ޕީއެސްޖީއަށް ބަދަލުވުމުގެ ކުރިން ސްޕެއިންގެ ރެއާލް މެޑްރިޑާއި ވާހަކަ ދެއްކި ކަމަށް ފްރާންސްގެ ޒުވާން ފޯވާޑް ކިލިއަން އެމްބާޕޭ ބުނެފިއެވެ.

މިދިޔަ ސީޒަނުގައި މޮނާކޯއަށް ކުޅުނު 27 މެޗުގައި އޭނާ 19 ލަނޑު ޖަހާފައިވެއެވެ. އޭގެތެރޭގައި ޔުއެފާ ޗެމްޕިއަންސް ލީގުގެ ނޮކްއައުޓް ބުރުތަކުގައި ޖެހި މުހިންމު ލަނޑުތައް ހިމެނެއެވެ. މި މޮޅު ކުޅުމުގެ ސަބަބުން ދުނިޔޭގެ އެންމެ ބޮޑެތި ޓީމުތަކުން އޭނާ ގެންދިޔުމަށް މަސައްކަތް ކޮށްފައިވެއެވެ. އޭގެތެރޭގައި ރެއާލް ވެސް ހިމެނެއެވެ. އެ ޓީމުން އޭނާ ގެންދިޔުމަށް މަސައްކަތް ކޮށްފައިވަނީ އެ ޓީމުގެ ކުރިޔަށް މިހާރު ކުޅެމުން އަންނަ ކަރިމް ބެންޒިމާގެ ފަރާތުން ފެންނަމުން ދިޔަ ދަށް ކުޅުމުގެ ސަބަބުންނެވެ.

ސްޕެއިންގެ މަޝްހޫރު ކުޅިވަރު ނޫހެއް ކަމަށްވާ 'މާސާ' އާ ވާހަކަ ދައްކަމުން އެމްބާޕޭ ބުނީ ރެއާލްއާއެކު ޓްރާންސްފާގެ މަޝްވަރާތަކެއް ކުރިޔަށް ގެންދިޔަ ކަމަށް ފެތުރިފައިވާ އަޑުތަކަކީ ހަގީގަތެއް ކަމަށާއި އެއީ މިހާރު މާޒީ ކަމަށެވެ. އޭނާ ބުނީ ރެއާލްއަށް ބަދަލު ނުވީ ޕެރިހުގައި ކުޅުމަކީ އޭނާ ހުވަފެނަކަށް ވާތީ އެކަން ހަގީގަތަކަށް ހެދުމުގެ ގޮތުން ކަމަށެވެ. އަދި އެގޮތަށް ނިންމުމުން ވަރަށް އުފާވެފައި ހުރިކަމަށް އެމްބާޕޭ މި އިންޓަވިއުގައި ބުނެފައިވެއެވެ.

މުސްތަގުބަލުގައި އެހެން ޓީމަކަށް ބަދަލުވުމަކީ އެކަށީގެންވާ ކަމެއްތޯ ސުވާލު ކުރުމުން އޭނާ ބުނީ މުސްތަގުބަލުގައި ވާންހުރި ކަންކަން އޭނާއަށް ނޭނގޭ ކަމަށާއި ޔަގީނުން ވެސް މިވަގުތު އޭނާ ޕީއެސްޖީއަށް ސަތޭކަ އިންސައްތަ ދެމުންދާ ކަމަށެވެ. ރެއާލްއާއެކު ކުރެވުނު މަޝްވަރާތަކުގެ ވާހަކަ އަބަދުވެސް މީހުން އަހާ ކަމަށާއި އެހެން ނަމަވެސް މިހާރު އެވާހަކަތަކަށް އަހަންމިއްޔަތުކަން ނުދޭކަމަށް އެމްބާޕޭ ބުނެފައިވެއެވެ.

ޔޫރަޕާއި ދުނިޔޭގެ ޗެމްޕިއަނުންނަށް ކުޅުމުގެ ފުރުސަތު ނަގާލުމަށް ފަހު މިދިޔަ ހޫނު މޫސުމުގެ ޓްރާންސްފާގައި އޭނާ ބަދަލުވީ މޮނާކޯގެ ވާދަވެރި ޕީއެސްޖީއަށެވެ. އޭނާ އެ ޓީމަށް ބަދަލުވީ 180 މިލިއަން ޔޫރޯގެ ލޯނު އެއްބަސްވުމެއްގެ ދަށުންނެވެ. އެމްބާޕޭ ރެއާލްއާ މަޝްވަރާ ކުރިކަމަށް އޭނާ އެއްބަސްވެފައިވާއިރު ރެއާލްއާ ދެކޮޅަށް ޗެމްޕިއަންސް ލީގުގެ ދެވަނަ ބުރުގައި އޭނާ ނުކުންނާނެއެވެ. ޕީއެސްޖީގެ ކުޅުންތެރިޔެއްގެ ގޮތުގައި އޭނާ ނުކުންނައިރު މި މެޗު އޭނާއަށް ވަރަށް ހާއްސަވާނެ ކަމަށް އޭނާ މި އިންޓަވިއުގައި ބުނެފައިވެއެވެ.

އެމްބާޕޭ މި އިންޓަވިއުގައި ބުނެފައިވަނީ ކްރިސްޓިއާނޯ ރޮނާލްޑޯއަކީ އޭނާގެ އައިޑޮލްއެއް ކަމަށާއި އެހެން ނަމަވެސް އެ މެޗުގައި ނުކުންނާނީ ރޮނާލްޑޯ ބަލިކުރަން ކަމަށެވެ. އޭނާ ބުނީ ނޭމާއަކީ ވެސް ރޮނާލްޑޯއާ އެއް ފަންތީގެ ކުޅުންތެރިޔެއް ކަމަށާއި ނޭމާ އަދި ކަވާނީގެ ފަރާތުން ވަރަށް ގިނަ ކަންކަން ދަސްވާ ކަމަށެވެ. ނޭމާގެ ސަބަބުން ޓީމަށް ތަށި ގެނެވޭނެކަން ފާހަގަ ކުރަމުން އެމްބާޕޭ ބުނީ މި ސީޒަނަކީ ކާމިޔާބު ސީޒަނަކަށް ހެދުމަށް މަސައްކަތް ކުރަމުންދާ ކަމަށެވެ.

އުމުރުން 19 އަހަރުގެ އެމްބާޕޭ ކެރިއަރު ފަށާފައިވަނީ މޮނާކޯއިންނެވެ. އޭނާވަނީ އެ ޓީމަށް ކުޅުނު 41 މެޗުގައި 22 ލަނޑު ޖަހައިދީފައެވެ. އަދި ޕީއެސްޖީއަށް ބަދަލުވުމަށް ފަހު ވެސް އޭނާ އަންނަނީ އެ ޓީމުގެ މުހިންމު ދައުރެއް އަދާ ކުރަމުންނެވެ. އެގޮތުން މިހާތަނަށް މި ސީޒަނުގައި ޕީއެސްޖީއަށް ކުޅުނު 19 މެޗުގައި އޭނާ ވަނީ 12 ލަނޑު ޖަހައިދީފައެވެ.