ސުޕްރީމް ކޯޓުން އުފާވެރި ޙަބަރުތަކެއް ލިބޭނެ ކަމަށް ރައްޔިތުން އުންމީދުކުރޭ: މެމްބަރު ޝާހު
ކުރާ އުންމީދު ވެސް ކަނޑުއްވާ ނުލާ ކަމަށް ވެސް ވިދާޅުވި
މަޖިލީހުގެ ގޮނޑި ގެއްލިފައިވާ ކަމަށް ބުނާ ފުވައްމުލަކު އުތުރު ދާއިރާގެ މެމްބަރު އަލީ ޝާހު
އަދުލު އިންސާފު ގާއިމުކުރުމުގެ އެންމެ މަތީ ފަރާތް، ސުޕްރީމް ކޯޓާމެދު ކުރާ އުންމީދު ކަނޑުއްވާނުލައްވާ ކަމަށާއި ސުޕްރީމް ކޯޓުން އުފާވެރި ޚަބަރުތަކެއް ލިބޭނެ ކަމަށް ރައްޔިތުން އުންމީދުކުރާ ކަމަށް ރައްޔިތުންގެ މަޖިލީގުގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ބުނާ ފުވައްމުލަކު އުތުރު ދާއިރާގެ މެމްބަރު އަލީ ޝާހު ވިދާޅުވެއްޖެއެވެ.
އާދީއްތަ ދުވަހު ސުޕްރީމް ކޯޓަށް ވަޑައިގެންނެވުމަށް ފަހު، އެތަނުން ނުކުމެވަޑައިގެން މީޑިއާ އަށް މައުލޫމާތު ދެއްވަމުން މެމްބަރު ޝާހު ވިދާޅުވީ ގުޅިފައިވާ ޕާޓީތަކުން ކުރަމުންދާ މަސައްކަތް މަދު ދުވަސްކޮޅެއްގެ ތެރޭގައި ކާމިޔާބުވާނެ ކަމަށް އުންމީދު ކުރައްވާ ކަމަށެވެ. ސުޕްރީމް ކޯޓުން އުފާވެރި ޚަބަރުތަކެއް ލިބިގެންދާނީ ޒިންމާދާރުކަމާއެކު އެ ކޯޓުން ނިންމާ ކަންތައްތަކުގެ ސަބަބުން ކަަމަށް ޝާހު ވިދާޅުވިއެވެ.
"އަދިވެސް ރައްޔިތުން އުންމީދު ކުރޭ ހެޔޮ އުފާވެރި ހަބަރުތަކެއް [ސުޕްރީމް ކޯޓު] އިން ޒިންދާރު ކަމާއެކު، ލިބިގެންދާނެ ކަމަށް. އެހެންވީމަ އަޅުގަނޑުމެން މިކުރާ މަސައްކަތަކީ އަޅުގަނޑުމެން ކާމިޔާބީއާ ހަމައަށް ދިއުމަށް ކުރާ މަސައްކަތް އިރާދަ ކުރެއްވިއްޔާ ތި ހުރިހާ ރައްޔިތުންނަށް ވެސް މަދު ދުވަސްކޮޅެއްގެ ތެރޭގައި އަޅުގަނޑުމެން އުންމީދު ކުރަނީ. އަޅުގަނޑުމެންގެ ދުއާއަކީ ވެސް އެއީ،" ޕީޕީއެމްގެ ޓިކެޓުގައި ވާދަކުރައްވައި، ރައްޔިތުންގެ މަޖިލީހުގެ ފުވައްމުލަކު އުތުރު ދާއިރާގެ ގޮނޑި ކާމިޔާބު ކުރެއްވި ޝާހު ވިދާޅުވިއެވެ.
ރައްޔިތުންގެ މަޖިލީހުގެ 12 މެމްބަރެއްގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ބުނާ މައްސަލާގައި ގޮތެއް ނިންމަވައި ދެއްވުމަށް އެދި މި މަހުގެ 14 ވަނަ ދުވަހުން ފެށިގެން އިދިކޮޅު މަޖިލިސް މެމްބަރުން ގެންދަވަނީ ސުޕްރީމް ކޯޓަށް ވަޑައިގަންނަވަމުންނެވެ. އާދީއްތަ ދުވަހަކީ އެ ބޭފުޅުން ސުޕްރީމް ކޯޓަށް ވަޑައިގެންނެވި 11 ވަނަ ދުވަހެވެ.
އުއްތަމަ ފަނޑިޔާރު އަބްދުﷲ ސައީދު ހިމެނިވަޑައިގަންނަވާ ގޮތަށް އެ ކޯޓުގެ ފަސް ފަނޑިޔާރުންނާ ބައްދަލު ކުރެއްވުމަށް އެބޭފުޅުން ހުށަހެޅުއްވި ނަމަވެސް، މިހާތަނަކަށް އެ ކޯޓުން އެކަމަށް ޖަވާބެއް ދީފައެއްނުވެއެވެ. ސުޕްރީމް ކޯޓުގެ ފަނޑިޔާރުންނާ ބައްދަލު ކުރައްވައި ޖަވާބު ހޯދަން މަޖިލިސް މެމްބަރުން ބޭނުންފުޅު ވަނީ 12 މެމްބަރުންގެ ގޮނޑީގެ ސައްހަ ކަމާމެދުގައެވެ.
ސުޕްރީމް ކޯޓަށް ވަޑައިގެންނެވި މަޖިލިސް މެމްބަރުން، އެތަނުގެ ތެރޭގައި ދެ ގަޑިއެއްހާއިރު މަޑުކުރެއްވިއެވެ. އެބޭފުޅުން ސުޕްރީމް ކޯޓުން ނުކުމެވަޑައިގެންނެވީ ސަރުކާރުގެ ރަސްމީ ގަޑި ނިމުމާއެކު، އެތަނުން ނުކުމެވަޑައިގަތުމަށް ސުޕްރީމް ކޯޓުގެ މުވައްޒަފުން އެންގެވުމުންނެވެ.
