ޗެމްޕިއަންސް ލީގު: ޕީއެސްޖީ ބަލިކޮށް ރެއާލް އިން ކުއާޓާގެ ފުރުސަތު ބޮޑުކޮށްފި

ޔުއެފާ ޗެމްޕިއަންސް ލީގުގައި ފްރާންސްގެ ޕީއެސްޖީއާ ދެކޮޅަށް ކުޅުނު މެޗު ކާމިޔާބުކޮށް ފާއިތުވެދިޔަ ދެ ސީޒަނުގައި ވެސް މި މުބާރާތުގެ ތަށި ކާމިޔާބުކުރި ސްޕެއިންގެ ރެއާލް މެޑްރިޑުން ކުއާޓާ ފައިނަލްގެ ފުރުސަތު ބޮޑުކޮށްފިއެވެ.

މި ސީޒަނުގެ ޗެމްޕިއަންސް ލީގުގައި ފެނިގެންދާ އެންމެ ބޮޑު މެޗުގެ ގޮތުގައި ގިނަ ބަޔަކު ލޭބަލް ކުރި މި މެޗު އަމިއްލަ ދަނޑުގައި ކުޅެ ފަހަތުން އަރައި ރެއާލް އިން ކާމިޔާބުކުރީ 3-1 ގެ ނަތީޖާއަކުންނެވެ. ޕީއެސްޖީގެ ފުރަތަމަ އެގާރަ އިން ބޮޑެތި ބަދަލުތަކެއް މި މެޗުގައި ވަނީ ފެނިގެން ގޮސްފައެވެ. އެގޮތުން ކެޕްޓަން ތިއާގޯ ސިލްވާ އާއި ލޭވިން ކުރުޒަވާގެ އިތުރުން ތިއާގޯ މޮޓާ މި މެޗުގައި ފެނިގެން ގޮސްފައެއް ނުވެއެވެ. ހަމައެހެންމެ ރެއާލްގެ ފުރަތަމަ އެގާރައިން ގެރެތް ބޭލް ބާކީ ކުރިއިރު އޭނާގެ ބަދަލުގައި އެ ޓީމުގެ ފުރަތަމަ އެގާރައިން ފެނިގެންދިޔައީ އިސްކޯއެވެ.

ދެ ޓީމުގެ ފަރާތުން ވެސް ރަނގަޅު ކުޅުމެއް ފެނިގެންދިޔަ މި މެޗުގެ ފުރަތަމަ ހާފުގައި ޕީއެސްޖީއަށް ވުރެ ބޮޑަށް ރެއާލް ފެނިގެންދިޔައީ ވަރުގަދަކޮށެވެ. ޕީއެސްޖީގެ ކީޕަރު އަރެއޯލާގެ ފަރާތުން ގިނަ ސޭވްތަކެއް ފުރަތަމަ ހާފުގައި ފެނިގެންދިޔައިރު ޓޯނީ ކްރޫސްއާ ކްރިސްޓިއާނޯ ރޮނާލްޑޯއަށް ވަނީ ލަނޑު ޖެހުމަށް ގިނަ ފުރުސަތުތަކެއް ލިބިގެން ގޮސްފައެވެ. ރެއާލްއިން ނުރައްކާ ކުރަމުން ދަނިކޮށް މެޗުގެ ފުރަތަމަ ލަނޑު ޖަހައި ލީޑު ނެގީ ޕީއެސްޖީ އިންނެވެ. މި ލަނޑު މެޗުގެ 33 ވަނަ މިނެޓުގައި އެ ޓީމަށް ޖަހައިދިނީ އެޑްރިއަން ރެބިއޯއެވެ. އެހެން ނަމަވެސް ފުރަތަމަ ހާފުގެ އެންމެ ފަހު މިނެޓުގައި ލިބުނު ޕެނަލްޓީއެއް ކާމިޔާބުކޮށް ރޮނާލްޑޯ ވަނީ ރެއާލްއަށް މެޗުގެ ނަތީޖާ ހަމަހަމަކޮށްދީފައެވެ.

ދެ ޓީމު އެއްވަރުވެގެން ފުރަތަމަ ހާފު ނިމިގެންދިޔައިރު ދެ ޓީމަށް ވެސް ވަނީ ދެވަނަ ހާފުގައި ލަނޑު ޖެހުމަށް ރަނގަޅު ފުރުސަތުތަކެއް ލިބިގެން ގޮސްފައެވެ. ޕީއެސްޖީއަށް ލިބުނު ފުރުސަތުތަކުގެ ބޭނުން އެ ޓީމަށް ހިފިފައިނުވާއިރު ރޮނާލްޑޯ ވަނީ 83 ވަނަ މިނެޓުގައި ލަނޑެއް ޖަހައިދީ ރެއާލްއަށް މެޗުގެ ލީޑު ނަގައިދީފައެވެ. އޭގެ ތިން މިނެޓު ފަހުން މާސެލޯ ވަނީ ލަނޑެއް ޖަހައިދީ ރެއާލްގެ ލީޑު އިތުރަށް ފުޅާކޮށްދީފައެވެ.

މި މެޗުގައި ޖެހި ދެ ލަނޑާއެކު ރޮނާލްޑޯ ވެގެން ގޮސްފައިވަނީ އެއް ޓީމަކަށް ޗެމްޕިއަންސް ލީގުގައި 100 ލަނޑު ޖަހައިދިން ފުރަތަމަ ކުޅުންތެރިޔާއަށެވެ.

ކުއާޓާ ފައިނަލްއަށް ދަތުރުކުރަން ބޭނުންވާ ނަމަ ޕީއެސްޖީ އިން ދެވަނަ ލެގުގެ މެޗު ދެ ލަނޑަށް ވުރެ ބޮޑު ތަފާތަކުން ކާމިޔާބުކުރުން ވަނީ މަޖުބޫރުވެފައެވެ. ދެވަނަ ލެގުގެ މެޗު ޕީއެސްޖީގެ ދަނޑުގައި ކުޅުމަށް ހަމަޖެހިފައި ވަނީ މާޗް މަހުގެ ހަތް ވަނަ ދުވަހުއެވެ.