މިސްރުގެ ބާރުގަދަ ޖާސޫސީ އިދާރާގެ ވެރިޔާ، ޖެނެރަލް ޚާލިދު ފައުޒީ އެމަގާމުން ވަކި ކުރައްވައިފިއެވެ.

މިސްރުގެ ދައުލަތުގެ މީޑިއާ އިން ބުނީ، ޖާސޫސީ އިދާރާގެ ވެރިޔާގެ މަގާމުން ފައުޒީ ވަކި ކުރެއްވުމަށް ރައީސް އަބްދުލް ފައްތާހް އަލް ސިސީ ބުރާސްފަތި ދުވަހު ނިންމަވާފައިވާ ކަމަށެވެ. އަދި ފައުޒީގެ ބަދަލުގައި ސިސީގެ ޗީފް އޮފް ސްޓާފް އަދި އަރިސް ބޭފުޅެއް ކަމަށްވާ ޖެނެރަލް އައްބާސް ކާމިލް، ޖާސޫސީ އިދާރާގެ ވެރިޔަކަށް ވަގުތީ ގޮތުން ހަމަޖައްސާފައިވާ ކަމަށް މިސްރުގެ ދައުލަތުގެ މީޑިއާ އިން ރިޕޯޓްކުރެއެވެ.

މިސްރުގެ ރިޔާސީ އިންތިޚާބު އަންނަ މާޗް މަހު ބޭއްވުމަށް ނިންމާފައިވާއިރު، ޖާސޫސީ އިދާރާގެ އިސް ވެރިޔާގެ މަގާމުން ފައުޒީ ވަކިކުރެއްވި ސަބަބެއް ހާމަކޮށްފައެއް ނުވެއެވެ.

މިސްރުގައި 2014 ވަނަ އަހަރުން ފެށިގެން ގޮށް މުށުގެ ބާރުން ވެރިކަން ކުރައްވަމުން ގެންދަވާ ސިސީ، ކުރިއަށް އޮތް ރިޔާސީ އިންތިޚާބުގައި ވާދަކުރައްވާނެކަން ރަސްމީކޮށް އިއުލާން ކުރައްވާފައެއް ނުވެއެވެ. އެހެންނަމަވެސް މިއިންތިޚާބުގައި ވާދަކުރައްވާ، ސިސީ އިންތިޚާބު ކާމިޔާބު ކުރައްވާނެ ކަމަށް ވަރަށް ބޮޑަށް ބެލެވެއެވެ.

އަސްކަރިއްޔާގެ ކުރީގެ ވެރިޔާގެ މަގާމުގައި ހުންނެވި ސިސީ މިސްރުގެ ވެރިކަމާ ހަވާލުވެވަޑައިގެންނެވީ، ޑިމޮކްރެޓިކް އުސޫލުން އެގައުމުގައި އިންތިޚާބު ކުރި ފުރަތަމަ ރައީސް މުޙައްމަދު މުރްސީގެ މުސްލިމް ބްރަދަހުޑް ޕާޓީގެ ވެރިކަމުގެ ފުރަތަމަ އަހަރުގެ ތެރޭގައި އެގައުމުގައި ކުރި ބޮޑެތި މުޒާހަރާތަކަށް ފަހު ގެނައި އަސްކަރީ ބަޣާވާތަކަށް ފަހުގައެވެ. މުރްސީގެ ވެރިކަން ވައްޓާލުމަށް ފަހު ވަގުތީ ގޮތުން އަސްކަރިއްޔާ އިން އެގައުމުގައި ހިންގި ވެރިކަމަށް ފަހު، 2014 ވަނަ އަހަރު ބޭއްވި ރިޔާސީ އިންތިޚާބު ކާމިޔާބު ކުރެއްވީ ސިސީއެވެ.

ސިސީ ވެރިކަމަށް ވަޑައިގެންނެވި ފަހުން މިސްރުގެ ސަލާމަތީ ބާރުތަކަށް އަމާޒުކޮށް ހަނގުރާމަވެރިންގެ ގިނަ ހަމަލާތަކެއް ދީފައިވެއެވެ. ހާއްސަ ގޮތެއްގައި މިސްރުގެ އުތުރު ސައިނާގައި ހަރަކާތްތެރިވާ އިސްލާމިކް ސްޓޭޓްގެ ހަނގުރާމަވެރިން، މިސްރުގެ ސަލާމަތީ ފައުޖުތަކަށް އަމާޒުކޮށް ގިނަ ހަމަލާތަކެއް ދީފައިވެއެވެ. އެހަމަލާތަކުގައި މިސްރުގެ ސަލާމަތީ ފައުޖުތަކަށް ނިސްބަތްވާ ގިނަ އަދަދެއްގެ ސިފައިންނާއި ފުލުހުން ވަނީ މަރުވެފައެވެ.

މިހަމަލާތަކާއި ގުޅިގެން ދޭތެރެދޭތެރެއިން މިސްރުގެ ސަލާމަތީ ފައުޖުތަކުގެ އިސް ފަރާތްތައް ބަދަލުކޮށްފައި ވެއެވެ. އެގޮތުން މިދިޔަ އަހަރުގެ އޮކްޓޯބަރު މަހު ސިސީ ވަނީ އެގައުމުގެ އަސްކަރިއްޔާ އަށް އާ ޗީފް އޮފް ސްޓާފެއް ކަނޑައަޅައި، ސިފައިންގެ އިސް ވެރިންތަކެއް ބަދަލުކޮށްފައެވެ. އެބަދަލު ގެނެސްފައި ވަނީ މިސްރުގެ ވެރިރަށް ޤާހިރާގެ ހުޅަނގުދެކުނުން 200 ކިލޯމީޓަރު ދުރުގައިވާ ހުޅަނގުގެ ސަހަރާގައި ދިން ހަމަލާއެއްގައި ފުލުހުން 16 އޮފިސަރަކު މަރުވުމާ ގުޅިގެންނެވެ.

މިސްރުގެ ޖާސޫސީ އިދާރާގެ އިސްވެރިޔާގެ މަގާމުން ވަކި ކުރެއްވި ފައުޒީއެކޭ އެއްފަދައިން، އެމަގާމަށް ވަގުތީ ގޮތުން އައްޔަން ކުރެއްވި ކާލިމްއަކީ ވެސް އާއްމުންގެ ތެރެއަށް މާގިނަ އިން ނިކުމެވަޑައިގަންނަވާ ބޭފުޅެއް ނޫނެވެ.

ސިސީގެ ހުރިހާ ސިއްރުތަކެއް އެނގިވަޑައިގަންނަވާ ބޭފުޅާގެ ގޮތުގައި މީޑިއާ އިން ސިފަކުރާ ކާމިލްއަކީ 2010 ވަނަ އަހަރުގެ ފަހުން ސިސީގެ ޗީފް އޮފް ސްޓާފެވެ. އެންމެ ފުރަތަމަ އަސްކަރިއްޔާގެ ޖާސޫސީ ވެރިޔާގެ މަގާމުގައި ސިސީ ހުންނެވި ދުވަސްވަރުން ފެށިގެން، މިސްރުގެ ދިފާއީ ވަޒީރު އަދި މިސްރުގެ ރައީސްގެ މަގާމަށް ވަޑައިގަތުމަށް ފަހު ވެސް ސިސީގެ ޗީފް އޮފް ސްޓާފަކީ ކާމިލްއެވެ.