ފަލަސްތީނުގެ އެކްޓިވިސްޓް އަހަދު ތަމީމީ މިނިވަންވެއްޖެ
29 ޖުލައި 2018 | އާދީއްތަ 06:12އަހަދުގެ މައްޗަށް 12 ދައުވާއެއް އުފުލި
އަހަދު ހައްޔަރުކުރިއިރު އޭނާގެ އުމުރަކީ 16 އަހަރު
އިސްރާއީލުން ފޭރިގެންފައިވާ ފަލަސްތީނުގެ ހުޅަނގު އައްސޭރިގެ ސަރަހައްދުގައި އިސްރާއީލުގެ ސިފައިންގެ މީހެއްގެ ގައިގައި ޖެހިކަމަށްބުނެ އަސްކަރީ ކޯޓުން ހުކުމްކޮށް ޖަލަށްލާފައި ހުރި ފަލަސްތީނުގެ އެކްޓިވިސްޓް އަހަދު ތަމީމީ އަށް މަސްދުވަހަށްފަހު އާދީއްތަ ދުވަހު މިނިވަންކޮށްފިއެވެ.
ނަބީ ސާލިހްގައި ހުންނަ ތަމީމީގެ ގޭގެ ބޭރުގައި ހިނގި މި ހާދިސާގެ ވީޑިއޯ މިދިޔަ އަހަރުވަނީ ވައިރަލްވެފައެވެ.
ރިޕޯޓްތައް ބުނާ ގޮތުގައި އަހަދު ހައްޔަރުކުރީ، އަހަދުގެ އަވަށަށް ވަދެގަނެގެން އުޅުނު އިސްރާއީލު ސިފައިންގެ ދެ މީހެއްގެ މޫނުމަތީގައި އަހަދު ޖަހާތަން ފެންނަ ވީޑީއޯއެއް ސޯޝަލް މީޑިއާގައި އާންމުވުމާ ގުޅިގެންނެވެ.
މިހާރު އުމުރުން 17 އަހަރުގެ އަހަދު ހައްޔަރުކޮށްފައި ވަނީ މިދިޔަ ޑިސެމްބަރު މަހު، އެއް ރެއެއްގެ ދަންވަރު އިސްރާއީލް ސިފައިން އޭނާގެ ގެއަށް ވަދެއެވެ.
އިސްރާއީލުގެ މިލިޓަރީ ކޯޓް އަފަރ އިން މާޗު މަހު އަހަދަށް ހުކުމް ކޮށްފައިވާއިރު އަހަދުގެ ބަންދަކީ ބައިނަލްއަޤްވާމީ މުޖުތަމައުގެ ސަމާލުކަން ލިބިފައިވާ މައްސަލައެކެވެ.
އަހަދުގެ ޖަލުބަންދުގެ މުއްދަތު ގުނާފައިވަނީ ހުކުމް ކުރުމުގެ ކުރިން އޭނާ ޖަލަށްލެވިފައި ހުރި މުއްދަތު ވެސް ހިމަނައިގެންނެވެ. ޖަލު ހުކުމުގެ އިތުރުން 1،500 އެމެރިކާ ޑޮލަރުގެ ޖޫރިމަނާއެއް ވެސް އޭނާ ދައްކަން ޖެހޭނެއެވެ.
އަހަދުގެ މައްޗަށް އެންމެ ފުރަތަމަ 12 ދައުވާއެއް ކުރެވުނުއިރު ހަތަރު ދައުވާއަކަށް އެއްބަސްވެ އަށް މަސްދުވަހުގެ ޖަލު ހުކުމެއް ތަންފީޒު ކުރާ ގޮތަށް ދެން ހުރި ދައުވާތައް ނުއުފުލާ ގޮތަށް އިސްރާއީލު އަސްކަރިއްޔާގެ ޕްރޮސިކިއުޓަރުން ހުށަހެޅި ހުށަހެޅުން އޭނާ ވަނީ ގަބޫލުކޮށްފައެވެ.
މާރާމާރީ ހިންގުމާއި، މާރާމާރީއަށް ހިތްވަރު ދިނުމާއި، އޮއްގައު އުކުމުގެ ކުށުގެ ދައުވާ ހިމެނޭ ގޮތުން އަހަދުގެ މައްޗަށް 12 ދައުވާއެއް އުފުލިއިރު އޭނާގެ އުމުރަކީ 16 އަހަރެވެ.
