ޒައިނަބު މަރުގެ މައްސަލައިގައި ހައްުޔަރު ކުރި މީހާ ކޯޓަށް ހާޒިރު ކުރަނީ
24 ޖެނުއަރީ 2018 | ބުދަ 12:33ޒައިނަބުގެ މަރުގެ މައްސަލާގައި ހައްޔަރު ކުރި މީހާ ވަނީ ޒައިނަބު މަރާލާ ރޭޕްކުރުމުގައި ބައިވެރިވިކަމަށް އެއްބަސްވެފައި
ރަހުމްކުޑަގޮތަކަށް މަރާލި ޒައިނަބު އަންސާރީ
ޕާކިސްތާނުގެ ޕަންޖާބް ޕްރޮވިންސްގައި ހަތް އަހަރުގެ އަންހެން ކުއްޖަކު ރޭޕްކޮށް މަރާލުމުގައި ބައިވެރިވި ކަމަށް ތުހުމަތު ކުރެވޭ އެންމެ އިސް މީހާ މުހަންމަދު އިމްރާން، ބުދަ ދުވަހު ވެރިރަށް ލާހޫރޫގެ "ސްޕެޝަލް އެންޓި ޓެރަރިޒަމް ކޯޓަށް" ހާޒިރު ކުރާނެ ކަމަށް ރިޕޯޓުތައް ބުނެފިއެވެ.
ޒައިނަބު އަންސާރީ މަރުވެފައިވާ އޮއްވާ ފެނުނީ އޭނާ ގެއްލިގެން ހޯދާތާ ދުވަސްތަކެއް ފަހުން ޖެނުއަރީ 9 ވަނަ ދުވަހު ކުނިގޮނޑަކަށް އެއްލާލާފައި އޮއްވައެވެ.
ޒައިނަބުގެ އޯޓޮޕްސީން ހާމަވެގެން ދިޔައީ އޭނާ މަރާލައިފައި ވަނީ ރޭޕްކޮށް އަދި ނޭވާހާސްކޮށްލައިގެން ކަމެވެ.
ޕަންޖާބުގެ ޗީފް މިނިސްޓަރު ޝެހްބާޒް ޝަރީފު އަންގާރަ ދުވަހު ބޭއްވި ނޫސްވެރިންގެ ބައްދަލުކުރެއްވުމެއްގައި ވިދާޅުވީ "ޒައިނަބު މަރާލި މީހާ ހައްޔަރުކޮށްފި ކަމަށާއި އޭނާގެ ނަމަކީ މުހަންމަދު އިމްރާން ކަމަށެވެ. އަދި އޭނާ އަކީ ޒައިނަބު ދިރިއުޅެމުން ދިޔަ ކަސޫރު ސިޓީއަށް ނިސްބަތްވާ، 24 އަހަރުގެ މީހެއް ކަމަށެވެ. ޝެހެބާޒް ވިދާޅުވީ ޒައިނަބު ގެ ގާތިލު ހައްޔަރު ކުރެވުނީ ދައުލަތުގެ މުއައްސަސާތަކުގެ ވަރަށް ބުރަ މަސައްކަތާއެކު ކަމަށެވެ.
ޕަންޖާބުގެ ޗީފް މިނިސްޓަރު ބޭއްވި ނޫސްވެރިންގެ ބައްދަލުވުމުގައި ޒައިނަބުގެ ބައްޕަ ވެސް ބައިވެރިވިއެވެ. އެގޮތުން ޒައިނަބުގެ ބައްޕަ އަމީން އަންސާރު ވިދާޅުވީ ޕާކިސްތާނުގެ ސަރުކާރުން ޒައިނަބުގެ މަރުގެ މައްސަލަ ގެންދާގޮތާ ދޭތެރޭ ވަރަށް ހިތްހަމަ ޖެހޭ ކަމަށެވެ.
ޒައިނަބުގެ މަރާ ގުޅިގެން ޒައިނަބު ދިރިއުޅެމުން ދިޔަ ކަސޫރު ސިޓީގައި ޕާކިސްތާނުގެ ސަރުކާރާ ދެކޮޅަށް މުޒާހަރާތައް ވެސް ކުރިއެވެ. އަދި އެ މުޒާހަރާތަކުގައި މަދުވެގެން ދެ މީހުން މަރުވެ އެތައް ބަޔަކު ޒަޚަމްވިއެވެ. ކަސޫރު ސިޓީގައި ޒައިނަބުގެ މަރުގެ ހާދިސާ ފަދަ 11 ހާދިސާއެއް ފާއިތުވެދިޔަ އަހަރެއްހާ ދުވަހުގެ ތެރޭގައި ހިނގާފައިވެއެވެ.
