ކުއްލި ނުރައްކަލުގެ ހާލަތު އިތުރު ކުރުމަށް ރައްޔިތުންގެ މަޖިލީހުން ނިންމި ނިންމުން ސައްހަ ކަމަށް ސްޕްރީމް ކޯޓުން ކަނޑައެޅުމުން އެ ނިންމުން ބުދަ ދުވަހުގެ މަޖިލީހުގައި އިއްވައި ޖަލްސާގެ ޔައުމިއްޔާގައި ހިމަނައިފިއެވެ.

ކުއްލި ނުރައްކަލުގެ ހާލަތުގެ ގަރާރު ރައްޔިތުންގެ މަޖިލީހުން މިމަހުގެ 20 ވަނަ ދުވަހު ފާސްކޮށްފައި ވަނީ، މަޖިލީހުގެ 38 މެމްބަރުންގެ ވޯޓުންނެވެ. އަދި ގަރާރަށް ވޯޓަށް އަހާފައިވަނީ ރައްޔިތުން އެމައްޗަށް އަމަލުކުރުން ލާޒިމްކުރާ ކަމެއް މަޖިލީހުން ފާސްކުރުމަށް ވޯޓަށް އެހޭނީ މަޖިލީހުގެ ޖުމްލަ މެމްބަރުންގެ އަޣުލަބިއްޔަތު ހާޒިރުވެތިބޭ ޖަލްސާއެއްގައި ކަމަށް ގާނޫނު އަސާސީގެ 87 ވަނަ މާއްދާގެ (ށ) ގައި ބަޔާންކޮށްފައިވާ ބަޔާން ކުރުމާއި ހިލާފަށެވެ.
ގަރާރުގެ މުއްދަތު 30 ދުވަހަށް އިތުރުކޮށްފައިވަނީ މަޖިލީހުގެ ގަވާއިދުގެ 38 ވަނަ މާއްދާގެ ދަށުން މަޖިލީހުގެ ޖަލްސާއެއް ބޭއްވޭނީ މަޖިލީހުގެ މެމްބަރުންގެ ތެރެއިން 25 އިންސައްތައަށް ވުރެ ގިނަ މެމްބަރުން ތިއްބަވާ ޖަލްސާއެއްގައި ބުނާ މާއްދާއާ ހަވާލާދީ އެވެ. މަޖިލީހުގެ 25 އިންސައްތަ މެމްބަރުންނަކީ 22 އެވެ. މަޖިލީހުގެ ޖަލްސާއެއް ބޭއްވުމަށް ބޭނުންވާ މަދުވެގެން 22 މެމްބަރުން ހާޒިރުވެ ތިއްބަވާ ޖަލްސާއެއްގައި ކުއްލި ނުރައްކަލުގެ ހާލަތުގެ ގަރާރަށް ވޯޓަށް އެހޭނެ ކަމަށް މަޖިލީހުގެ ރައީސް ކަމުގައި ހުންނެވި ފުވައްމުލަކު ދެކުނު ދާއިރާގެ މެމްބަރު އަބްދުﷲ މަސީހު މުހައްމަދު ވަނީ ނިންމަވާފައެވެ.

މަޖިލީހުގެ ޖުމްލަ މެމްބަރުންގެ އަޣުލަބިއްޔަތުކަމަށްވާ 43 މެމްބަރުން މަޖިލީހަށް ހާޒިރުވެވަޑައިގެން ނެތި ގަރާރު ފާސްކޮށް، މަޖިލީހުން ވަނީ މަޖިލީހުގެ އެ ނިންމުމާމެދު ބައެއް މެމްބަރުން ސުވާލު އުފައްދަވާތީ، މަޖިލީހުގެ އެނިންމުން ވަނީ ސުޕްރީމް ކޯޓްގެ އިސްތިޝާރީ ލަފަޔަކަށް އެދިފައެވެ.
މިމައްސަލާގައި ސްޕްރީމް ކޯޓުން ނެރުނު ލަފާގައި ބުނެފައިވަނީ ކުއްލި ނުރައްކަލުގެ ހާލަތުގެ ގަރާރަށް 30 ދުވަސް އިތުރު ކުރުމަށް މަޖިލީހުން މިމަހުގެ 20 ވަނަ ދުވަހު ފާސްކޮށްފައިވާ ފާސްކުރުމަކީ ދުސްތޫރީގޮތުން ސައްހަ ނިންމުމެއްކަމަށް ސްޕްރީމް ކޯޓްގެ ފަނޑިޔާރުންގެ އިއްތިފާގުން ކަނޑައަޅާފައިވާ ކަމުގައެވެ.
ސުޕްރީމް ކޯޓުން ރައްޔިތުންގެ މަޖިލީހަށް ދީފައިވާ ލަފާގައި ބުނެފައިވަނީ ސުޕްރީމް ކޯޓުން ނިންމަވާފައިވަނީ ގާނޫނު އަސާސީގެ 87 ވަނަ މާއްދާގެ (ށ)ގައި "ރައްޔިތުންގެ އެ މައްޗަށް އަމަލު ކުރުން ލާޒިމްވާ އެއްވެސް ކަމެއް ރައްޔިތުންގެ މަޖިލީހުން ފާސްކުރުމަށްޓަކައި ވޯޓަށް އަހަންވާނީ އެ މަޖިލީހުގެ ޖުމްލަ މެމްބަރުންގެ ދެބައި ކުޅަ އެއްބަޔަށް ވުރެ ގިނަ މެމްބަރުން ތިބެގެން ކަމަށް ބުނެފައިވީ ނަމަވެސް ކުއްލި ނުރައްލުގެ ގަރާރާ ގުޅޭ ވޯޓު ނެގުމަށް އެ އަދަދަކީ ދުސްތޫރީ ގޮތުން ލާޒިމްކުރާ އަދަދެއް ނޫން ކަމަށެވެ.
ސުޕްރީމް ކޯޓުގެ ނިންމުމުގައި ވަނީ އެދުވަހު ރައްޔިތުންގެ މަޖިލީހުގެ ޖަލްސާ ކުރިއަށް ގެންގޮސްފައި ވަނީ ގާނޫނު އަސާސީގެ 86 ވަނަ މާއްދާގެ ދަށުން ޖަލްސާގެ ގާނޫނީ އަދަދު ރައްޔިތުންގެ މަޖިލީހުގެ މެމްބަރުންގެ 25 އިންސައްތަ ކަމަށް ބަލައިގެން ކަމަށާއި އަދި އެ ނިންމުންތައް އެ އަދަދަށް މެމްބަރުން ތިބެގެން ނިންމިދާނެ ކަމަށެވެ.
ނަމަވެސް ކުއްލި ނުރައްކަލުގެ ހާލަތުގެ ޤަރާރަކީ އެދަފަ ރައްޔިތުން އެއަށް އަމަލުކުރަން ޖެހޭ ޤަރާރެއް ނޫންކަމަށާއި، އެހެންކަމުން ގާނޫނުއަސާސީގެ 87 ވަނަ މާއްދާގެ (ށ) ގައި ބުނާ އަދަދަށް ނުވަތަ މަޖިލީހުގެ ޖުމްލަ މެމްބަރުންގެ އަގްލަބިއްޔަތު ގަރާރު ފާސްކުރުމަށް މަޖިލީހުގައި ހާޒިރުވެ ތިބެން ބޭނުންނުވާކަން ސާފުކޮށް އެނގެން އޮންނަ ކަމަށްވެސް ސްޕްރީމް ކޯޓްގެ ނިންމުމުގައިވަނީ ބުނެފައެވެ.