ވޯގްގެ ކަވަރގައި ހިމެނުނު އެންމެ ހަގު ތަރިއަކަށް ސެރީނާ ވިލިއަމްސްގެ ތިން މަހުގެ އޮލިމްޕިއާ އޮހާނިއަން

ދުނިޔޭގެ މަޝްހޫރު މަޖައްލާއެއް ކަމަށްވާ "ވޯގް"ގެ ކަވަރގައި ފީޗަރ ކުރެވުނު އެންމެ ހަގު ފަރާތަކަށް އެލްކްސިސް އޮލިމްޕިއާ އޮހާނިއަން ޖރ. ވެއްޖެއެވެ.

އޮލިމްޕިއާއަކީ އެމެރިކާގެ ޓެނިސް ކުޅުންތެރިޔާ ސެރީނާ ވިލިއަމްސް، 36، އާއި ފިރިމީހާ، މަޝްހޫރު ސައިޓް ރެޑިޓްގެ އެއް ބާނީ، އެލްކްސިސް އޮހާނިއަން، 34، ގެ އަންހެން ދަރިފުޅެވެ. ވޯގްގައި އޭނާގެ ފޮޓޯ ޝާއިއުކުރާ އިރު އުމުރަކީ ތިން މަހެވެ.

ފެބްރުއަރީ މަހުގެ "ވޯގް"ގެ ބޭރުގަނޑުން ފެނިގެންދަނީ އެލެކްސިސް އާއި އޭނާގެ މަންމަ ސެރީނާއެވެ. ސެރީނާގެ ސޯޝަލް މީޑިއާގެ އިތުރުން ތިން މަހުގެ އޮލިމްޕިއާގެ އިންސްޓްގްރާމް އެކައުންޓުން ވެސް މި ކަވަރ މިހާރު ވަނީ ޝެއާކޮށްފައެވެ.

"ވޯގް"ގެ ރޮބް ހެސްކަލްއާ ވާހަކަ ދައްކަމުން ސެރީނާ ވަނީ މަންމައަކަށް ވުމުން "ވަރަށް އުފާވާ" ކަން ފާހަގަކޮށް ބަލިވެއިން އިރާއި އޭގެ ފަހުން ދިމާވި ބައެއް 'ކޮމްޕްލިކޭޝަންތައް" ވެސް އެ މަޖައްލާއާ ހިއްސާކޮށްފައެވެ. ކުރިން ވެސް ހަށިގަނޑުގައި ބްލަޑް ކްލޮޓްތައް އުފެދި ފަރުވާ ހޯދާފައިވާ ސެރީނާ ބުނީ، ބޮޑަށް މައްސަލަ ޖެހެން ފެށީ އޮލިމްޕިއާ ވިހެއުމަށް ހެދި ސިޒޭރިއަނަށް ފަހު ކަމަށެވެ. އަދި އިތުރު އޮޕަރޭޝަންތަކަށް ފަހު ހަ ހަފްތާ ވަންދެން ބެޑް ރެސްޓްގައި އޮންނަން މަޖްބޫރުވިކަން ވެސް ސެރީނާ ކިޔައިދިނެވެ.

މީގެ އިތުރުން، ފްލޮރިޑާގައި ދިރިއުޅެމުން ދިޔަ ސެރީނާގެ މުޅި ދިރިއުޅުން އާއިލާއަށްޓަކައި ވަނީ ބަދަލުކޮށްލާފައވެެ. އޭނާ ވަނީ ފްލޮރިޑާ ދޫކޮށް ސެން ފްރަންސިސްކޯއަށް ބަދަލުވެފައެވެ. ނަމަވެސް ސެރީނާ ބުނީ ޓެނިސް ކުޅުމާ ދުރުވާން ގަސްތުނުކުރާ ކަމަށާއި، އަދިވެސް ހުވަފެނަކީ މިހާރުގެ ގްރޭންޑް ސްލޭމް ރިކޯޑް ބްރޭކް ކުރުން ކަމަށެވެ.

މިިހާރު 23 ގްރޭންޑް ސްލޭމް ކާމިޔާބުކޮށްފައިވާ ސެރީނާ ބޭނުން ވަނީ 25 ގްރޭންޑް ސްލޭމް ކާމިޔާބުކޮށް މިހާރު އެ ރެކޯޑް އޮންނަ އޮސްޓްރޭލިއާގެ ޓެނިސް ލެޖެންޑް މާގަރެޓް ކޯޓްގެ ރެކޯޑް މުގުރާލަންށެވެ. އޭނާގެ ރެކޯޑަކީ 24 އެވެ.