މި ސީޒަނުގެ އިނގިރޭސި ޕްރިމިއާ ލީގުގައި ކުޅުނު އެއްވެސް މެޗަކުން ބަލިނުވުމުގެ ރެކޯޑު މެންޗެސްޓާ ސިޓީއިން ދަމަހައްޓައިފިއެވެ.

މި މެޗާއި ކުރިމަތިލިއިރު ޕްރިމިއާ ލީގުގައި ކުޅުނު އެއްވެސް މެޗަކުން ބަލިވެފައި ނެތް ސިޓީއިން ވަނީ ރަށުން ބޭރުގައި ހަޑާސްފީލްޑް ޓައުން ބަލިކޮށް މި ރެކޯޑު ދަމަހައްޓާފައެވެ. ސިޓީއިން މި މެޗު ކާމިޔާބުކޮށްފައި ވަނީ ފަހަތުން އަރައި 2-1 ގެ ނަތީޖާއަކުންނެވެ.

ސިޓީގެ ފަރާތުން ތަފާތު މޮޅު ކުޅުމެއް ފެނިގެންދިޔަ މި މެޗުގައި އެ ޓީމުން ވަނީ ގިނަ ވަގުތު ބޯޅަ ގެންގުޅެ ލަނޑު ޖެހުމަށް ގިނަ ފުރުސަތުތަކެއް ތަނަވަސް ކޮށްފައެވެ. އެހެނަސް ގިނަ ބަޔަކު ސިއްސުވާލުމަށް ފަހު މި މެޗުގެ ފުރަތަމަ ލަނޑު ޖަހާ ލީޑު ނަގާފައި ވަނީ ހަޑާސްފީލްޑްއިންނެވެ. ފުރަތަމަ ހާފުގެ އިތުރު ވަގުތުގެ ތެރޭގައި އެ ޓީމަށް ލީޑު ލިބިގެންދިޔައީ ސިޓީގެ ކުޅުންތެރިޔެއް އަތުން ބައިކޮޅަށް ވަން ލަނޑުންނެވެ.

އެއް ލަނޑުގެ ލީޑެއްގައި އޮވެ ހަޑާސްފީލްޑްއިން ފުރަތަމަ ހާފު ނިންމާލިއިރު ސިޓީއިން ދެވަނަ ހާފަށް ނުކުމެފައިވަނީ ނަތީޖާ އަނބުރާލުމުގެ އުއްމީދުގައެވެ. ސިޓީގެ މި އުއްމީދު އައު ވެގެންދިޔައީ ދެވަނަ ހާފު ފެށިގެން މިނެޓެއް ނުވަނީސް ރަހީމް ސްޓާލިންއަށް ފައުލް ކުރުމާއި ވިދިގެން ލިބުނު ޕެނަލްޓީއިންނެވެ. ސާޖިއޯ އަގުއޭރޯ މި ޕެނަލްޓީ ކާމިޔާބުކޮށް އެ ޓީމަށް ނަތީޖާ ހަމަހަމަކޮށްދިނެވެ.

މި ލަނޑަށް ފަހު ސިޓީއިން އެ ޓީމުގެ ކުޅުން އިތުރަށް ވަރުގަދަ ކުރުމުގެ ނަތީޖާއަކަށް ވެގެންދިޔައީ މެޗުގެ 84 ވަނަ މިނެޓުގައި ރަހީމް ސްޓާލިން ލަނޑެއް ޖަހައިދީ އެ ޓީމަށް މެޗުން ތިން ޕޮއިންޓް ހޯދައިދިނުމެވެ.

އިނގިރޭސި ޕްރިމިއާ ލީގުގައި ކުޅުނު އިތުރު މެޗުތަކުގެ ނަތީޖާއަށް ބަލާލާއިރު ސައުތްހެމްޕްޓަން ވަނީ އަމިއްލަ ދަނޑުގައި 4-1 ގެ ނަތީޖާއަކުން އެވަޓަން ބަލިކޮށްފައެވެ. ހަމައެހެންމެ އާސެނަލްވަނީ ފަހު ވަގުތު ބާންލީ ކޮޅަށް ލަނޑު ޖަހައި ގަދަ ހަތަރެއްގެ ޖާގައެއް ހޯދާފައެވެ.

ޕްރިމިއާ ލީގުގެ އެއްވަނައިގައި ކުޅުނު 13 މެޗުން ލިބުނު 37 ޕޮއިންޓާއެކު މެންޗެސްޓާ ސިޓީ އޮތްއިރު ދެވަނައިގައި 29 ޕޮއިންޓާއެކު އޮތީ މެންޗެސްޓާ ޔުނައިޓެޑްއެވެ. ތިންވަނަ 26 ޕޮއިންޓާއެކު ޗެލްސީއަށް ލިބޭއިރު 25 ޕޮއިންޓާއެކު އާސެނަލްއަށް ލިބެނީ ހަތަރުވަނައެވެ. ހަމައެހެންމެ 24 ޕޮއިންޓާއެކު ފަސްވަނަ ޓޮޓެންހަމްއަށް ލިބޭއިރު 23 ޕޮއިންޓާއެކު ހަވަނަ ލިބެނީ ލިވަޕޫލްއަށެވެ.

އަންނަ ހަފްތާގައި ކުޅޭ މެޗުތަކަށް ބަލާލާއިރު، ޗެލްސީ ނުކުންނާނީ ސްވަންސީ ސިޓީއާއި ދެކޮޅަށެވެ. ޔުނައިޓެޑްއިން ވޮޓްފޯޑާއި ދެކޮޅަށް ނުކުންނައިރު ސިޓީ ނުކުންނާނީ ސައުތްހެމްޕްޓަންއާއި ދެކޮޅަށެވެ. ހަމައެހެންމެ ޓޮޓެންހަމްއިން ލެސްޓާ ސިޓީއާއި ދެކޮޅަށް ނުކުންނައިރު ލިވަޕޫލް ނުކުންނާނީ ސްޓޯކް ސިޓީއާއި ދެކޮޅަށެވެ.