ލަންކާގެ ލޯކަލް ކައުންސިލް އިންތިޚާބު ފެބްރުއަރީ 10ގައި
އިންތިޚާބުގައި 8293 ކައުންސިލަރުން އިންތިޚާބު ކުރާނެ
ލަންކާގެ އިލެކްޝަންސް ކޮމިޝަނަރު މަހިންދަ ދެޝަޕްރިއާ (ކ)
ގިނަ މަޝްވަރާތަކަކާއި ބޮޑެތި މައްސަލަތަކަކަށްފަހު ލަންކާގެ ލޯކަލް ކައުންސިލް އިންތިޚާބު، އަންނަ އަހަރު ބާއްވާނެ ތާރީޚު އިއުލާންކޮށްފިއެވެ.
ލަންކާގެ އިލެކްޝަންސް ކޮމިޝަނަރު މަހިންދަ ދެޝަޕްރިއާ ވިދާޅުވީ ލޯކަލް ކައުންސިލް އިންތިޚާބު އޮންނާނީ އަންނަ ފެބްރުއަރީ މަހުގެ 10 ވަނަ ދުވަހު ކަމަށެވެ. އިންތިޚާބު އޮންނަ ތާރީޚު އިލެކްޝަންސް ކޮމިޝަނަރު އިއުލާންކުރެއްވުމުގެ ކުރިން ބައެއް ސިޔާސީ ޕާޓީތަކުން އެދުވަހު އިންތިޚާބު އޮންނާނެކަން އިއުލާންކުރުމާއި ގުޅިގެން ދެޝަޕްރިއާ ވިދާޅުވީ އެކަމާއި ހިތާމަކުރައްވާކަމަށާއި، އެކަމުގެ ސަބަބުން އިންތިޚާބަށް ބަޔަކު ނުފޫޒު ފޯރުވާކަމަށް ދޭހަވެދާނެކަމަށެވެ. އެހެން ނަމަވެސް އެދުވަހު އިންތިޚާބު ބާއްވަން ނިންމީ ގިނަ މަޝްވަރާތަކަކަށްފަހުކަމަށް ވިދާޅުވެ، ދެޝަޕްރިއާ ވިދާޅުވީ އިންތިޚާބުގެ ޤާނޫނާ ޚިލާފްވާ ކޮންމެ ފަރާތަކާމެދުވެސް ފިޔަވަޅު އަޅުއްވަން ފަސްޖެހިވަޑައިނުގަންނަވާކަމަށެވެ.
ލަންކާގެ ލޯކަލް ކައުންސިލް އިންތިޚާބުގައި 15 މިލިއަން 7 ލައްކަ 60 ހާސް، އަށްސަތޭކަ ނުވަ މީހުންނަށް ވޯޓު ދިނުމުގެ ހައްޤު ލިބިގެންވާއިރު، އިންތިޚާބުގައި 8293 ކައުންސިލަރުން އިންތިޚާބު ކުރާނެއެވެ. އެއީ 24 މުނިސިޕަލް ކައުންސިލަށާއި، 41 އަރބަން ކައުންސިލްގެ އިތުރުން 276 ޕްރަދޭޝިއާ ސަބާއަށެވެ.
އިންތިޚާބުގައި ވާދަކުރުމަށް ހުށަހަޅާފައިވާ ބައެއް ކެންޑިޑޭޓުންގެ ކެންޑިޑެސީ އިލެކްޝަންސް ކޮމިޝަނުން ވަނީ އެކި ސަބަބުތަކާ ހުރެ ބާޠިލްކޮށްފައެވެ. އިލެކްޝަންސް ކޮމިޝަނަރ މަހިންދަ ދެޝަޕްރިއާ ވިދާޅުވީ އެނިންމުން އިސްތިއުނާފުކުރުމުގެ ހައްޤު ކެންޑިޑޭޓުންނަށް ލިބިގެންވާކަމަށެވެ.
