ރައްޔިތުންގެ މަޖިލީހުގެ ގަލޮލު ދެކުނު ދާއިރާގެ މެންބަރު އަޙުމަދު މަޚްލޫފް އަނެއްކާވެސް ފުލުހަށް ހާޒިރުވުމަށް އަންގައިފިއެވެ.

ހޮނިހިރު ދުވަހުގެރޭ ފުލުހުން މަޚްލޫފާއި ހަވާލުކޮށްފައިވާ ޗިޓުގައި، އާދީއްތަ ދުވަހުގެރޭ 20:30 އަށް ފުލުހުންގެ އިދާރާއަށް ހާޒިރުވުމަށް މަޚްލޫފަށް ވަނީ އަންގާފައެވެ.

ޗިޓުގައިވާގޮތުން އާދީއްތަ ދުވަހުގެރޭ މަޚްލޫފް ޕޮލިހަށް ހާޒިރުކުރަނީ، 3 ފެބްރުއަރީ 2018 ވަނަ ދުވަހުގެ ހަވީރުގެ ވަގުތެއްގައި މަޚްލޫފް އާއި އިތުރު ބަޔަކު އިސްނަގައިގެން ކ. މާފުށީ ޖަލު ކުރިމައްޗަށް އެއްވެ، މުޒާހަރާ ކުރަންތިބި މީހުންގެ ތެރެއިން ބަޔަކު ޖަލުގެ މައި ގޭޓު މައްޗަށް އަރައި، ގޭތް ތަޅުވައި، އެތެރެއަށް ވަދެގަންނަން މަސައްކަތް ކޮށްފައިވާ ކަމަށް ބުނާ މައްސަލައެއްގައި ސުވާލުކޮށް ބަޔާން ނެގުމަށެވެ.

މި މައްސަލައިގައި އާދީއްތަ ދުވަހުގެރޭ މަޚްލޫފް ފުލުހަށް ހާޒިރު ކުރާއިރު، ހުކުރު ދުވަހު ތަފާތު ދެމައްސަލައެއްގައި، އަދި ހޮނިހިރު ދުވަހުވެސް ތަފާތު ދެ މައްސަލައެއްގައި މަޚްލޫފް ވަނީ ފުލުހަށް ހާޒިރުކޮށްފައެވެ.

ހުކުރު ދުވަހުގެ މެންދުރާއި ހަވީރު މަޚްލޫފް ފުލުހަށް ހާޒިރުކޮށްފައިވަނީ، މަޚްލޫފް ކޮށްފައިވާ ދެ  ޓްވީޓަކާއި ގުޅިގެން ފުލުހުން ބަލަމުންދާ ވަކިވަކި ދެ މައްސަލައަކާއި ގުޅިގެން ސުވާލުކޮށް ބަޔާން ނެގުމަށެވެ.

ހޮނިހިރު ދުވަހުގެ ހަވީރު މަޚްލޫފް ފުލުހަށް ހާޒިރުކޮށްފައިވަނީވެސް ޓްވީޓެއްގެ މައްސަލައިގައެވެ. އަދި ހޮނިހިރު ދުވަހުގެރޭ މަޚްލޫފް ފުލުހަށް ހާޒިރުކޮށްފައިވަނީ ހުކުރުދުވަހު މާލޭގައި ކުރިއަށްގެންދިޔަ އެއްވުމަކާއި ގުޅިގެން ފުލުހުންގެ ދައުރު އަދާކުރުމަށް ހުރަސް އެޅިކަމަށް ތުޙުމަތުކުރެވޭ މައްސަލައިގައެވެ.

ގުޅިފައިވާ ޕާޓީތަކުގެ ތަރުޖަމާނުކަންވެސް ކުރައްވާ މަޚްލޫފް އަކީ އިދިކޮޅު ހަރަކާތުގެ މަގުމަތީ ހަރަކާތްތަކުގައި އިސްކޮށް ހަރަކާތްތެރިވެވަޑައިގަންނަވާ ބޭފުޅެކެވެ.