ގއ. އަތޮޅު ކައުންސިލަރުންގެ ސަސްޕެންޝަން އުވާލުމަށް ގުޅިފައިވާ ޕާޓީތަކުން ގޮވާލައިފި
17 ޑިސެމްބަރު 2017 | އާދީއްތަ 08:21ކައުންސިލަރުން ސަސްޕެންޑުކޮށްފައިވަނީ ތިން މަސް ދުވަހަށް
ސަސްޕެންޑުކުރި ގއ.އަތޮޅު ކައުންސިލަރުންނާއެކު އިންޑިއާގެ އިން ރާއްޖެ ކަނޑައަޅުއްވާފައިހުރި ސަފީރު
ގއ.އަތޮޅު ކައުންސިލަރުންނަށް ކޮށްފައިވާ ސަސްޕެންޝަން ވަގުތުން އުވާލުމަށް ގުޅިފައިވާ ޕާޓީތަކުން ގޮވާލައިފިއެވެ.
ގުޅިފައިވާ ޕާޓީތަކުން ނެރުނު ބަޔާނެއްގައި ބުނީ އިންޑިޔާއިން ރާއްޖެއަށް ކަނޑައަޅުއްވާފައިވާ ސަފީރު ހުވަދޫ އަތޮޅު އުތުރުބުރިއަށް ކުރެއްވި ދަތުރުފުޅުގައި އެ އަތޮޅުގެ އަތޮޅު ކައުންސިލްގެ މެންބަރުންނާ ބައްދަލުކުރެއްވުމާ ގުޅިގެން މުޅި އަތޮޅު ކައުންސިލް ތިން މަސް ދުވަހަށް އެލް.ޖީ.އޭ އިން ސަސްޕެންޑް ކޮށްފައިވާ ކަމަށެވެ.
އެހެން ނަމަވެސް ކައުންސިލެއް ސަސްޕެންޑް ކުރުމުގެ އެއްވެސް ޤާނޫނީ ބާރެއް ލޯކަލް ގަވަރމަންޓް އޮތޯރިޓީއަށް ލިބިދީފައިނުވާ ކަމަށާއި، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނުގެ ތިންވަނަ ބާބުގެ އަތޮޅު ކައުންސިލް ގެ ޤާނޫނީ ޝަހުސިއްޔަތު ބަޔާން ކޮށްދޭ ހަތް ވަނަ މާއްދާ ބުނާގޮތުން އިންތިޚާބު ވެފައިވާ އެއްވެސް އަތޮޅު ކައުންސިލަކަށް ވަކި ޖަމާއަތަކާ ނުވަތަ ވަކި ފަރުދަކާ ބައްދަލު ކުރުމަކަށް އެއްވެސް ޤާނޫނީ ހުރަހެއް ނެތްކަމަށެވެ.
އެގޮތުން ގުޅިފައިވާ ޕާޓީތަކުން ބުނީ ޤާނޫނާއި ޚިލާފަށް މިސަރުކާރުން ޢަމަލު ކުރަމުން ގެންދަނީ، ދިވެހި ރައްޔިތުންނަށް ސީދާ ގޮތުގައި ބިރުދައްކައި އަނިޔާވަރިކަން ދެއްކުމަށް ކަމަށާއި، އަދި މި ސަރުކާރުން ލާމަރުކަޒީ ނިޒާމު ފުނޑުފުނޑު ކޮށްލައި އެ ނިޒާމުން ދިވެހި ރައްޔިތުންނަށް ލިބެމުންދާ ޚިދުމަތްތައް ހުއްޓުވައި ސިޔާސީ ބޭނުމަކަށްޓަކައި ވަކި ފަރާތެއްގެ މުށު ތެރެއަށް ހުރިހާ ބާރެއް އެއްކުރުމަށް ހިންގާ ޚުދުމުޙުތާރު ޢަމަލެއްގެ ގޮތުގައި ދެކޭ ކަމަށެވެ.
ބޭރުގެ ފަރާތްތަކާއި ބައްދަލު ކުރެވޭނީ އެލް.ޖީ.އޭގެ ވަކި ހުއްދަ އެއް އޮވެގެން ކަމަށް ނިންމާފައި ވުމަކީ، އެކަމުން ބޭރުގެ ފަރާތްތަކަށް ކުރާ އިޚުތިރާމް ކުޑަވެ އެފަރާތްތަކާއި އޮންނަ ގުޅުމަށް ބުރޫ އަރާނެ ކަމެއް ކަމުގައި ދެކޭ ކަމަށާއި، ކައުންސިލަރުންނަކީ ދިވެހި ރައްޔިތުން އިންތިޚާބު ކޮށްފައިވާ ރައްޔިތުންގެ މަންދޫބުން ކަމުގައިވީހިނދު، އެކައުންސިލަރުންގެ ޤާނޫނީ ޒިންމާ އަދާކުރުމަށް ދައުލަތުގެ މުއައްސަސާތަކުން ފުރިހަމައަށް އެއްބާރުލުން ދިނުމަށް ގުޅިފައިވާ ޕާޓީތަކުން ވަނީ ގޮވާލާފައެވެ. އަދި މިހާރުން މިހާރަށް ޤާނޫނާއި ޚިލާފަށް ގއ. އަތޮޅު ކައުންސިލަރުން ކޮށްފައިވާ ސަސްޕެންޝަން އުވާލައި ލޯކަލް ގަވަރމަންޓް އޮތޯރިޓީ ޤާނޫނީ އިމުގެ ތެރެއަށް ވަނުމަށް ވެސް ގުޅިފައިވާ ސިޔާސީ ޕާޓީ ތަކުން ވަނީ ގޮވާލަމެވެ.
