ޕްރިމިއާ ލީގު: ޔުނައިޓެޑަށް ހަނި މޮޅެއް، ޓޮޓެންހަމް އެއްވަރުވެއްޖެ

އިނިގިރޭސި ޕްރިމިއާ ލީގުގައި މެންޗެސްޓާ ޔުނައިޓެޑުން ހަނި މޮޅެއް ހޯދިއިރު ޓޮޓެންހަމް ކުޅުނު މެޗުން އެ ޓީމު އެއްވަރުވެއްޖެއެވެ.

ހޮނިހިރު ދުވަހުގެ ރޭ އަމިއްލަ ދަނޑުގައި ބްރައިޓަން އެންޑް ހޯވް އަލްބިއޯންއާއި ދެކޮޅަށް ކުޅުނު މެޗުން ޔުނައިޓެޑް މޮޅުވެފައިވަނީ 1-0ގެ ހަނި ނަތީޖާއަކުންނެވެ. މި މެޗުގައި ޔުނައިޓެޑުން ވަނީ ގިނަ ވަގުތު ބޯޅަ ހިފަހައްޓައިގެން ކުޅެ ބްރައިޓަންގެ ގޯލާއި އަމާޒުކޮށް ގިނަ ހަމަލާތަކެއް އުފައްދާފައެވެ.

ފުރަތަމަ ހާފުގައި ޔުނައިޓެޑަށް ބްރައިޓަންގެ ގޯލު ހުޅުވާލެވިފައި ނުވާއިރު މި މެޗުގައި ފެނިގެން ދިޔަ ހަމައެކަނި ލަނޑު ފެނިގެން ގޮސްފައިވަނީ ދެވަނަ ހާފުގައެވެ. މެޗުގެ 66 ވަނަ މިނެޓުގައި ޔުނައިޓެޑަށް ލީޑު ލިބިގެންދިޔައީ ބްރައިޓަންގެ ލުއިސް ޑަންކްގެ އަތުން ބައިކޮޅަށް ވަން ލަނޑުންނެވެ. މި ލަނޑަށް ފަހުވެސް ޔުނައިޓެޑުން ވަނީ ލަނޑު ޖެހުމަށް ރަނގަޅު ފުރުސަތުތަކެއް އުފައްދާފައެވެ. އެހެން ނަމަވެސް އެ ޓީމަށް މި ފުރުސަތުތަކުގެ ބޭނުން އެންމެ ރަނގަޅުގޮތުގައި ހިފިފައެއް ނުވެއެވެ.

މި މެޗުން މޮޅުވުމާއެކު ޔުނައިޓެޑުން ވަނީ އެ ޓީމުގެ ދަނޑުގައި މެޗަކުން ބަލިނުވުމުގެ ރެކޯޑު 39 މެޗަށް އިތުރުކޮށްފައެވެ. އޭގެތެރެއިން 28 މެޗުން އެ ޓީމު މޮޅުވިއިރު ބާކީ 11 މެޗު ނިމިފައިވަނީ އެއްވަރުވެގެންނެވެ. އަމިއްލަ ދަނޑުގައި ޔުނައިޓެޑް އެންމެފަހުން ބަލިވެފައިވަނީ މިދިޔަ އަހަރުގެ ސެޕްޓެމްބަރު މެންޗެސްޓާ ސިޓީއާއި ދެކޮޅަށް ކުޅުނު މެޗުންނެވެ.

މި ސީޒަނުގައި ރަނގަޅު ކުޅުމެއް ދައްކަމުން އަންނަ ޓޮޓެންހަމް ހޮޓްސްޕާސް ވަނީ އަމިއްލަ ދަނޑުގައި 1-1 ގެ ނަތީޖާއަކުން ވެސްޓް ބްރޮމްއާއި އެއްވަރުވެފައެވެ. ޓޮޓެންހަމްގެ ފަރާތުން މޮޅު ކުޅުމެއް ފެނިގެންދިޔަ މި މެޗުގެ ފުރަތަމަ ލަނޑުޖަހާ ލީޑު ނެގީ އެހެނަސް ވެސްޓް ބްރޮމްއިންނެވެ. އެގޮތުން މެޗުގެ ހަތަރު ވަނަ މިނެޓުގައި ވެމްބްލީ ސްޓޭޑިއަމް އަޑު މަޑުވެގެން ދިޔައީ ހޯސޭ ސޮލޮމޮން ރޮންޑޮން ވެސްޓް ބްރޮމްއަށް ޖަހައިދިން ލަނޑުންނެވެ.

އެއް ލަނޑުގެ ލީޑެއްގައި އޮވެ ވެސްޓް ބްރޮމްއިން ފުރަތަމަ ހާފު ނިންމާލިއިރު ޓޮޓެންހަމްއިން ވަނީ ދެވަނަ ހާފުގައި މޮޅު އެޓޭކިން ފުޓްބޯޅައެއް ކުޅެފައެވެ. ތަކުރާރުކޮށް އެ ޓީމުން އުފައްދަމުންދިޔަ ހަމަލާތަކުގެ ނަތީޖާއަކަށް ވެގެންދިޔައީ މެޗުގެ 74 ވަނަ މިނެޓުގައި ޑެލޭ އަލީގެ އެހީތެރިކަމާއެކު ހެރީ ކޭން ލަނޑެއް ޖަހައިދީ މެޗުގެ ނަތީޖާ ހަމަހަމަކޮށްދިނުމެވެ. މި ލަނޑަށްފަހު ވެސް ޓޮޓެންހަމްއިން ގިނަ ހަމަލާތަކެއް އުފެއްދި ނަމަވެސް އެ ޓީމަށް މެޗުން ތިން ޕޮއިންޓް ހޯދިފައެއް ނުވެއެވެ.

ޕްރިމިއާ ލީގުގައި ލެސްޓާ ސިޓީއާއި ވެސްޓް ހާމް ޔުނައިޓެޑް ކުޅުނު މެޗު 1-1 ގެ ނަތީޖާއަކުން އެއްވަރުވިއިރު ސްވަންސީއާއި ބޯންމައުތް ކުޅުނު މެޗު ނިމިފައިވަނީ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ. ކްރިސްޓަލް ޕެލަސް ވަނީ އަމިއްލަ ދަނޑުގައި 2-1 އިން ސްޓޯކް ސިޓީ ބަލިކޮށްފައެވެ. ހަމައެހެންމެ ވޮޓްފޯޑް ވަނީ 3-0 ގެ ނަތީޖާއަކުން ނިއުކާސަލް ޔުނައިޓެޑް ބަލިކޮށްފައެވެ.