އަންނަ ޖެނުއަރީ ޓްރާންސްފާގައި ގެބޯންގެ ފޯވާޑް އެމެރިކް އެމެރިކް އޮބަމަޔާން ވިއްކާލަން އޭނާ ކުޅެމުން އަންނަ ކްލަބް ބްރޯޝިއާ ޑޯޓްމަންޑުން ދެކޮޅު ހަދައިފިކަމަށް ރިޕޯޓްތައް ބުނެފިއެވެ.

މަޝްހޫރު ކުޅިވަރު މަޖައްލާއެއްކަމަށްވާ "ސްޕޯޓް ބިލްޑް" އިން ބުނީ ކުރިޔަށް އޮތް ޖެނުއަރީ ޓްރާންސްފާއާ އަމާޒުކޮށް އޮބަމަޔާން ހޯދުމަށް ގިނަ ކްލަބްތަކުން މަސައްކަތްކުރަމުން އަންނަ ކަމަށާއި، އެހެންނަމަވެސް ޑޯޓްމަންޑުން އޭނާ ވިއްކާލުމަށް ދެކޮޅު ހަދާފައިވާ ކަމަށެވެ.

އޮބަމަޔާން ހޯދުމަށް ޗެލްސީ އާއި އެވަޓަން އާއި ލިވަޕޫލް އަދި ރެއާލް މެޑްރިޑުން މަސައްކަތްކުރަމުން އަންނައިރު، ޑޯޓްމަންޑުން ބޭނުންވަނީ އަންނަ ސީޒަނަށް އަމާޒުކޮށް އޭނާ 70 މިލިއަން ޔޫރޯ އަށް ވިއްކާލުމަށްކަމަށް ރިޕޯޓްތައް ބުނެއެވެ. އެހެންނަމަވެސް އެ އަގަށް އޭނާ ހޯދުމަށް އަދި އެއްވެސް ކްލަބަކުން ބޭނުން ނުވާކަމަށްވެސް ރިޕޯޓްތައް ބުނެއެވެ.

އޭސީ މިލާނުން 2007 ވަނަ އަހަރު ކެރިޔަރު ފެށި އުމުރުން 28 އަހަރުގެ އޮބަމަޔާން ވަނީ ފްރާންސްގެ މޮނާކޯ އަދި ލިއްލޭއަށްވެސް ކުޅެފައެވެ. އޭނާ ވަނީ ފްރާންސްގެ ސެއިންޓް އެޓައިން އަށް ތިން ސީޒަން ކުޅެފައެވެ. އޭނާ ވަނީ އެ ތިން ސީޒަނުގައި އެޓީމަށް ކުޅުނު 97 މެޗުގައި 41 ލަނޑު ކާމިޔާބުކޮށްފައެވެ.

އެއަށްފަހު 2013 ވަނަ އަހަރު ބަދަލުވީ ޑޯޓްމަންޑަށެވެ. އެގޮތުން އޭނާ ވަނީ އެ ކްލަބަށް މިހާތަނަށް ކުޅުނު 211 މެޗުގައި 140 ލަނޑު ކާމިޔާބުކޮށްފައެވެ. އޭނާ ވަނީ ޑޯޓްމަންޑާއެކު ޖަރުމަން ކަޕް އެއް ފަހަރު ކާމިޔާބުކޮށް، ދެފަހަރެއްގެ މަތިން ޖަރުމަން ސުޕާކަޕް ކާމިޔާބުކޮށްފައެވެ.

ގިނަ ކާމިޔާބީތަކެއް ހޯދާފައިވާ އޮބަމަޔާން ވަނީ ފާއިތުވެދިޔަ ތިން އަހަރު ޑޯޓްމަންޑްއަށް އެންމެ ގިނަ ލަނޑު ޖެހި ކުޅުންތެރިޔާގެ މަގާމު ހޯދާފައެވެ. އޭނާ ވަނީ 2015 ވަނަ އަހަރު އެފްރިކާގެ މޮޅު ކުޅުންތެރިޔާގެ މަގާމު ހޯދުމުގެ އިތުރުން އޭނާ ވަނީ މިދިޔަ އަހަރު 31 ލަނޑާއެކު ބުންޑަސްލީގާގެ ޓޮޕްސްކޯރާގެ މަގާމުވެސް ހޯދާފައެވެ.