ޕްރިމިއަރ ލީގު: ސިޓީގެ ލީޑު 15 ޕޮއިންޓަށް ފުޅާކޮށްފި

އިނގިރޭސި ޕްރިމިއަރ ލީގުގެ ޕޮއިންޓް ތާވަލުގެ ކުރީގައި މެންޗެސްޓަރ ސިޓީއިން ނަގާފައިވާ ލީޑު އެ ޓީމުން 15 ޕޮއިންޓަށް ފުޅާކޮށްފިއެވެ.

އަމިއްލަ ދަނޑުގައި ވޮޓްފޯޑްއާ ދެކޮޅަށް ކުޅުނު މެޗުން ސިޓީ މޮޅުވެފައިވަނީ 3-1 ގެ ނަތީޖާއަކުންނެވެ. މި މެޗާއި ސިޓީއިން ކުރިމަތިލީ މީގެ ދެ ދުވަސް ކުރިން ކްރިސްޓަލް ޕެލަސްއާ ދެކޮޅަށް ރަށުން ބޭރުގައި ކުޅުނު މެޗު އެއްވަރުވުމާއި ގުޅިގެން އެ ޓީމުން ޖެހިޖެހިގެން މެޗުތަކުން މޮޅުވަމުން އައި ރެކޯޑު ނިމުމާއެކުގައެވެ. ޕެލަސްއާ ދެކޮޅަށް ކުޅުނު މެޗާއި ހަމަޔަށް ސިޓީއިން ޖެހިޖެހިގެން 18 މެޗުން މޮޅުވެފައިވާއިރު އެ ޓީމު ޕްރިމިއަރ ލީގުގައި ކުޅުނު އެއްވެސް މެޗަކުން މިހާތަނަށް ބަލިވެފައެއް ނުވެއެވެ.

ވޮޓްފޯޑާއި ދެކޮޅަށް ކުޅުނު މެޗުގައި ސިޓީގެ ކުޅުންތެރިން ވަނީ ރަނގަޅު ކުޅުމެއް ދައްކައި ލަނޑު ޖެހުމަށް ގިނަ ފުރުސަތުތަކެއް ތަނަވަސްކޮށްފައެވެ. އެ ޓީމުގެ ފުރަތަމަ ލަނޑު މެޗު ފެށިގެން 38 ވަނަ ސިކުންތުގައި ލެރޯއި ސާނޭ ނަގައިދިން ހުރަހަކުން ކާމިޔާބު ކޮށްދިނީ ރަހީމް ސްޓާލިންއެވެ. މިއީ މި ސީޒަނުގެ ޕްރިމިއަރ ލީގުގައި ޓީމަކުން ޖެހި އެންމެ އަވަސް ލަނޑެވެ. ސިޓީގެ ލީޑު އިތުރަށް ފުޅާވެގެންދިޔައީ މެޗުގެ 13 ވަނަ މިނެޓުގައި ޑެބްރައިނާ ނެގި ހުރަހެއް ޕެލަސްގެ ކްރިސްޓިއަން ކަބަސެލޭ ޑިފެންޑް ކުރަން އުޅުމުގެ ތެރޭގައި އޭނާ އަތުން ބައިކޮޅަށް ވަނުމުންނެވެ.

ދެ ލަނޑުގެ ލީޑެއްގައި އޮވެ ސިޓީއިން ފުރަތަމަ ހާފު ނިންމާލިއިރު އެ ޓީމުން ވަނީ ދެވަނަ ހާފުގައި ވެސް ފުރަތަމަ ހާފެކޭ އެއްގޮތަށް ލަނޑު ޖެހުމަށް ރަނގަޅު ފުރުސަތުތަކެއް ތަނަވަސްކޮށްފައެވެ. ތަކުރާރުކޮށް އެ ޓީމުން އުފައްދަމުންދިޔަ ހަމަލާތަކުގެ ނަތީޖާއަކަށް ވެގެންދިޔައީ މެޗުގެ 63 ވަނަ މިނެޓުގައި އާޖެންޓީނާގެ ފޯވާޑް ސާޖިއޯ އަގުއޭރޯ ލަނޑެއް ޖަހައިދީ ސިޓީގެ ލީޑު ފުޅާކޮށްދިނުމެވެ. މި މެޗުގައި ވޮޓްފޯޑުން ޖެހި ހަމައެކަނި ލަނޑު އެ ޓީމަށް ޖަހައިދިނީ އެ ޓީމުގެ ފޯވާޑް އެންޑްރޭ ގްރޭއެވެ.

މި މެޗު ވެގެން ގޮސްފައިވަނީ ސިޓީއިން އެއް މަސްދުވަހުގެ ތެރޭގައި ކުޅުނު 10 ވަނަ މެޗަށެވެ. މި މެޗަށް ނުކުތުމުގެ ކުރިން ސިޓީގެ ކޯޗު ގާޑިއޯލާ ވަނީ ގާތްގާތުގައި މެޗުތައް ކުޅެން ޖެހުމަކީ ކުޅުންތެރިންނަށް އޮތް "މުސީބާތެއް" ގެ ގޮތުގައި ސިފަކޮށްފައެވެ. މި މެޗުން މޮޅުވުމާއެކު ވެސް ސިޓީއިން ވަނީ އެ ޓީމު ޕްރިމިއާ ލީގުގެ އެއްވެސް މެޗަކުން ބަލިނުވުމުގެ ރެކޯޑު ދަމަހައްޓާފައެވެ. މި މެޗުން މޭން އޮފް ދަ މެޗަކަށް ހޮވިފައިވަނީ ޕެލަސްއާ ދެކޮޅަށް ސިޓީ ކުޅުނު މެޗުގައި އަނިޔާވެގެން ބޭލި ބެލްޖިއަމްގެ މިޑްފީލްޑަރު ކެވިން ޑެބްރައިނާއެވެ.

ކުރިޔަށް އޮތް ދޮޅު ހަފްތާގައި މި ދެ ޓީމުން ޕްރިމިއަރ ލީގުގެ އެއްވެސް މެޗެއް ނުކުޅޭނެއެވެ. ސިޓީއަށް ކުރިޔަށް އޮތީ އެފްއޭ ކަޕްގެ ތިންވަނަ ބުރުގައި ބާންލީއާ ދެކޮޅަށް ކުޅޭ މެޗެވެ. އަދި ވޮޓްފޯޑު ވެސް ދެން ކުޅޭނީ އެފްއޭ ކަޕްގެ ތިންވަނަ ބުރުގައި ބްރިސްޓޮލް ސިޓީއާ ދެކޮޅަށެވެ.

ޕްރިމިއަރ ލީގުގެ ޕޮއިންޓް ތާވަލުގެ އެއްވަނައިގައި 62 ޕޮއިންޓާއެކު މެންޗެސްޓަރ ސިޓީ އޮތްއިރު ދެވަނައިގައި 47 ޕޮއިންޓާއެކު އޮތީ މެންޗެސްޓަރ ޔުނައިޓެޑްއެވެ. މެންޗެސްޓަރ ޗެލްސީއަށް 45 ޕޮއިންޓާއެކު ތިންވަނަ ލިބޭއިރު 44 ޕޮއިންޓާއެކު ހަތަރު ވަނަ ލިބެނީ ލިވަޕޫލްއަށެވެ. ހަމައެހެންމެ 40 ޕޮއިންޓާއެކު ފަސްވަނަ ލިބެނީ ޓޮޓެންހަމްއަށެވެ.