ވިކްޓްރީގެ ކޯޗު ލާސްލޯ ކިސް ބުނީ އޭނާގެ ޓީމު ފުރަތަމަ މެޗުން ބަލިވި ނަމަވެސް އެ މެޗުގެ ފުރަތަމަ ހާފުގައި ފެނިގެންދިޔައީ ވަރަށް ރަނގަޅު ކުޅުމެއް ކަމަށެވެ. އޭނާ ބުނީ ފިޔަވަޅަކަށް ފަހު ފިޔަވަޅެއް އޭނާގެ ޓީމުން ރަނގަޅުކުރަމުން އަންނަ ކަމަށާއި މާދަމާގެ މެޗަކީ އޭނާގެ ޓީމަށް ވަރަށް މުހިންމު މެޗެއް ކަމަށެވެ. އޭނާ ބުނީ ބެންޗުގައި ވަރުގަދަ ކުޅުންތެރިން ތިބި ނަމަވެސް އެ ކުޅުންތެރިން ދަނޑުމައްޗަށް އެރުމާއެކު ނަފްސާނީ މައްސަލަތަކެއް ދިމާވާ ކަމަށެވެ.

ޔޫވީގެ ކޯޗު މުހައްމަދު ނަޒީހު ބުނީ ފުރަތަމަ މެޗަކީ މިހާރު ތާރީހު ކަމަށާއި އެހެން ނަމަވެސް އޭނާގެ ޓީމާއި މެދު އިތުބާރު ހިފަހައްޓަންޖެހޭ މިންވަރުގައި އިތުބާރު ހިފަހައްޓަމުން އަންނަ ކަމަށެވެ. އޭނާ ބުނީ އަމާޒަކީ ފުރަތަމަ މެޗެކޭ އެއްގޮތަށް ދެވަނަ މެޗު ވެސް ކުރިޔަށް ގެންދިޔުން ކަމަށާއި އެހެން ނަމަވެސް 90 މިނެޓު ކުޅޭއިރު އެއްވަރެއްގައި ނުހިފެހެއްޓޭ ވަގުތު ވެސް އަންނާނެ ކަމަށެވެ.

މާލޭ ލީގުގެ ފުރަތަމަ މެޗުގައި ކްލަބް އީގަލްސްއާ ދެކޮޅަށް ކުޅެ ވިކްޓްރީ ބަލިވީ 4-1 ގެ ނަތީޖާއަކުންނެވެ. ހަމައެހެންމެ ޔޫވީ ވަނީ އެ ޓީމު ކުޅުނު ފުރަތަމަ މެޗުގައި 3-0 އިން ކްލަބް ވެލެންސިއާ ބަލިކޮށްފައެވެ. މި ދެ ޓީމު ބައްދަލުކުރާ މެޗު ކުޅުމަށް ހަމަޖެހިފައިވަނީ ހުކުރު ދުވަހުގެ ހަވީރުއެވެ.