އެމްއެންޑީއެފް އިންޓަރ ޔުނިޓް 15 ވަނަ ފުޓްބޯޅަ މުބާރާތް ފަށައިފި

ކޮމާންޑަރ އިސްމާޢީލް ދީދީގެ ހަނދާނީ ވާދައިގެ ތައްޓަށް ކުޅެވޭ އެމްއެންޑީއެފް 15 ވަނަ އިންޓަރ ޔުނިޓް ފުޓްބޯޅަ މުބާރާތް ކުލަގަދަ ރަސްމިއްޔާތަކާއެކު ފަށައިފިއެވެ.

މުބާރާތް ފެށުމުގެ ގޮތުން އެފްއޭއެމް އެއް ނަމްބަރު ޓާރފް ދަނޑުގައި ބޭއްވި ރަސްމިއްޔާތު ޝަރަފުވެރިކޮށްދެއްވީ ފްޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލު އެވެ. މި މަހުގެ 28 ވަނަ ދުވަހުން ފެށިގެން އަންނަ މަހުގެ 16 ވަނަ ދުވަހުގެ ނިޔަލަށް ކުރިއަށްދާ މި މުބާރާތުގެ ހުރީހާ މެޗެއް ވެސް ކުޅުމަށް ހަމަޖެހިފައި ވަނީ އެފްއޭއެމް އެއް ނަމްބަރު ޓާރފް ދަނޑު ގައެވެ.

މުބާރާތް ފެށުމުގެ ގޮތުން ކުޅުނު މެޗުގައި ބައްދަލުކުރީ މި މުބާރާތުގެ އެއްވަނަ ޑިވިޝަންގެ އެންމެ ފަހުގެ ޗެމްޕިއަން ޓީމް ފަޔަރ އެންޑް ރެސްކިއު ސާރަވިސްއާއި މެރިން ޑިޕްލޮއިވްމަންޓް ޔުނިޓް 2 ގެ ޓީމެވެ. މި މެޗު 2-0 ގެ ނަތީޖާއިން ކާމިޔާބުކުރީ ފަޔަރ އެންޑް ރެސްކިއު ސާރަވިސްގެ ޓީމެވެ.

ދެ ޑިވިޝަންއަކަށް ބަހާލެވިގެން ކުރިއަށްދާ މި މުބާރާތުގެ އެއް ވަނަ ޑިވިޝަންގައި 10 ޓީމް ހިމެނިފައިވާއިރު ދެ ވަނަ ޑިވިޝަންގައި 9 ޓީމް ހިމެނެއެވެ. ފުރަތަމަ ޑިވިޝަންގައި ހިމެނޭ ޓީމުތަކަކީ ފަޔަރ އެންޑް ރެސްކިއު ސަރވިސް، މެރިން ޑިޕްލޮއިމަންޓް ޔުނިޓް 2، ސްޕެޝަލް ޕްރޮޓެކްޝަން ގްރޫޕް، އިލެކްޓްރިކަލް އެންޑް މެކޭނިކަލް އިންޖިނިއާސް، ޕްރެސިޑެންޝަލް ގާޑް، މާލޭ އޭރިއާ ހުޅުލެ ޕޯސްޓް، މެރިން ޑިޕްލޮއިމަންޓް ޔުނިޓް 3، ސެންޓްރަލް އޭރިއާ އަދި މެރިން ޑިޕްލޮއިމަންޓް ޔުނިޓް 1ގެ އިތުރުން ކޯސްޓްގާޑެވެ.

ދެވަނަ ޑިވިޝަންގައި ހިމެނޭ ޓީމުތަކަކީ ބޭންޑް އެންޑް މިއުޒިކް ވިންގް އަދި ސަޕްލައި ސަޕޯޓް ސާވިސް ކޮމްބައިން ޓީމް، ކޮލެޖް އޮފް ޑިފެންސް އެންޑް ސެކިއުރިޓީ ސްޓަރޑީޒް އަދި ކުއާޓަރ މާސްޓަރ ސަރވިސްގެ ކޮމްބައިން ޓީމް، ޑިފެންސް އިންޓެލިޖެންސް ސަރވިސް އަދި ދިވެހި ސިފައިންގެ ކްލަބްގެ ކޮމްބައިން ޓީމް، މިލިޓަރީ އިންޖިނިއާސް، މިލިޓަރީ ޕޮލިސް، ސިގްނަލް އަދި މެޑިކަލް ސަރވިސްގެ ކޮމްބައިން ޓީމް، އޯޑަނަންސް ސަރވިސް، ޓްރާންސްޕޯޓް ސަރވިސް އަދި މީޑިއާ އެންޑް ޕަބްލިޝިންގ ސަރވިސްގެ ކޮމްބައިން ޓީމްގެ އިތުރުން އިންޓެގްރޭޓެޑް ހެޑްކުއޯޓާރޒްގެ ޓީމެވެ.

މިރަސްމިއްޔާތުގައި މުބާރާތަށް ތައްޔާރުކޮށްފައިވާ ތީމް ލަވައެއް ވަނީ ހުށަހަޅައިދީފައެވެ. މީގެ އިތުރުން ހަވާ އެރުވުމުގެ ހަރަކާތްތަކާއެކު މުބާރާތުގެ ދެ ޑިވިޝަންގެ ތަށި ދަނޑަށް ގެނެސްފައިވަނީ އެމްއެންޑީއެފް ޑްރިލް ވިންގުންނެވެ. މި މުބާރާތުގެ ތައްޓަކީ އެމްއެންޑީއެފް އިލެކްޓްރިކަލް އެންޑް މެކޭނިކަލް އިންޖިނިއާޒްގެ ހުނަރުވެރި ސިފައިން ތައްޔާރުކޮށްފައިވާ ތައްޓެކެވެ.