ރައީސުލްޖުމްހޫރިއްޔާއަށް ޤާނޫނުތަކެއް ނުހެދޭނެ: ވައްޑެ
އިސްލާމް ދީނުގެ އަސްލަކާއި ޚިލާފުނުވާ ގޮތުގެ މަތިން ކޮންމެ މީހަކަށްމެ ވާހަކަ ދެއްކުމުގެ މިނިވަންކަން ލިބިގެންވޭ
ތުލުސްދޫ ދާއިރާގެ މެމްބަރު އަދި މަޝްހޫރު ޤާނޫނީ ވަކީލު ވައްޑެ
ރައީސުލްޖުމްހޫރިއްޔާއަށް ޤާނޫނުތައް ނުހެއްދެވޭނެ ކަމަށާއި، ޤާނޫނުތައް ހެދުމުގެ ފުރުސަތު މަޖިލިސް މެމްބަރުންނަށް ދޭން ޖެހޭނެކަމަށް ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހިމް (ލޯޔަރު ވައްޑެ) ވިދާޅުވެއްޖެއެވެ.
މިހާރު އިއުލާންކޮށްފައިވާ ކުއްލި ނުރައްކަލުގެ ޙާލަތާއި ގުޅިގެން ރާއްޖެ ޓީވީއިން ކުރިއަށް ގެންދާ ޚާއްސަ ކަވަރޭޖްގައި އަންގާރަ ދުވަހުގެ ރޭ ވާހަކަ ދައްކަވަމުން ވަހީދު ވިދާޅުވީ ޤާނޫނު ހެދޭނީ ރައްޔިތުންގެ މަޖިލީހަށް ކަމަށެވެ. އަދި ޤާނޫނުތައް ނެތި ޤަވާޢިދު ހަދައިގެން އެއަށް ޢަމަލުކުރުމަކީ މިޒަމާނުގައި މީހުން ދަންނަ ކަމެއް ނޫން ކަމަށާއި، މިހާރު އަމަލުކުރާ ޤާނޫނު އަސާސީ ވެސް ދަންނަ ކަމެއް ނޫން ކަމަށް ވަހީދު ވިދާޅުވިއެވެ. އޭނާ އިޝާރާތްކުރެއްވީ ކުއްލި ނުރައްކަލުގެ ޙާލަތު އިއުލާންކުރުމަށްފަހު ސަރުކާރުން ބައެއް އުޞޫލުތަކަށް ގެނައި ބަދަލުތަކަށެވެ. މަޖިލިސް ކުރިއަށް ދިޔަނުދީ، ސަރުކާރުން ރައީސް ޔާމީން ބޭނުންފުޅުވާ ގޮތަށް ކަންތައްތައް ކުރައްވަމުން ދާތީއެވެ.
"އިރުއިރުކޮޅާ ޤާނޫނީ ވަކީލުން ބޭނުންކުރުމުގައިވެސް 30 މިނެޓް، 25 މިނެޓް، 30 ސިކުންތު، މިކަހަލަ ގޮތަކަށް މިކަންތައްތައް ގެންގުޅުމަކީ ކުރެވޭނެ ކަމެއް ނޫން،" ވަހީދު ވިދާޅުވިއެވެ.
ވަހީދު ފާޑުވިދާޅުވި މައްސަލައަކީ ކުއްލި ނުރައްކަލުގެ ޙާލަތުގެ ތެރޭގައި ސަލާމަތީ ޚިދުމަތްތަކަށް ލިބިގެންވާ ކަމަށް ބުނާ ބާރުތައް ބޭނުންކޮށްގެން ހައްޔަރުކުރެވުނު ބޭފުޅުންނާއި ބައްދަލުކުރުމަށް އެބޭފުޅުންގެ ޤާނޫނީ ވަކީލުންނަށް ފުލުހުން އަޅަމުންދާ ހުރަސްތަކަށެވެ.
އޭނާ އިތުރަށް ވިދާޅުވީ ބާރުވެރިކަން ފެށިގެން އަންނަނީ ރައްޔިތުންގެ ކިބައިން ކަމަށާއި، ރައްޔިތުންގެ ބާރުވެރިކަން އެމީހުންގެ ކިބައިގެން ނިގުޅައިގަތުމުގެ ބާރު ވެރިކަމުގައި ހުންނަވާ ބޭފުޅަކަށް ނުލިބޭނެކަމަށެވެ.
"އިސްލާމީ ޝަރީޢަތުގައިވެސް ކަނޑައަޅާފައި އޮންނާނެ، އިސްލާމް ދީނުގެ އަސްލަކާއި ޚިލާފުނުވާ ގޮތުގެ މަތިން ކޮންމެ މީހަކަށްމެ ވާހަކަ ދެއްކުމުގެ މިނިވަންކަން ލިބިގެންވާކަމަށް. އެމިނިވަންކަން ހަމަ މި ޤާނޫނު އަސާސީގައިވެސް ދެއްވާފައި އެބައޮތް. އެއީ މަނާކުރެވޭނެ އެއްޗެއް ނޫން. އެއީ ހަރާމް ކުރެވޭނެ އެއްޗެއް ނޫން،" ވަހީދު ވިދާޅުވިއެވެ.
ވަހީދު ވަނީ އަންގާރަ ދުވަހުވެސް މަޖިލިސް އިދާރާ ދޮށަށް އެއްވި މަޖިލިސް މެމްބަރުންނާއިއެކު އެތަނުގައި އިހްތިޖާޖްކުރައްވާފައެވެ،
