ޗައިނާ-މޯލްޑިވްސް ފްރީ ޓްރޭޑް އެގްރީމެންޓަކީ ކުރިއަށް އޮތްތަނުގައި ދިވެހިންނަށް ކުރިމަތިވާނެ އިގްތިސާދީ ބޮޑު ދަންތުރައެއް ކަމަށް އަދާލަތު ޕާޓީގެ މީޑިއާ ކޮމެޓީގެ ޗެއާރ އަލީ ނަޒީރު ވިދާޅުވެއްޖެ އެވެ.
ޗައިނާއާއެކު ރައީސް އަބްދުﷲ ޔާމީން އަބްދުލްގައްޔޫމްގެ ސަރުކާރުން ވުމަށް ނިންމާފައިވާ ހަމައެއް ލަމައެއް ނެތް ވިޔަފާރީގެ އެއްބަސްވުމުގެ ނަމުގައި އިދިކޮޅު ފަރާތްތަކުން އަންގާރަ ދުވަހުގެ ރޭ މ. ކުނޫޒުގައި ބޭއްވި ޕެނަލް ޑިސްކަޝަންގައި ވާހަކަ ދައްކަވަމުން އަދާލަތު ޕާޓީގެ އަލީ ނަޒީރު ވިދާޅުވީ މިނިވަން ވިޔަފާރީގެ އެއްބަސްވުމަށް ދެ ގައުމުގެ ދެމެދުވާއިރު، އެއީ ދެ ގައުމަށް ވެސް ހަމަހަމަ ފުރުސަތުތަކެއް ލިބިގެންދާ އެއްބަސްވުމަކަށް ވާންޖެހޭ ކަމަށެވެ.
"މިނިވަން ވިޔާފާރީގެ އެއްބަސްވުމެއް ގާއިމު ކުރެވޭއިރުގަ އެވާންޖެހޭ ދެފަރާތުން ހަމަހަމަ ފުރުސަތުތަކެއް އޮންނަ އެއްބަސްވުމަކަށް. އެނޫން ގޮތަކަށް ހެދޭ އެއްބަސްވުމެއް ދެމެހެއްޓުމަކީ ވެސް ކުރެވޭނެ ކަމެއް ނޫން. އަދި މިޒަމާނުގައި 21 ވަނަ ގަރުނުގަ ކުރިއަރާފައި މިއޮތް ދުނިޔޭގަ އެއްވެސް ގައުމެއްގެ ރައްޔިތުން ފުރުސަތެއް ވެސް ނުދޭނެ އެފަދަ އެއްބަސްވުމެއް ދަމަހައްޓައިގެން، ހިފަހައްޓައިގެން ތިބޭކަށް ވެސް،" ނަޒީރު ވިދާޅުވި އެވެ.
ނަޒީރު ވިދާޅުވީ ގާނޫނުތަކާއި ގަވާއިދުތަކާ ހިލާފަށް ރައީސް ޔާމީންގެ ސަރުކާރުން ޗައިނާ ސަރުކާރާއެކު ސޮއިކުރުމަށް ތައްޔާރުވަމުން މިދާ އެއްބަސްވުމުގައި މިނިވަން ވިޔަފާރީގެ އެއްވެސް އަސާސީ ސިފަތަކެއް ހިމެނިފައި ވެެސް ނެތް ކަމަށެވެ.
"އެނގިވަޑައިގަންނަވާނެ ޗައިނާއަކީ އިންސާނީ ވަސީލަތާއި އަދި އެހެނިހެން ވަސީލަތްތަކުގެ ގޮތުން ދިވެހިރާއްޖެއާ އަޅާބަލާއިރު އެއީ އެތައްތަނަކުން ތަނަވަސް ގައުމެއް. އެހެން އެކަން އޮތީމާ ދިވެހިރާއްޖޭގެ ބާޒާރުގައި ޗައިނާގެ މުދާ އެއްވެސް ހިފެހެއްޓުމެއްނެތި، ދިވެހި އުފެއްދުންތަކާ ވާދަކުރަން އަޅުގަނޑުމެން ހުޅުވާލާ ކަމަށްވާނަމަ، ދިވެހި އުފެއްދުއްތަކަށް ދުނިޔޭގެ ބާޒާރުގައި އަދި ރާއްޖޭގެ ބާޒާރުގައިވެސް މާކެޓް ގެއްލިގެންދާނެ،" ނަޒީރު ވިދާޅުވި އެވެ.
ޗައިނާ-މޯލްޑިވްސް ފްރީ ޓްރޭޑް އެގްރީމެންޓާ ގުޅިގެން ދިވެހި ވިޔަފާރިވެރިންނަށްވެސް ޗައިނާގެ ބާޒާރަށް ދިވެހި އުފެއްދުން ވިއްކުމުގެ ފުރުސަތު ހުޅުވިގެންދާނެ ކަމަށް ބުނާބުނުމަށް ރައްދު ދެއްވަމުން ނަޒީރު ވިދާޅުވީ އިގްތިސާދީ ގޮތުން އެކަން އެގޮތަށް ހިނގަންޖެހޭ ސަބަބެއް ނެތް ކަމަށެވެ. އަދި އެއީ ކަރުދާހުގައި ލިޔެގެން ހިނގާ ކަމެއް ނޫން ކަމަށްވެސް ނަޒީރު ވިދާޅުވި އެވެ.
"އިގްތިސާދީ ގޮތުން އެކަން އެގޮތަށް ހިނގަންޖެހޭ ސަބަބެއް ނެތް. އެއީ ކަރުދާހުގައި ލިޔެގެން ހިނގާކަމެއް ނޫން. އެއީ އެކަން ވުމަށްޓަކައި އިގްތިސާދީ ގޮތުން ފުރިހަމަވާންޖެހޭ ރުކުންތަކެއް، ސަބަބުތަކެއް ފުރިހަމަ ވެގެން ކުރެވޭނެ ކަންތައްތަކެއް. އަޅުގަނޑުމެންނަށް ގަދަބާރުން ޗައިނާގެ އުފެއްދުންތަކުގެ އަގު، ދިވެހި އުފެއްދުންތަކުގެ އަގާ އެއް ހަމައަކަށް ނުގެންދެވޭނެ. އެކަންވާނީ އެކަން އެގޮތައްވުމަށް އިގްތިސާދީ ސަބަބުތަކެއް އެކުލެވުނީމަ،" ނަޒީރު ވިދާޅުވި އެވެ.