ޖަރުމަނު ބުންޑެސްލީގާގައި ހޮފެންހައިމްއާ ދެކޮޅަށް ކުޅުނު މެޗު ފަހަތުން އަރައި ކާމިޔާބުކޮށް ބަޔާން މިއުނިކްއިން ތާވަލުގެ ކުރީގައި ހަމަޖެހިލައިފިއެވެ.
އަމިއްލަ ދަނޑުގައި ހޮފެންހައިމްއާ ދެކޮޅަށް ކުޅުނު މެޗުން ބަޔާން މޮޅުވީ 5-2 ގެ ނަތީޖާއަކުންނެވެ. މި މެޗާއި ކުރިމަތިލިއިރު ޖޫލިއަން ނަގެލްސްމަންގެ އިރުޝާދުގެ ދަށުން ބަޔާންއާ ދެކޮޅަށް ކުޅުނު އެއްވެސް މެޗަކުން ހޮފެންހައިމް ބަލިވެފައެއް ނުވެއެވެ. ހަމައެހެންމެ މި މެޗުގެ ހާއްސަކަން ބޮޑުވެގެންދިޔައީ މި މެޗަކީ ބުންޑެސްލީގާގެ ޓީމުތަކަށް އިރުޝާދު ދޭ ކޯޗުންގެ ތެރެއިން އެންމެ ޒުވާން ކޯޗު އަދި އެންމެ އުމުރުން ދުވަސްވީ ކޯޗުގެ ކުރިމަތިލުމަކަށް ވެގެން ދިޔައީތީއެވެ.
އެލަޔަންޒް އެރީނާގައި ތިބި ބަޔާންގެ ހުރިހާ ސަޕޯޓަރުންގެ އަޑު އެއްކޮށް ކެނޑިގެންދިޔައީ މެޗުގެ 3 ވަނަ މިނެޓުގައި ހޮފެންހައިމްއަށް ލިބުނު ޕެނަލްޓީއާއެކުއެވެ. މި ޕެނަލްޓީ ބަޔާންގެ ކީޕަރު މަތަކުރިއިރު ރީބައުންސްގައި މާކް އުތް ވަނީ ބޯޅަ ގޯލުގެ ތެރެއަށް ފޮނުވާލައިގެން އެ ޓީމަށް ލީޑު ނަގައިދީފައެވެ. ހޮފެންހައިމްގެ ދެވަނަ ލަނޑު މެޗުގެ 12 ވަނަ މިނެޓުގައި ކާމިޔާބު ކޮށްދިނީ ސާޖް ގްނެބްރީއެވެ. މި ލަނޑަށް ފަހު ބަޔާންއިން އެ ޓީމުގެ ކުޅުން ރަނގަޅުކުރިއިރު ރޮބާޓް ލެވަންޑޯސްކީ ވަނީ 21 ވަނަ މިނެޓުގައި އެ ޓީމަށް ނަތީޖާގެ ފަރަގު ކުޑަ ކޮށްދީފައެވެ. ހަމައެހެންމެ އޭގެ ހަތަރު މިނެޓު ފަހުން ޖެރޯމް ބޯޓެންގް ވަނީ ލަނޑެއް ޖަހައިދީ ނަތީޖާ ހަމަހަމަ ކޮށްދީފައެވެ.
ދެ ޓީމު އެއްވަރުވެއޮވެ ފުރަތަމަ ހާފު ނިމިގެންދިޔައިރު ބަޔާންއިން ވަނީ ދެވަނަ ހާފުގައި މޮޅު ކުޅުމެއް ދައްކާފައެވެ. މެޗުގެ 63 ވަނަ މިނެޓުގައި ކިންގްސްލީ ކޯމަން އެ ޓީމަށް ލީޑު ނަގައިދިން އިރު އޭގެ ތިން މިނެޓު ފަހުން އަރުތޫރޯ ވިދާލް ވަނީ އެ ޓީމުގެ ލީޑު ފުޅާކޮށްދީފައެވެ. ބަޔާންގެ ފަސްވަނަ ލަނޑު މެޗުގެ އެންމެ ފަހު މިނެޓުގައި އެ ޓީމަށް ޖަހައިދިނީ މި ފިނި މޫސުމުގެ ޓްރާންސްފާ މާކެޓުގައި ހޮފެންހައިމް ދޫކޮށް އެ ޓީމާއި ގުޅުނު ފޯވާޑް ސެންޑްރޯ ވެގްނާއެވެ.
How the table stacks up after Saturday's action pic.twitter.com/f2uaTqT0me
— Bundesliga English (@Bundesliga_EN) January 27, 2018
ބުންޑެސްލީގާގައި ކުޅުނު އެހެން މެޗުތަކަށް ބަލާލާއިރު ބޮރޫޝިއާ ޑޯޓްމަންޑް އާއި ފްރެއިބާގް ބައްދަލު ކުރި މެޗު ނިމުނީ 2-2 އިން އެއްވަރުވެގެންނެވެ. މި މެޗުގައި ފްރެއިބާގްއިން ޖެހި ދެ ލަނޑު ވެސް ނިލްސް ޕެޓާސަން ޖަހައިދިންއިރު ޑޯޓްމަންޑްގެ ލަނޑުތައް އެ ޓީމަށް ޖަހައިދިނީ ޝިންޖީ ކަގަވާ އަދި ޖެރެމީ ޓޮލްޔާންއެވެ. ރަށުން ބޭރުގައި ސްޓުޓްގާޓް ބަލިކޮށް ޝާލްކޭ ވެސް ވަނީ ތާވަލުގެ ދެވަނައަށް ޖެހިލާފައެވެ. އެ ޓީމުގެ ލަނޑުތައް ޖަހައިދިނީ ނާލްޑޯ އަދި އެމީން ހެރިޓްއެވެ.
ހަމައެހެންމެ އާރްބީ ލީޕްޒީގް އާއި ހެމްބާގް ކުޅުނު މެޗު 1-1 އިން އެއްވަރުވެ އެ ޓީމު ވަނީ ހަތަރު ވަނައަށް ވެއްޓިފައެވެ. މި މެޗުގައި ލީޕްޒީގްގެ ލަނޑު ބުރްމާ ޖަހައިދިންއިރު ހެމްބާގްގެ ލަނޑު ޖަހައިދިނީ ފިލިޕް ކޮސްޓިކްއެވެ. އޮގްސްބާގް އާއި އެފްސީ ކޮލޯން ކުޅުނު މެޗު ވެސް މި ނަތީޖާއިން ނިމުނުއިރު ވާޑާ ބްރޭމެން އަދި ހާތާ ބާލިން ކުޅުނު މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ.
ބުންޑެސްލީގާގެ ޕޮއިންޓް ތާވަލަށް ބަލާލާއިރު އެއްވަނައިގައި 50 ޕޮއިންޓާއެކު އޮތީ ބަޔާން މިއުނިކެވެ. ދެވަނައިގައި 34 ޕޮއިންޓާއެކު ޝާލްކޭ އޮތްއިރު ތިންވަނައިގައި 33 ޕޮއިންޓާއެކު އޮތީ އެއިންޓްރަކްޓް ފްރެންކްފާޓްއެވެ. ހަމައެހެންމެ 32 ޕޮއިންޓާއެކު ހަތަރު ވަނަ ލިބެނީ ލީޕްޒީގްއަށެވެ.
