އަދީބު ސިވިލް ކޯޓަށް ހުށަހެޅުއްވި މައްސަލައިގެ އަޑުއެހުމެއް މާދަމާ
16 ޑިސެމްބަރު 2017 | ހޮނިހިރު 18:24އަދީބު މައްސަލަ ހުށައެޅުއްވީ ހޯމް މިނިސްޓްރީ އާއި ފުލުހުންނާއި ކަރެކްޝަނާ ދެކޮޅަށް
ކުރީގެ ނާއިބު ރައީސް އަހްމަދު އަދީބު
ކުރީގެ ނާއިބު ރައީސް އަހުމަދު އަދީބަށް އެކަށީގެންވާ ބޭސްފަރުވާ ފޯރުކޮށްނުދޭ ކަމަށް ބުނެ ދައުލަތުގެ ތިން މުވައްސަސާއަކަށް ރައްދުވާ ގޮތަށް ސިވިލް ކޯޓަށް ހުށަހެޅި މައްސަލައިގެ އަޑުއެހުމެއް އާދިއްތަ ދުވަހަށް ތާވަލުކޮށްފިއެވެ.
މޯލްޑިވްސް ޕޮލިސް ސާވީސް އާއި މޯލްޑިވްސް ކަރެކްޝަންސް ސާވީސްގެ އިތުރުން ހޯމް މިނިސްޓްރީއާ ދެކޮޅަށް ހުށަހަޅާފައިވާ އެ މައްސަލާގެ އަޑުއެހުން ތާވަލުކޮށްފައި ވަނީ އާދިއްތަ ދުވަހުގެ 14.00 އަށެވެ.
މި މައްސަލައިގެ އަޑުއެހުމެއް ބޭއްވުމަށް މި މަހުގެ 10 ވަނަ ދުވަހަށް ވެސް ތާވަލުކުރިއެވެ. އެހެން ނަމަވެސް އެ އަޑުއެހުން ކެންސަލްކުރީ އަދީބު ކޯޓަށް ހާޒިރުކޮށް ނުދެވުމުގެ ސަބަބުންނެވެ.
ބޭސްފަރުވާއަށް ރާއްޖެއިން ބޭރަށް ފޮނުވައިދިނުމުގެ އަމުރަކަށް ކޮށްފައިވާ އެ ދައުވާއާ ގުޅިގެން ބާއްވަން އުޅުނު ޝަރީއަތު އަޑުއެހުން ކެންސަލް ކުރުމަށްފަހު ސިވިލް ކޯޓުން ބުނެފައިވަނީ އަޑުއެހުމަށް އަދީބު ހާޒިރުކޮށްދިނުމަށް އެދި ޗިޓު ފޮނުވީ ކަރެކްޝަނަށް ކަމަށާއި ނަމަވެސް، އަޑުއެހުން ތާވަލުކޮށްފައިވާ ގަޑި ފަހަނައަޅައި ދިޔައިރު ވެސް ކަރެކްޝަނުން އެއްވެސް ޖަވާބެއް ދީފައިނުވާ ކަމަށް ކޯޓުން މައުލޫމާތުދެއެވެ.
އަދީބު ކޯޓަށް ހާޒިރުކޮށްދިނުމުގެ އަމުރު ކަރެކްޝަނަށް ފޮނުވިއިރު، މިއަހަރުގެ މާޗް މަހުން ފެށިގެން އަދީބު ހުންނަވަނީ ފުލުހުންގެ ބެލުމުގެ ދަށުގައެވެ. ހުކުމް ތަންފީޒު ކުރަމުންދާ އެހެން ގައިދީން ކަރެކްޝަނުން ބަލަހައްޓާ ޖަލުތަކުގައި ބަންދުކުރި ނަމަވެސް، އަދީބު ފުލުހުންގެ ބެލުމުގެ ދަށަށް ބަދަލު ކުރީ ސަލާމަތީ ކަންކަން ވަރުގަދަ ކުރުމަށް ކަމަށް ބުނެ ހޯމް މިނިސްޓަރުގެ އަމުރެއްގެ ދަށުންނެވެ.
ފުލުހުން ބުނާ ގޮތުގައި، އެ މުއައްސަސާ އިން ބަލަހައްޓަމުން ދަނީ އަދީބުގެ ސަލާމަތީ ކަންކަމެވެ. އަދީބުގެ ބޭސްފަރުވާގެ ކަންކަން ބަލަހައްޓަމުން ދަނީ ކަރެކްޝަނުންނެވެ. އަދީބުގެ ފަރާތުން ހުށަހަޅާފައިވާ މައްސަލަ އަށް އަދީބު ކޯޓަށް ހާޒިރުކޮށްދޭނެ ފަރާތެއް ނޭނގުނު ނަމަވެސް ދައުލަތުން އަދީބުގެ މައްޗަށް ކުރާ އެތައް ދައުވާއެއްގެ އަޑުއެހުމަށް ކަމާ ބެހޭ އިދާރާތަކުން އަދީބު ކޯޓަށް ހާޒިރުކޮށްދެއެވެ. އަދި މިހާތަނަށް ހާޒިރުކޮށްގެން އެތައް ހުކުމެއް ވަނީ ކޮށްފައެވެ.
އަދީބުގެ ސިއްހީ ހާލުކޮޅު ދެރަވެ ފުރާނައަށް ގެއްލުން ވެދާނެ ކަމަށް ޑޮކްޓަރުންނާއި ހަވާލާދީ އާއިލާ އާއި ވަކީލުން ދަނީ ބުނަމުންނެވެ. އަދީބުގެ އެތެރެހަށީގައި ސިސްޓް އުފެދިފައިވުމާއި ލޮލަށް ގްލޮކޮމާ ޖެހިފައިވުމާއި ކިޑްނީގައި ހިލަ އުފެދިފައިވާ ކަމަށް އާއިލާ އާއި ވަކީލުން ދަނީ ބުނަމުންނެވެ.
އަދީބަށް އިތުރު ފަރުވާ ދިނުމަށް ވީހާ ވެސް އަވަހަކަށް ރާއްޖެއިން ބޭރަށް ގެންދިއުމަށް ޑޮކްޓަރުން ލަފާދީފައިވާއިރު، ސަރުކާރުން ވަނީ އެ ހުއްދަ އަދީބަށް ނުދިނުމަށް ނިންމާފައެވެ. ސަރުކާރުން ބުނަމުން ދަނީ އަދީބު ފިއްލަވާފާނެ ކަމަށާއި، އަދީބު ފިއްލަވައިފި ނަމަ ދައުލަތަށް ލިބެންޖެހޭ ފައިސާ ނުލިބޭނެ ކަމަށެވެ.
