އިނގިރޭސި ޕްރިމިއާ ލީގުގައި ޓޮޓެންހަމް ކުޅުނު މެޗުގައި ހެޓްރިކް ހަދައި ޓީމުގެ ފޯވާޑް ހެރީ ކޭން ރެކޯޑު ހެދިއިރު ޗެލްސީ ވެސް އެ ޓީމު ކުޅުނު މެޗުން މޮޅުވެއްޖެއެވެ.

 ސައުތްހެމްޕްޓަންއާ ދެކޮޅަށް އަމިއްލަ ދަނޑުގައި ކުޅުނު މެޗުން ޓޮޓެންހަމް މޮޅުވެފައިވަނީ 5-2 ގެ ނަތީޖާއަކުންނެވެ. މި މެޗުގައި އެ ޓީމަށް ކުޅެމުން އަންނަ އިނގިރޭސިވިލާތުގެ ހުނަރުވެރި ފޯވާޑް ވަނީ ހެޓްރިކް ހަދާފައެވެ. މި މެޗުގައި ޓޮޓެންހަމްގެ ފަރާތުން މޮޅު އެޓޭކިން ފުޓްބޯޅައެއް ފެނިގެންދިޔައިރު އެ ޓީމުން ވަނީ ލަނޑު ޖެހުމަށް ނުރައްކާތެރި ގިނަ ހަމަލާތަކެއް އުފައްދާފައެވެ.

ޓޮޓެންހަމްގެ ފުރަތަމަ ލަނޑު މެޗުގެ 22 ވަނަ މިނެޓުގައި ކްރިސްޓިއަން އެރިކްސެން ތަނަވަސްކޮށްދިން ފުރުސަތަކުން ޖަހައިދިނީ ކޭންއެވެ. މި ލަނޑަށް ފަހު ވެސް ޓޮޓެންހަމްއިން އުފައްދަމުން ދިޔަ ހަމަލާތަކުގެ ނަތީޖާއަކަށް ވެގެންދިޔައީ މެޗުގެ 39 ވަނަ މިނެޓުގައި ދެކުނު ކޮރެއާގެ ފޯވާޑް ހެއުންމިން ސޮން ތަނަވަސްކޮށްދިން ފުރުސަތަކުން ކޭން ލަނޑެއް ޖަހައިދީ އެ ޓީމުގެ ލީޑު ފުޅާކޮށްދިނުމެވެ.

ދެ ލަނޑުގެ ލީޑެއްގައި އޮވެ ޓޮޓެންހަމްއިން ފުރަތަމަ ހާފު ނިންމާލިއިރު އެ ޓީމުން ވަނީ ދެވަނަ ހާފުގައި ވެސް މެޗުގެ ކޮންޓްރޯލް ދަމަހައްޓާފައެވެ. ދެވަނަ ހާފު ފެށިގެން ހަތަރު މިނެޓު ނުވަނީސް ޑެލޭ އަލީ އެ ޓީމުގެ ތިންވަނަ ލަނޑު ޖަހައިދިންއިރު އޭގެ ތިން މިނެޓުފަހުން ސޮން ވަނީ ޓޮޓެންހަމްގެ ހަތަރުވަނަ ލަނޑު އެ ޓީމަށް ޖަހައިދީފައެވެ.

މި ލަނޑަށްފަހު ސައުތްހެމްޕްޓަންގެ ކުޅުން އެ ޓީމުން ރަނގަޅުކުރުމުގެ ނަތީޖާއެއްގެ ގޮތުން 64 ވަނަ މިނެޓުގައި ސޮފައިން ބޯފާލް އެ ޓީމަށް ލަނޑެއް ޖަހައިދީ ނަތީޖާގެ ފަރަގު ކުޑަކޮށްދިނެވެ. އެހެން ނަމަވެސް މެޗުގެ 67 މިނެޓުގައި ކޭން ވަނީ އޭނާގެ ހެޓްރިކް ފުރިހަމަކޮށް ޓޮޓެންހަމްގެ ލީޑު އިތުރަށް ފުޅާކޮށްދީފައެވެ. ސައުތްހެމްޕްޓަންއިން މެޗުގައި ޖެހި ދެވަނަ ލަނޑު އެ ޓީމަށް ޖަހައިދިނީ ޑޫސާން ޓަޑިޗްއެވެ.

މި މެޗުގައި ހެދި ހެޓްރިކާއެކު މިހިނގަމުންދާ 2017 ވަނަ އަހަރު އެންމެ ގިނަ ލަނޑު ޖެހި ކުޅުންތެރިޔާގެ މަގާމު ކޭން ވަނީ ހޯދާފައެވެ. އޭނާ ވަނީ ކުޅުނު 52 މެޗުގައި 56 ލަނޑު ޖަހާފައެވެ. މިއީ ވޭތުވެދިޔަ ހަތް އަހަރުތެރޭ ކްރިސްޓިއާނޯ ރޮނާލްޑޯއާއި ލިއޮނެލް މެސީ ފިޔަވައި އެހެން ކުޅުންތެރިޔަކު މިމަގާމު ހޯދި ފުރަތަމަ ފަހަރެވެ.

ޕްރިމިއާ ލީގުގައި ޗެލްސީ ވަނީ އަމިއްލަ ދަނޑުގައި 2-0 ގެ ނަތީޖާއަކުން ބްރައިޓަން ބަލިކޮށްފައެވެ. މި މެޗުގައި ޗެލްސީއިން ޖެހި ލަނޑުތައް އެ ޓީމަށް ޖަހައިދިނީ އަލްވާރޯ މޮރާޓާ އާއި މާކޯސް އަލޮންސޯއެވެ. ބޯންމައުތްއާ ވެސްޓް ހަމް ޔުނައިޓެޑް ކުޅުނު މެޗު 3-3 ގެ ނަތީޖާއަކުން އެއްވަރުވެގެން ނިމުނުއިރު ހަޑާސްފީލްޑް އާއި ސްޓޯކް ސިޓީ ކުޅުނު މެޗު ނިމުނީ 1-1 ގެ ނަތީޖާއަކުން އެއްވަރުވެގެންނެވެ.

ޕްރިމިއާ ލީގުގެ ޕޮއިންޓް ތާވަލުގެ އެއްވަނައިގައި 55 ޕޮއިންޓާއެކު މެންޗެސްޓާ ސިޓީ އޮތްއިރު ދެވަނައިގައި 43 ޕޮއިންޓާއެކު އޮތީ މެންޗެސްޓާ ޔުނައިޓެޑްއެވެ. ޗެލްސީއަށް 42 ޕޮއިންޓާއެކު ތިންވަނަ ލިބޭއިރު 38 ޕޮއިންޓާއެކު ހަތަރު ވަނަ ލިބެނީ ލިވަޕޫލްއަށެވެ. ހަމައެހެންމެ 37 ޕޮއިންޓާއެކު ފަސްވަނަ ލިބެނީ ޓޮޓެންހަމްއަށެވެ.