ސަރުކާރުން ވަނީ ރައްޔިތުން އޮބިއަޅުވައި، ހައްގުތައް ނިގުޅައިގަނެފައި: އަބްދުﷲ
އާ އަހަރަކާ ކުރިމަތިލާއި ހައްގުތަކާއި މިނިވަންކަން ވަނީ ނިގުޅައިގަނެފައި
ތިނަދޫ ދެކުނު ދާއިރާގެ މެންބަރު އަބްދުﷲ އަހުމަދު
އާ އަހަރަކާ ކުރިމަތިލާއިރު، ސަރުކާރުން ވަނީ ރައްޔިތުން އޮބިއަޅުވައި، ގާނޫނު އަސާސީއިން ލިބިދޭ ހައްގުތަކާއި މިނިވަންކަން ނިގުޅައިގަނެފައި ކަމަށް ތިނަދޫ ދެކުނު ދާއިރާގެ މެންބަރު އަބްދުﷲ އަހުމަދު ވިދާޅުވެއްޖެ އެވެ.
ސަރުކާރާއި ޚިޔާލު ތަފާތުވެ ޕީޕީއެމްއިން ވަކިވެވަޑައިގެންފައިވާ، އަބްދުﷲ އަހުމަދު ކުރެއްވި ޓްވީޓުތަކެއްގައި ވިދާޅުވީ، ސަރުކާރުގެ ސިޔާސަތުތަކާ ދެކޮޅަށް ހުޅުވާލި ކޮންމެ އަނގައެއް ގޮންމުށުގެ ބާރު ދައްކައިގެން "ހައްޔަރުކޮށްފައިވާ" ކަމަށެވެ.
އަބްދުﷲ ވިދާޅުވީ ސަރުކާރުގެ ސިޔާސަތުތަކަށް ފާޑުކިޔާ ނޫސްތަކަށާއި ނޫސްވެރިންނަށް ބިރުދައްކަމުންދާ ކަމަށެވެ. އަދި ޚިޔާލުފާޅުކުރުމުގައި ގޮންޖެހުންތަކާއި ކުރިމަތިލާންޖެހިފައިވާކަން އޭނާ ފާހަގަކުރެއްވި އެވެ.
މީގެ އިތުރުން، އޭނާ ވިދާޅުވީ ސަރުކާރުގެ ސިޔާސަތާ ދެކޮޅަށް މަސައްކަތް ކުރި ހުރިހާ ސިޔާސީ ލީޑަރުންނާއި ސިޔާސީ ފަރާތްތައް ގާނޫނު އަސާސީއާ ޚިލާފަށް ޖަލުގައި ބަންދުކޮށްފައިވާ ކަމަށެވެ.
ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމުގެ މައްސަލައިގައި ސޮއިކުރެއްވި ޕީޕީއެމްގެ މެންބަރުންގެ ތެރޭގައި ހިމެނިވަޑައިގަންނަވާ އަބްދުﷲ ގެ މެންބަރުކަމުގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ދަނީ ބުނަމުންނެވެ.
