ރާއްޖޭގެ ހާލަތާމެދު ލަންކާގެ ގާނޫނު ހަދާ މަޖިލީހުގެ ރައީސް ކަންބޮޑުވުން ފާޅުކުރައްވައިފި
19 ފެބުރުއަރީ 2018 | ހޯމަ 11:30ދިވެހިރާއްޖޭގެ ބަރުލަމާނީ ހަމަތަކާއި ޑިމޮކްރަސީގެ އުސޫލްތައް ހަލާކުވެގެންދާތީ ވަނީ ކަންބޮޑުވުންފާޅުކުރައްވާފަ
ސްރީ ލަންކާގެ ގާނޫނު ހަދާ މަޖިލީހުގެ ރައީސް ކަރު ޖަޔަސޫރިޔާ
ދިވެހިރާއްޖޭގެ ބަރުލަމާނީ ހަމަތަކާއި ޑިމޮކްރެޓިކް އުސޫލްތައް ހަލާކުވެގެންދާތީވެ، ސްރީ ލަންކާގެ ގާނޫނު ހަދާ މަޖިލީހުގެ ރައީސް ކަރު ޖަޔަސޫރިޔާ ކަންބޮޑުވުން ފާޅުކުރައްވައިފި އެވެ.
ރާއްޖޭގެ ހާލަތާމެދު ޖަޔަސޫރިޔާ ކަންބޮޑުވުން ފާޅުކުރެއްވީ، އެސޯސިއޭޝަން އޮފް ސާކް ސްޕީކާސް އެންޑް ޕާލިމެންޓޭރިއަންގެ ރައީސްގެ ހައިސިއްޔަތުން، ރައްޔިތުންގެ މަޖިލީހުގެ ރައީސް އަބްދުﷲ މަސީހަށް ފޮނުއްވި ސިޓީފުޅެއްގަ އެވެ.
ދެހާސް ފަނަރަ ވަނަ އަހަރުން ފެށިގެން ސްރީ ލަންކާގެ ގާނޫނު ހަދާ މަޖިލީހުގެ ރިޔާސަތު ބަލަހައްޓަވާ ޖަޔަސޫރިއްޔާ ފޮނުއްވި ސިޓީފުޅުގައި، ކުއްލި ނުރައްކަލުގެ ހާލަތު އިއުލާނުކުރުމާއި ސުޕްރީމް ކޯޓުގެ ފަނޑިޔާރުން ހައްޔަރުކުރުމާއި މަޖިލީހުގެ މެމްބަރުން ހައްޔަރުކުރުމާއި ސުޕްރީމް ކޯޓުގެ އަމުރު ތަންފީޒުނުކުރުމާއި މިނިވަން ޝަރުއީ ނިޒާމާއި ގާނޫނީ ހުކޫމާތުގެ ބާރު ކަނޑުވާލަން މަސައްކަތް ކުރާތީވެ ކަންބޮޑުވާ ކަމަށެވެ.
