ހުކުރު ދުވަހު ބާއްވާ އެއްވުމަށް ފުލުހުންގެ އެހީތެރިކަމަށް އެދިއްޖެ
13 ފެބުރުއަރީ 2018 | އަންގާރަ 17:03ފުލުހުންގެ ދައުވަތަކަށް ގުޅިފައިވާ ޕާޓީތަކުގެ ފަރާތުން ވަނީ ފުލުހަށް ހާޒިރުވެފައި
ގުޅިފައިވާ ޕާޓީތަކުގެ ފަރާތުން ބޭއްވި ހަރަކާތެއްގެ ތެރެއިން
ގުޅިފައިވާ ސިޔާސީ ޕާޓީތަކުން އަންނަ ހުކުރު ދުވަހު ބާއްވާ އެއްވުމަށް ފުލުހުންގެ އެއްބާރުލުން ދިނުމަށް ގުޅިފައިވާ ސިޔާސީ ޕާޓީތަކުން އެދިއްޖެއެވެ.
ހުކުރު ދުވަހު ގުޅިފައިވާ ޕާޓީތަކުން އެއްވުމެއް ބާއްވަން އިއުލާން ކުރުމާއި ގުޅިގެން ސަލާމަތީ ބާރުތަކުން ވަނީ އެ އެއްވުމަކީ ގައުމުގެ ހަމަޖެހުންނަގާލައި، ސަލާމަތީ ބާރުތަކާއި ކުރިމަތިލާން ބާއްވާ އެއްވުމެއް ކަމަށް ބުނެފައެވެ. އެއްވުން ކުރިއަށް ގެންދަން ފުރުސަތު ނުދޭނެ ކަމަށް ފުލުހުންނާއި ސިފައިން ބުނީ ލިބިފައިވާ އިންޓެލިޖެންސް މައުލޫމާތުތަކާއި ގުޅިގެންނެވެ. އެކަމާއި ގުޅިގެން މައުލޫމާތު ސާފްކުރުމަށް ގުޅިފައިވާ ސިޔާސީ ޕާޓީތަކުން އަންގާރަ ދުވަހުގެ ހަވީރު ވަނީ އިސްކަންދަރުކޮށްޓަށް ހާޒިރުވެފައެވެ.
އެމްޑީޕީގެ ސެކެޓަރީ ޖެނެރަލް އަނަސް އަބްދުﷲ ސައްތާރު ވިދާޅުވީ ގުޅިފައިވާ ސިޔާސީ ޕާޓީތަކުގެ ފަރާތުން އިސްކަންދަރުކޮށްޓަށް ހާޒިރުވީ ފުލުހުން ދިން ދައުވަތަކަށް ކަމަށެވެ. އަންނަ ހުކުރު ދުވަހު ބާއްވަން އިއުލާން ކޮށްފައިވާ އެއްވުމުގެ މައުލޫމާތު ފުލުހުންނަން ލިބިފައިވަނީ ނުބައިކޮށް ކަމަށާއި، އެހެންކަމުން އެކަމުގެ މައުލޫމާތު ސާފްކޮށްދީފައިވާ ކަމަށް އަނަސް ވިދާޅުވިއެވެ.
އަނަސް ވިދާޅުވީ ގުޅިފައިވާ ސިޔާސީ ޕާޓީތަކުން އަންނަ ހުކުރު ދުވަހު ބާއްވާ އެއްވުމަކީ "ބޮޑު" އެއްވުން ނޫން ކަމަށާއި، އަންނަ ހުކުރު ދުވަހުގައި އެހެންދުވަސްތަކެކޭ އެއްގޮތަށް ހަރަކާތްތައް އޮންނާނެ ކަމަށެވެ. އެހެން ނަމަވެސް ގުޅިފައިވާ ސިޔާސީ ޕާޓީތަކުގެ ފަރާތުން ކުރިއަށް އޮތް ދުވަސްތަކުގައި "ބޮޑު އެއްވުމެއް " ބާއްވާން ނިންމާފައި ކަމަށާ، ވަރަށް އަވަހަށް އެކަން އިއުލާން ކުރާނެ ކަމަށް އަނަސް ވިދާޅުވިއެވެ.
ގުޅިފައިވާ ސިޔާސީ ޕާޓީތަކުން ބާއްވާ "ބޮޑު އެއްވުމަށް" ފުލުހުންގެ އެއްބާރުލުމާއި އެހީތެރިކަމަށް އެދިފައިވާ ކަމަށް ވެސް އަނަސް ވިދާޅުވިއެވެ.
