ހަތަރު މަހަށްފަހު ޑެމްބެލޭ އެނބުރި ކުޅުމުގެ ތެރެއަށް

ސްޕެއިންގެ ބާސެލޯނާއަށް ކުޅެމުން އަންނަ ފްރާންސްގެ ޒުވާން ފޯވާޑް އުސްމާން ޑެމްބެލޭ ހަތަރު މަހަށްފަހު ކުޅުމުގެ ތެރެއަށް އެނބުރި އަންނާނެ ކަމަށް އެ ކްލަބުން ބުނެފިއެވެ.

އޭނާ ބާސާއާ ގުޅިފައިވަނީ މިދިޔަ ހޫނު މޫސުމުގެ ޓްރާންސްފާ މާކެޓުގައެވެ. ޖަރުމަނުގެ ބޮރޫޝިއާ ޑޯޓްމަންޑް ދޫކޮށްލުމަށްފަހު އޭނާ ބާސާއާ ގުޅުނީ 105 މިލިއަން ޔޫރޯގެ އެއްބަސްވުމެއްގެ ދަށުންނެވެ. އަދި އެކިއެކި ބޯނަސްގެ ގޮތުގައި ބާސާއިން 42 މިލިއަން ޔޫރޯ ޑޯޓްމަންޑަށް ހުށަހަޅާފައިވެއެވެ. އޭނާގެ ރިލީސް ފީއެއްގެ ގޮތުގައި ބާސާއިން 400 މިލިއަން ޔޫރޯ ކަނޑައަޅާފައިވާއިރު އޭނާއަކީ ދުނިޔޭގެ ދެވަނައަށް އެންމެ އަގުބޮޑު ކުޅުންތެރިޔާއެވެ. އަދި ބާސާގެ ތާރީހުގައި ވެސް އެ ޓީމަށް ގެނައި އެންމެ އަގުބޮޑު ކުޅުންތެރިޔަކީ ޑެމްބެލޭއެވެ.

ޕީއެސްޖީއަށް ބަދަލުވި ނޭމާ ނެތްތަން ފޫބެއްދުމުގެ ގޮތުން ގެނައި ޑެމްބެލޭއަށް އަނިޔާވީ މިދިޔަ އަހަރުގެ ސެޕްޓެމްބަރު މަހުގެ ތެރޭގައި 2-1 ގެ ނަތީޖާއަކުން ގެޓާފޭ އަތުން ބާސާ މޮޅުވި މެޗުގައެވެ. އެ މެޗަކީ އޭނާ ބާސާއަށް ކުޅެދިން ތިންވަނަ މެޗެވެ. މި މެޗުގައި އޭނާގެ ފަލަމަސްގަނޑަށް އަނިޔާވެ ދަނޑުން ބޭލިއެވެ. އަދި އެ އަނިޔާއަށް ފަރުވާ ހޯދުމުގެ ގޮތުން އޭނާ ވަނީ ފިންލޭންޑުގައި ސާޖަރީއެއް ވެސް ފުރިހަމަކޮށްފައެވެ.

ބާސާގެ ރަސްމީ ވެބްސައިޓުގައި އެ ޓީމުން ނެރުނު ބަޔާނެއްގައި ވަނީ އަންގާރަ ދުވަހުގެ ވަގުތެއްގައި އޭނާއަށް މެޑިކަލް ޓީމުން ފެހި ސިގްނަލް ދީފައިވާ ކަމަށާއި އެހެންކަމުން އޭނާއަށް ޓީމުން ފުރުސަތު ދިނުމުގެ ބާރު މިހާރުއޮތީ ކޯޗު އާނެސްޓޯ ވަލްވާޑޭ އަތުގައި ކަމަށެވެ. އަދި އޭނާ ވަނީ އެ ޓީމުން އުއްމީދުކުރި މުއްދަތަށްވުރެ މާ އަވަހަށް އަނިޔާއިން ސަލާމަތްވެފައި ކަމަށާއި އޭނާ އަލުން ކުޅުމުގެ ތެރެއަށް އައުމާއި ގުޅިގެން ޓީމަށް އިތުރު ހިތްވަރެއް ލިބިގެން ގޮސްފައިވާ ކަމަށެވެ.

އަނިޔާއިން އެނބުރި އައިސް ޑެމްބެލޭ ކުޅޭ އެންމެ ފުރަތަމަ މެޗަށް ވެގެންދާނީ ބުރާސްފަތި ދުވަހުގެރޭ ސްޕެނިޝް ކޮޕާޑެލްރޭގައި ބާސާއިން ސެލްޓަވީގޯއާ ދެކޮޅަށް ކުޅޭ މެޗެވެ. މިދިޔަ ސީޒަނުގައި ވެސް ކޮޕާޑެލްރޭ ކާމިޔާބުކުރީ ބާސާއިން ކަމަށްވާއިރު އެ ޓީމުން އަންނީ އެ މުބާރާތް ދިފާއުކުރުމަށް މަސައްކަތް ކުރަމުންނެވެ.

ޑެމްބެލޭ ކުޅުމުގެ ތެރެއަށް އެނބުރި އައުމާއެކު ބާސާއިން މި ސީޒަނަށް ކުރަމުންދާ އުއްމީދުތައް ހަގީގަތަކަށް ހެދުމަށް އެ ޓީމުން ކުރަމުން އަންނަ މަސައްކަތްތަކަށް އިތުރު ބާރެއް ލިބިގެންދާނެއެވެ. ބާސާއިން ޗެމްޕިއަންސް ލީގުގެ ދެވަނަ ބުރުގެ ޖާގައެއް ހޯދާފައިވާއިރު އެ ޓީމު މިވަގުތު އޮތީ ނުވަ ޕޮއިންޓްގެ ލީޑަކާއެކު ސްޕެނިޝް ލަލީގާގެ އެއްވަނައިގައެވެ.

ޑެމްބެލޭއަކީ ދުނިޔޭގައި އެންމެ ފާހަގަ ކޮށްލެވޭ ޒުވާން ކުޅުންތެރިންގެ ތެރޭގައި ހިމެނޭ ކުޅުންތެރިޔެކެވެ. އޭނާއަކީ ދުވެލި ބާރު އަދި ދެފައިން އެއްވަރަކަށް ކުޅުމުގެ ހުނަރު ލިބިފައިވާ ކުޅުންތެރިޔެކެވެ. ޑޯޓްމަންޑަށް ކުޅުމުގެ ކުރިން ޑެމްބެލޭ ވަނީ ފްރާންސްގެ ރެނޭސްއަށްވެސް ކުޅެފައެވެ.

އޭނާގެ އުމުރުން 20 އަހަރުވީ އިރު އޭނާ ވަނީ ޖުމްލަ ހަތް ފަހަރަކު ފްރާންސްގެ ގައުމީ ޓީމަށް ކުޅެފައެވެ. އަދި މިދިޔަ ސީޒަނުގައި ޑޯޓްމަންޑަށް ކުޅުނު 49 މެޗުގައި އޭނާ ވަނީ 10 ލަނޑު ޖަހާފައެވެ.