އިނގިރޭސި އެފްއޭ ކަޕްގެ ހަތަރު ވަނަ ބުރުން ޓޮޓެންހަމް ޖާގަ ހޯދިއިރު މި މުބާރަތުގެ މިދިޔަ އަހަރުގެ ޗެމްޕިއަން އާސެނަލް ކަޓައިފިއެވެ.

މި މުބާރާތުގެ ހަތަރުވަނަ ބުރުން ޓޮޓެންހަމް ޖާގަ ހޯދީ އަމިއްލަ ދަނޑުގައި 3-0 ގެ ނަތީޖާއަކުން އޭއެފްސީ ވިމްބެލްޑަން ބަލިކޮށްގެންނެވެ. މި މެޗުގައި ޓޮޓެންހަމްއިން ވަރުގަދަ ފުރަތަމަ އެގާރައެއް ނެރުނުއިރު އެ ޓީމުން ވަނީ މި މެޗުގައި ލަނޑު ޖެހުމަށް ގިނަ ފުރުސަތުތަކެއް ތަނަވަސްކޮށްފައެވެ. ވިމްބެލްޑަންއިން ވެސް ވަނީ ކައުންޓާ އެޓޭކުގައި ލަނޑު ޖެހުމަށް ރަނގަޅު ފުރުސަތުތަކެއް ތަނަވަސްކޮށްފައެވެ.

ފުރަތަމަ ހާފުގައި ދެ ޓީމުގެ ފަރާތުންވެސް އާދައިގެ ކުޅުމެއް ފެނިގެންދިޔައިރު މި ހާފުގައި އެއްވެސް ޓީމަކަށް ލަނޑެއް ޖެހިފައެއް ނުވެއެވެ.

ދެ ޓީމު އެއްވަރުވެއޮވެ ފުރަތަމަ ހާފު ނިމިގެންދިޔައިރު ޓޮޓެންހަމްއިން ވަނީ ދެވަނަ ހާފުގައި އެ ޓީމުގެ ކުޅުން އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން މެޗުގެ 63 ވަނަ މިނެޓޫގައި މޫސާ ސިސޯކޯ ތަނަވަސްކޮށްދިން ފުރުސަތަކުން ހެރީ ކޭން ލަނޑެއް ޖަހައިދީ އެ ޓީމަށް ލީޑު ނަގައިދިނެވެ. އޭގެ ދެ މިނެޓޫ ފަހުން ލަނޑެއް ޖަހައިދީ ކޭން ވަނީ ޓޮޓެންހަމްގެ ލީޑު އިތުރަށް ފުޅާކޮށްދީފައެވެ.

މިއީ 2107 ވަނަ އަހަރު އެންމެ ގިނަ ލަނޑު ޖެހި ކުޅުންތެރިޔާގެ މަގާމު ހޯދި ކޭންގެ ފަރާތުން މިއަހަރު ފެނިގެންދިޔަ ފުރަތަމަ ލަނޑުތަކެވެ. ޓޮޓެންހަމްއަށް ހަތަރު ވަނަ ބުރުގެ ޖާގައެއް ކަށަވަރުވެގެންދިޔައީ މެޗުގެ 71 ވަނަ މިނެޓުގައި ޔާން ވަޓޮންގްހެން އެ ޓީމަށް ޖަހައިދިން ލަނޑުންނެވެ.

މި މުބާރާތް މިދިޔަ އަހަރު ކާމިޔާބުކުރި އާސެނަލް މިފަހަރުގެ މުބާރާތުން ކެޓީ ރަށުން ބޭރުގައި 4-2 ގެ ނަތީޖާއަކުން ނޮޓިންގްހަމް ފޮރެސްޓް އަތުން ބަލިވެގެންނެވެ. ދެ ޓީމުގެ ފަރާތުން ވެސް ވާދަވެރި ބަލާހިތްވާ ޒާތުގެ ކުޅުމެއް ފެނިގެންދިޔަ މި މެޗަށް އާސެނަލްއިން ނުކުތީ ގިނަ ބަދަލުތަކާއެކުއެވެ. އެގޮތުން އެ ޓީމު އެންމެ ފަހުން ކުޅުނު މެޗުގައި ކުޅުނު ނުވަ ކުޅުންތެރިޔަކު މި މެޗުގައި ފެނިގެންގޮސްފައެއް ނުވެއެވެ.

މި މެޗުގެ ފުރަތަމަ ލަނޑު ޖަހާ ލީޑު ނެގީ ނޮޓިންގްހަމް ފޮރެސްޓްއިންނެވެ.  މެޗުގެ 20 ވަނަ މިނެޓުގައި އެ ޓީމަށް ލީޑު ނަގައިދިނީ އެރިކް ލަކާއި އެވެ. އޭގެ ތިން މިނެޓު ފަހުން ޕަރ މާޓެސެކާ އާސެނަލްއަށް ލަނޑެއް ޖަހައިދީ ނަތީޖާ އެއްވަރުކޮށްދިން ނަމަވެސް ލައިކާ ވަނީ ފުރަތަމަ ހާފު ނިމެން މިނެޓަކަށް ވެފައިވަނިކޮށް ލަނޑެއް ޖަހައިދީ ނޮޓިންގްހަމް ފޮރެސްޓަށް އަލުން އަނބުރާ ލީޑު ނަގައިދީފައެވެ.

ދެވަނަ ހާފަށް އާސެނަލްއިން ނުކުމެފައިވަނީ ނަތީޖާ ބަދަލުކޮށްލުމުގެ އުއްމީދުގައެވެ. އެހެން ނަމަވެސް މެޗުގެ 64 ވަނަ މިނެޓުގައި ބެން ބްރެޓޮން ވަނީ ލިބުނު ޕެނަލްޓީއަކުން ލަނޑެއް ޖަހައިދީ ނޮޓިންގްހަމް ފޮރެސްޓްގެ ލީޑު ފުޅާކޮށްދީފައެވެ. މެޗުގެ 79 ވަނަ މިނެޓުގައި ޑެނީ ވެލްބެކް ލަނޑެއް ޖަހައިދީ އާސެނަލްއަށް ހަތަރުވަނަ ބުރުގެ އުއްމީދު އައުކޮށްދިން ނަމަވެސް ކިއެރަން ޑޮވެލް ވަނީ މެޗުގެ 85 ވަނަ މިނެޓުގައި ލަނޑެއް ޖަހައިދީ ނޮޓިންގްހަމް ފޮރެސްޓްއަށް ހަތަރުވަނަ ބުރުގެ ޖާގައެއް ކަށަވަރުކޮށްދީފައެވެ.

އާސެނަލް މިއަހަރުގެ މުބާރާތުން ކަޓާފައިވާއިރު 13 ތައްޓާއެކު މި މުބާރާތުގެ އެންމެ ކާމިޔާބު ޓީމަކީ އެ ޓީމެވެ.