ކ. މާލެ
|
10 ޑިސެންބަރ 2017 | އާދީއްތަ 14:27
ތިނަދޫ އާއި މާޒިޔާ ކުޅުނު މެޗުގެ ތެރެއިން
ތިނަދޫ އާއި މާޒިޔާ ކުޅުނު މެޗުގެ ތެރެއިން
އިމޭޖަސް.އެމްވީ
ޕްރެޒިޑެންޓްސް ކަޕް
ޕްރެޒިޑެންޓްސް ކަޕް: ފަހު ވަގުތު ތިނަދޫ ބަލިކޮށް މާޒިޔާއިން ފައިނަލްގެ އުއްމީދު ދަމަހައްޓައިފި
 
މި މެޗުން ބަލިވުމާއެކު ތިނަދޫއަށް ވަނީ ސީޒަން ނިމިފައި
 
ތިންވަނަ ސެމީގައި މާޒިޔާ ކުޅޭނީ ޓީސީ ސްޕޯޓްސްއާ ދެކޮޅަށް
 
މާޒިޔާއިން މި މެޗު ކާމިޔާބުކުރީ ފަހަތުން އަރައި 3-2 ގެ ނަތީޖާއަކުން

ޕްރެޒިޑެންޓްސް ކަޕްގެ ދެވަނަ ސެމީ ފައިނަލުގައި ފަހު ވަގުތު ޖެހި ލަނޑުން ގދ. ތިނަދޫ ބަލިކޮށް މާޒިޔާ ސްޕޯޓްސް އެންޑް ރެކްރިއޭޝަން ފައިނަލުގެ އުއްމީދު ދަމަހައްޓައިފިއެވެ.

މާޒިޔާއިން މި މެޗު ކާމިޔާބު ކުރީ ފަހަތުން އަރައި 3-2 ގެ ނަތީޖާއަކުންނެވެ.

މި މެޗުގައި ވާދަވެރި ބަލާހިތްވާ ޒާތުގެ ކުޅުމެއް ފެނިގެންދިޔައިރު ދެ ޓީމުން ވެސް ވަނީ ލަނޑު ޖެހުމަށް ރަނގަޅު ފުރުސަތުތަކެއް ތަނަވަސް ކޮށްފައެވެ. މި މެޗުގެ ފުރަތަމަ ލަނޑު ޖަހާ ލީޑު ނެގީ މާޒިޔާއިންނެވެ. ފުރަތަމަ ހާފުގެ އިތުރު ވަގުތުގެ ތެރޭގައި އެ ޓީމަށް މި ލަނޑު ޖަހައިދިނީ އައްސަދު އަލީ (އަޑުބަރޭ) އެވެ.

އެއް ލަނޑުގެ ލީޑެއްގައި އޮވެ މާޒިޔާއިން ފުރަތަމަ ހާފު ނިންމާލިއިރު ދެވަނަ ހާފަށް ތިނަދޫ ނުކުތީ ނަތީޖާ އަނބުރާލުމުގެ އުއްމީދުގައެވެ. މި ހާފުގައި އެ ޓީމުން ވަނީ ލަނޑު ޖެހުމަށް ރަނގަޅު ފުރުސަތުތަކެއް ތަނަވަސްކޮށް މާޒިޔާގެ ގޯލަށް ނުރައްކާ ކޮށްފައެވެ. އެގޮތުން 56 ވަނަ މިނެޓުގައި އެ ޓީމުގެ ޑިފެންޑަރު އަހުމަދު ޒުބައިރު (ޒުއްބަ) ވަނީ ލަނޑެއް ޖަހައިދީ އެ ޓީމަށް ނަތީޖާ ހަމަހަމަކޮށްދީފައެވެ.

ތިނަދޫއިން މި ލަނޑަށް ފަހު އެ ޓީމުގެ ކުޅުން އިތުރަށް ވަރުގަދަކުރިއިރު އެ ޓީމުން ވަނީ 67 ވަނަ މިނެޓުގައި ލީޑު ނަގާފައެވެ. މި ލަނޑު ލިބުނު ޕެނަލްޓީއަކުން އެ ޓީމަށް ޖަހައިދިނީ އެ ޓީމުގެ ބިދޭސީ ކުޅުންތެރިޔާ ހޯސޭ ހަނާންޑޭޒް އަވީލާއެވެ. މި ލަނޑަށް ފަހު މާޒިޔާގެ ކުޅުން ރަނގަޅުކުރިއިރު އެ ޓީމުން ވަނީ 86 ވަނަ މިނެޓުގައި ނަތީޖާ ހަމަހަމަކޮށްފައެވެ. މި ލަނޑު އެ ޓީމަށް ޖަހައިދިނީ މުހައްމަދު ޝަހާއުއެވެ.

މާޒިޔާއަށް ފައިނަލުގެ އުއްމީދު ލިބިގެންދިޔައީ މެޗުގެ ފުރިހަމަ ވަގުތު ހަމަވެގެން ރެފްރީ ކުޅެން ދެއްކި އިތުރު ވަގުތުގެ ތެރޭގައި އެ ޓީމުގެ ޔަސްފާދް ހަބީބް ޖަހައިދިން ލަނޑުންނެވެ.

މި މުބާރާތް ރޭވިފައިވާ ގޮތުން ފައިނަލުގައި ވާދަކުރުމުގެ ފުރުސަތު މާޒިޔާއަށް ލިބޭނީ ތިންވަނަ ސެމީ ފައިނަލުން މޮޅު ވެގެންނެވެ. ތިންވަނަ ސެމީގައި މާޒިޔާ ކުޅެން ޖެހޭނީ ފުރަތަމަ ސެމީގައި ނިއު ރޭޑިއަންޓް ސްޕޯޓްސް ކްލަބް އަތުން ބަލިވި ޓީސީ ސްޕޯޓްސް ކްލަބާއި ދެކޮޅަށެވެ.

މި މުބާރާތުގެ ފައިނަލުން ނިއު ޖާގަ ހޯދީ ފުރަތަމަ ސެމީގައި ޕެނަލްޓީ ޖަހައިގެން 4-2 ގެ ނަތީޖާއަކުން ޓީސީ ސްޕޯޓްސް ބަލިކޮށްގެންނެވެ.

މި މެޗުން ބަލިވުމާއެކު މިނިވަން 50 ޗެމްޕިއަންޝިޕްގެ ރަނަރަޕްގެ ގޮތުގައި އައި ތިނަދޫއަށް ސީޒަން ވަނީ ނިމިފައެވެ. އެހެން ނަމަވެސް އެސްޓިއޯ މާލޭ ލީގުގެ ޗެމްޕިއަންކަން ހޯދި މާޒިޔާއަށް އަދި މި ސީޒަނުގައި ތައްޓެއް ހޯދުމުގެ ފުރުސަތު އެބައޮތެވެ. މި ސީޒަނުގެ އެފްއޭ ކަޕްގައި ވެސް ނާކާމިޔާބީއާ ކުރިމަތިލި މާޒިޔާއަށް އަންނަ ސީޒަނުގެ އޭއެފްސީ ކަޕުން ވެސް ޖާގަ ވަނީ ގެއްލިފައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ހުޝާމް މުހަޢްމަދް
0%
0%
0%
0%
0%
100%
ކޮމެންޓް