އީރާނުގެ ސަރުކާރާ ދެކޮޅަށް ކުރަމުންދާ މުޒާހަރާތަކުގައި މަރުވި މީހުންގެ އަދަދު 20 އަށް އަރައިފި އެވެ.

އީރާނުގެ ސަރުކާރާ ދެކޮޅަށް މުޒާހަރާ ކުރާތާ ފަސް ދުވަސްވެފައިވާއިރު، މުޒާހަރާތައް ފުޅާވެ ގިނަ އަދަދެއްގެ ސިޓީތަކުން މިހާރު ވަނީ ބައިވެރިވެފައެވެ. މުޒާހަރާތަކުގައި ގިނަ އަދަދެއްގެ މީހުން ބައިވެރިވަމުންދާއިރު، މުޒާހަރާތައް ކޮންޓްރޯލް ކުރުމުގައި ސަލާމަތީ ބާރުތަކުން ދަނީ ބާރުގެ ބޭނުން ކުރަމުންނެވެ.

އަލްއަރަބިއްޔާ އިން ރިޕޯޓް ކޮށްފައިވާ ގޮތުގައި، މަރުވި މީހުންގެ ތެރޭގައި ހިމެނެނީ މުޒާހަރާގެ 17 ބައިވެރިންނާއި ސަލާމަތީ ބާރުތަކުގެ ތިން އޮފިސަރުންނެވެ.

މުޒާހަރާތަކާ ގުޅޭ ގޮތުން އީރާނުގެ ރައީސް ހަސަން ރޫހާނީ ވިދާޅުވީ، މުޒާހަރާތަކާއި ފާޑުކިޔުންތަކަކީ ލިބޭ ފަހި ފުރުސަތެއް ކަމަށާއި އެއީ ބިރެއް ނޫން ކަމަށެވެ. ރޫހާނީ ވިދާޅުވީ ގައުމަށް ދިމާވެފައިވާ އިގްތިސާދީ މައްސަލަތައް ހައްލުކުރަން ގައުމުގެ އެންމެން ގުޅިގެން މަސައްކަތް ކުރަން ޖެހޭ ކަމަށެވެ.

ރޫހާނީ ކުރިން ވިދާޅުވެފައި ވަނީ ސުލްހަވެރިކަމާ އެކު މުޒާހަރާ ކުރުމުގެ މިނިވަންކަން އަބަދުވެސް އޮންނާނެ ކަމަށެވެ.

އީރާނުގައި ބުރާސްފަތި ދުވަހު މުޒާހަރާ ކުރަން ފެށީ އެ ގައުމުގައި ކޮރަޕްޝަން އިންތިހާއަށް ފެތުރި، ދިރިއުޅުމުގެ ހާލަތު ދުވަހަކަށް ވުރެ ދުވަހެއް ދަށްވަމުންދާ ކަމަށް ބުނެއެވެ.

ތަކެއްޗާއި ހިދުމަތުގެ އަގު ބޮޑުވުމުގެ މައްސަލައިގައި ފެށި މުޒާހަރާތަށް ފުޅާވެ، ސިޔާސީ މުޒާހަރާތަކަކަށް ބަދަލުވެފައިވާއިރު، މުޒާހަރާތަކުގައި ދަނީ، އީރާނުގެ ރޫހީ ލީޑަރު އާޔަތުﷲ އަލީ ޚާމަނާއީއާއި ރައީސް ހަސަން ރޫހާނީގެ އިސްތިއުފާ އަށް ވެސް ގޮވަމުންނެވެ.

މީގެ އިތުރުން ސިޔާސީ ކުށްވެރިން މިނިވަން ކުރުމަށާއި، ފުލުހުންގެ އަނިޔާވެރިކަން ނިމުމަކަށް ގެނައުމަށް މުޒާހަރާގެ ބައިވެރިން ދަނީ ގޮވާލަމުންނެވެ. އަދި މުޒާހަރާގެ ބައިވެރިން ބުނަމުންދަނީ އީރާނުގެ ސަރުކާރުން ކުރަން ނުޖެހޭ، ބޭކާރު ޚަރަދުތަކެއް ކުރަމުންދާ ކަމަށެވެ.