އާސެނަލް އަށް ކުޅޭ ޗިލީގެ ފޯވާޑް އެލެކްސިސް ސަންޗޭޒް ބަދަލުވުން އެންމެ ގާތީ ވާދަވެރި މެންޗެސްޓަރ ޔުނައިޓެޑަށް ކަމަށް އާސެނަލްގެ ކޯޗު އާސެން ވެންގާ ބުނެފިއެވެ.

ސަންޗޭޒް (29އ) އާސެނަލްއާ އެކު ހަދާފައިވާ އެއްބަސްވުން އަންނަ ޖޫން މަހުގެ ނިޔަލަށް ހަމަވާއިރު، ސަންޗޭޒް އާއި ޔުނައިޓެޑާ ދެމެދު އެއްބަސްވުމަކަށް އާދެވިފައިވާ ކަމަށް ރިޕޯޓްތައް ބުނެއެވެ.

އާސެނަލްގެ ކޯޗު ވެންގާ ބުނީ، އޭނާ ޓްރާންސްފަރގެ ކަންކަމުގައި ހަރަކާތްތެރިވާތާ 30 އަހަރު ވެފައިވާ ކަމަށާއި ސަންޗޭޒް ޔުނައިޓެޑަށް ބަދަލުވުމަކީ ވެދާނެ ކަމެއް ކަމަށާއި އެހެންނަމަވެސް ކޮންމެ ވަގުތެއްގައި ވެސް އެކަން ހުއްޓިދާނެ ކަމަށެވެ.

ވެންގާ ބުނީ، ރޮނގުމަތީގައި ހުރިހާ ހިނދަކު، އެއީ ނުވާ ކަމެއްގެ ގޮތުގައި ބަލަންޖެހޭ ކަމަށާއި، ޓްރާންސްފަރގެ ކަންކަމަކީ އެންމެ ފަހު ވަގުތާ ޖެހެންދެން ވެސް ޔަގީންކަން ދެވޭނެ ކަންކަމެއް ނޫން ކަމަށެވެ.

ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަމުން ވެންގާ ބުނީ، ސަންޗޭޒްގެ ޓްރާންސްފަރގެ ކަންކަން ހަމަނުޖެހިއްޖެ ނަމަ، ހޮނިހިރު ދުވަހު ކްރިސްޓަލް ޕެލަސްއާ ދެކޮޅަށް ކުޅޭ މެޗުގައި ސަންޗޭޒް ފެނިގެންދާނެ ކަމަށެވެ.

ވެންގާ ބުނީ ސަންޗޭޒްގެ އެޓިޓިއުޑާ މެދު އޭނާގެ މައްސަލައެއް ނެތް ކަމަށާއި، ބުދަ ދުވަހު ބޭއްވި އާސެނަލްގެ ފަރިތަކުރުންތަކުގައި ވެސް ސަންޗޭޒް ފުރިހަމަ އަށް ބައިވެރިވެފައިވާ ކަމަށެވެ. އަދި ސަންޗޭޒްގެ އުމުރުން 29 އަހަރު ވެފައިވާއިރު، ކުރިއަށް އޮތް ކޮންޓްރެކްޓަކީ އޭނާ އަށް ވަރަށް މުހިންމު ކޮންޓްރެކްޓެއް ކަމަށް ވެންގާ ބުންޏެވެ.

މީގެ އިތުރުން ވެންގާ ވަނީ ސަންޗޭޒް ޔުނައިޓެޑަށް ވިއްކާލުމުގެ ޑީލްގައި ޔުނައިޓެޑްގެ މިޑްފީލްޑަރ ހެންރިކް މިޚިތަރްޔަން އެކްލަބަށް ގެނައުމަށް އާސެނަލް އިން ބޭނުންވާ ކަމަށް ބުނާ ރިޕޯޓްތަކަށް ބާރުދޭ މޭރުމަކުން ވާހަކަ ދައްކާފައެވެ.

ވެންގާ ބުނީ މިޚިތަރްޔަންއަކީ އޭނާ އަށް ކަމުދާ ކުޅުންތެރިޔެއް ކަމަށެވެ. އަދި ޖަރުމަނުގެ ބޮރޫޝިއާ ޑޯޓްމުންޑަށް ކުޅުނު ދުވަސްވަރު އާސެނަލްއާ ދެކޮޅަށް ގިނަ މެޗުތަކެއް ކުޅެފައިވާ ކަމަށާއި، އާސެނަލްގެ ކުޅުމުގެ ފެންވަރަށް މިޚިތަރްޔަން ތައުރީފް ކޮށްފައިވާ ކަމަށެވެ. މީގެ އިތުރުން އޭނާ އާސެނަލް އަށް ގެނައުމުގައި މުސާރައަކީ މައްސަލައަކަށް ނުވާނޭ ކަމަށް ވެންގާ ބުންޏެވެ. 

އަރްމީނިއާގެ 28 އަހަރުގެ ފޯވާޑް އެހެން ކްލަބަކަށް ބަދަލުވުމާ މެދު އެއްބަސްވުމަކަށް އާދެވިފައިނުވި ނަމަވެސް، އިނގިރޭސި ޕްރިމިއަރ ލީގުގައި ސްޓޯކް ސިޓީގެ މައްޗަށް ހޯމަ ދުވަހު ޔުނައިޓެޑް ކުރި ހޯދި މެޗަށް ނެގި ސްކޮޑުން އޭނާ ވަނީ ބާކީކޮށްފައެވެ. އަދި އެނިންމުމަކީ ޓެކްޓިކަލް ނިންމުމެއް ނޫން ކަން ޔުނައިޓެޑްގެ ކޯޗު ހޯސޭ މޮރީނިއޯ ކަށަވަރު ކޮށްދީފައިވެއެވެ.

އާސެނަލް އިން މިދިޔަ ބުދަ ދުވަހު ވަނީ އެކްލަބަށް ކުޅުނު އިނގިރޭސި ފޯވާޑް ތިއޯ ވޮލްކޮޓް، އެވަޓަން އަށް ވިއްކާލާފައެވެ.

މީގެ އިތުރުން އާސެނަލްގެ ސްކޮޑް ވަރުގަދަ ކުރުމަށް ބޮރޫޝިއާ ޑޯޓްމުންޑްގެ ފޯވާޑް ޕިއޭ އެމެރިކް އޮބަމެޔަންގ އަދި ބޯޑޯގެ ފޯވާޑް މަލްކޮމް ގެނައުމަށް މަސައްކަތް ކުރަމުންދާ ކަމަށް ރިޕޯޓްތައް ބުނެއެވެ.