ޕްރިމިއާ ލީގު: ޗެލްސީ މޮޅުވިއިރު ބާންލީ ގަދަ ހަތަރަކަށް

އިނގިރޭސި ޕްރިމިއާ ލީގްގައި ކުޅުނު މެޗުން ޗެލްސީ މޮޅުވިއިރު ބާންލީ ގަދަ ހަތަރަކުން ޖާގަ ހޯދައިފިއެވެ.

މި ސީޒަނުގެ ޕްރިމިއާ ލީގުގައި އަލަށް ވާދަކުރަމުން އަންނަ ހަޑާސްފީލްޑް ޓައުންއާ ދެކޮޅަށް ކުޅުނު މެޗުން ޗެލްސީ މޮޅުވެފައިވަނީ 3-1 ގެ ނަތީޖާއަކުންނެވެ. ހަޑާސްފީލްޑްގެ ދަނޑުގައި ކުޅުނު މި މެޗުގައި ޗެލްސީގެ ފަރާތުން ވަނީ ރަނގަޅު ކުޅުމެއް ފެނިގެން ގޮސްފައެވެ. އެ ޓީމުން ވަނީ ގިނަ ވަގުތު ބޯޅަ ގެންގުޅެ ހަޑާސްފީލްޑްގެ ގޯލާއި އަމާޒުކޮށް ގިނަ ހަމަލާތަކެއް ފޮނުވާލާފައެެވެ.

މި މެޗުގެ ފުރަތަމަ ލަނޑު ޖަހާ ލީޑު ނެގީ ޗެލްސީއެވެ. ފުރަތަމަ ހާފުގެ 23 ވަނަ މިނެޓުގައި ވިލިއަން ތަނަވަސްކޮށްދިން ފުރުސަތަކުން މި ލަނޑު ޗެލްސީއަަށް ޖަހައިދިނީ މި ސީޒަނުގައި އެ ޓީމާއި އަލަށް ގުޅުނު މިޑްފީލްޑަރު ޓިމޯ ބަކަޔޯކޯއެވެ. މި ލަނޑަށްފަހު ވެސް ޗެލްސީއިން ނުރައްކާތެރި ހަމަލާ އުފެއްދުމުގެ ނަތީޖާއަކަށް ވެގެންދިޔައީ ފުރަތަމަ ހާފު ނިމެން ދެ މިނެޓަށް ވެފައިވަނިކޮށް ވިލިއަން ލަނޑެއް ޖަަހައިދީ އެ ޓީމުގެ ލީޑު ފުޅާކޮށްދިނުމެވެ.

ދެ ލަނޑުގެ ލީޑެއްގައި އޮވެ ޗެލްސީއިން ފުރަތަމަ ހާފު ނިންމާލިއިރު އެ ޓީމުން ވަނީ ފުރަތަމަ ހާފެކޭ އެއްގޮތަށް ދެވަނަ ހާފުގައި ވެސް ލަނޑު ޖެހުމަށް ރަނގަޅު ފުރުސަތުތަކެއް ތަނަވަސްކޮށްފައެވެ. ތަކުރާރުކޮށް އުފައްދަމުން ދިޔަ ފުރުސަތުތަކުގެ ބޭނުން ހިފައި ޗެލްސީއިން ވަނީ މެޗުގެ 50 ވަނަ މިނެޓުގައި އެ ޓީމުގެ ލީޑު ފުޅާކުރުމެވެ. ވިލިއަން ތަނަވަސްކޮށްދިން ފުރުސަތަކުން ޗެލްސީއަށް މި ލަނޑު ޖަހައިދިނީ ސްޕެއިންގެ ހަލުވި ވިންގަރ ޕެޑްރޯ ރޮޑްރިގޭޒްއެެވެ. ހަޑާސްފީލްޑްއިން މެޗުގައި ޖެހި ހަމައެކަނި ލަނޑު މެޗުގެ އެންމެ ފަހު މިނެޓުގައި އެ ޓީމަށް ޖަހައިދިނީ ބަދަލު ކުޅުންތެރިޔެއްގެ ގޮތުގައި ކުޅެންއެރި ފޯވާޑް ލޯރެންޓް ޑެޕިއޮޓްރޭއެވެ.

ޕްރިމިއާ ލީގުގައި އަމިއްލަ ދަނޑުގައި 1-0 ގެ ނަތީޖާއަކުން ސްޓޯކް ސިޓީ ބަލިކުރުމަށްފަހު ބާންލީ ވަނީ ވަގުތީ ގޮތުން ގަދަ ހަތަރަކުން ޖާގަ ހޯދާފައެވެ. މި މެޗުގައި ބާންލީއިން ޖެހި ހަމައެކަނި ލަނޑު އެ ޓީމަށް ޖަހައިދިނީ ބަދަލު ކުޅުންތެރިޔެއްގެ ގޮތުގައި ކުޅެންއެރި ފޯވާޑް އޭޝްލީ ބާންސްއެވެ.

ޕްރިމިއާ ލީގުގައި ކްރިސްޓަލް ޕެލަސް ވަނީ 2-1 ގެ ނަތީޖާއަކުން އަމިއްލަ ދަނޑުގައި ވޮޓްފޯޑް ބަލިކޮށްފައެވެ. މި މެޗުގެ ތިންވަނަ މިނެޓުގައި ޑެރިލް ޖަންމާތް ވޮޓްފޯޑްއަށް ލީޑު ނަގައިދިންއިރު ވޮޓްފޯޑްގެ ދެ ލަނޑު ވެސް ފެނިގެންދިޔައީ މެޗުގެ އެންމެ ފަހު މިނެޓުތަކުގެ ތެރޭގައެވެ. މި ލަނޑުތައް އެ ޓީމަށް ޖަހައިދިނީ ބަކާރީ ސާކޯ އާއި ޖޭމްސް މެކްއަރްތޫރްއެވެ.

ޕްރިމިއާ ލީގުގެ ޕޮއިންޓް ތާވަލުގެ އެންމެ ކުރީގައި 46 ޕޮއިންޓާއެކު މެންޗެސްޓާ ސިޓީ އޮތްއިރު ދެވަނައިގައި 35 ޕޮއިންޓާއެކު އޮތީ މެންޗެސްޓާ ޔުނައިޓެޑްއެވެ. ޗެލްސީއަށް ލަނޑުގެ ތަފާތުން ތިންވަނަ ލިބޭއިރު ހަތަރު ވަނައިގައި 31 ޕޮއިންޓާއެކު އޮތީ ބާންލީއެވެ.