ދީނަށް އޮތް އެންމެ ބޮޑު ނުރައްކަލަކީ، މުދާވެރިކަން ހޯދުމަށް ދީން ބޭނުންކުރާ ބަޔަކު ދައުލަތް ހިޞާރުކުރުން: ފައްޔާޒް
މެންބަރު ފައްޔާޒް އަދި އުއްތަމަ ފަނޑިޔާރު ޢަބްދުﷲ ސައީދު
ގަސްތުގައި ރައްޔިތުން ގުނބޯ ހައްދަން ނޫޅުއްވުމަށް ރައްޔިތުންގެ މަޖިލީހުގެ ގަމު ދާއިރާގެ މެންބަރު ފައްޔާޒު އިސްމާއިލް، އުއްތަމަ ފަނޑިޔާރު ޢަބްދުﷲ ސައީދަށް ގޮވާލައްވައިފިއެވެ.
ހުކުރު ދުވަހު ކުރެއްވި ޓްވީޓެއްގައި މިފަދައިން ގޮވާލައްވައި، ފައްޔާޒު ވިދާޅުވީ ރާއްޖޭގައި މިހާރު ދީނަށް އޮތް އެންމެ ބޮޑު ނުރައްކަލަކީ، ސިޔާސީ ހަތިޔާރެއްގެ ގޮތުގައި ދީން ބޭނުންކޮށް، ބާރުވެރިކަމާއި، މުދާވެރިކަން ހޯދުމަށް ދީން ބޭނުންކުރާ ބަޔަކު ދައުލަތް ހިޞާރުކުރުން ކަމަށެވެ.
ފައްޔާޒު މިފަދައިން ވިދާޅުވެފައި މިވަނީ، ދިވެހި ގައުމުން އިސްލާމްދީނުގެ އަލިކަން ފޮހެވިގެން ދިޔަ ނުދީ ދިވެހި ގައުމުގެ އިސްލާމީ ޝަހުސިއްޔަތު ރައްކާތެރި ކުރުމަށް ރައީސުލްޖުމްހޫރީއްޔާ އަބްދުﷲ ޔާމީންގެ ސަރުކާރުން ވަރަށް ހަރުދަނާ މަސައްކަތްތަކެއް ކުރަމުން ގެންދަވާ ކަމަށް ވިދާޅުވެ، ރައީސް ޔާމީނާއި ސަރުކާރަށް އުއްތަމަ ފަނޑިޔާރު ތަޢުރީފު ކުރެއްވުމާ ގުޅިގެންނެވެ.
ބުރާސްފަތި ދުވަހުގެރޭ ބޭއްވި ޖަލްސާއެއްގައި ވާހަކަފުޅު ދައްކަވަމުން އުއްތަމަ ފަނޑިޔާރު އަބްދުﷲ ސައީދު ވިދާޅުވީ ކިޔަވާ ކުދިންގެ ހިތްތަކުގައި ދީނީ ލޯބި އާލާ ކުރުމަށްޓަކައި މި ސަރުކާރުން ސްކޫލުތަކުގައި ދީން ކިޔަވައިދިނުން ހަރުދަނާކޮށް، މަތީ ތައުލީމްގެ ދާއިރާއިން އިސްލާމީ ތައުލީމް ހަރުދަނާ ކުރުމަށްޓަކައި އިސްލާމީ ޔުނިވާސިޓީއެއް އުފައްދަވާފައިވާ ކަމަށާއި، އެކަމަށްޓަކައި ރައީސް ޔާމީނަށް ޝުކުރުކުރައްވާ ކަމަށެވެ.
