ޓޮމް އެންޑް ޖެރީ ކުރެހި ބޮބް ގިވެންސް މަރުވެއްޖެ

ޓޮމް އެންޑް ޖެރީ އާއި ބަގްސް ބަނީ ފަދަ ކެރެކްޓާތައް ވުޖޫދަށް ގެނައި ބޮބް ގިވެންސް މަރުވެއްޖެއެވެ.

އޭނާ މަރުވިއިރު އުމުރަކީ 99 އަހަރެވެ. ގިވެންސް ވަނީ އޭނާގެ އުމުރުގެ 60 އަހަރު އެނިމޭޓަރެއްގެ ވަޒީފާ އަދާކޮށްފައެވެ. އޭނާ އެނިމޭޓަރެއްގެ ވަޒީފާގައި އުޅުނު މަޝްހޫރު ކުންފުނިތަކުގެ ތެރޭގައި ޑިސްނީ، ވާރނާ ބްރޯސް އަދި ހައްނާ ބާބެރާ ހިމެނެއެވެ.

ގިވެންސް ކުރަހާފައިވާ ކާޓޫން ކެރެކްޓާތަކުގެ ތެރޭގައި ޓޮމް އެންޑް ޖެރީ، ޑަފީ ޑަކް، އެލްވިން އެންޑް ދަ ޗިޕްމަންކްސް އަދި ޕޮޕާއީ ހިމެނެއެވެ.

ގިވެންސްގެ އެންމެ ފުރަތަމަ މަސައްކަތަކީ 1937 ވަނަ އަހަރު ޑިސްނީ ކުންފުނިން އުފެއްދި ޑޮނާލްޑް ޑަކް އާއި ސްނޯ ވައިޓް ކާޓޫނެވެ. އެނިމޭޓެޑް ކުންފުންޏެއް ކަމަށްވާ ވާރނާ ބްރޮސް އާއި ގިވެންސް ގުޅިފައިވަނީ 1940 ވަނަ އަހަރެވެ. ގިވެންސް މަޝްހޫރު ވެފައި ވަނީ ބަގްސް ބަނީ ކާޓޫނު ކުރެހި ހިސާބުންނެވެ.

އެނިމޭޝަންގެ ދާއިރާގައި މަސައްކަތް ކުރުމުގެ ކުރިން ގިވެންސް މަސައްކަތް ކޮށްފައި ވަނީ އެމެރިކާގެ އަސްކަރިއްޔާގައެވެ. އެއީ ދެވަނަ ބޮޑު ހަނގުރާމައިގެ ދުވަސްވަރުގައެވެ.

ސޯޝަލް މީޑިއާގައި ގިވެންސްގެ މަސައްކަތަށް އޭނާގެ ފޭނުން ވަނީ ޓްރިބިއުޓް ދީފައެވެ.