ދިވެހި ޕްރިމިއާ ލީގު: މާޅޮސް އާއި ކުޑަހުވަދޫ އެއްވަރުވެއްޖެ

އުރީދޫ ދިވެހި ޕްރިމިއާ ލީގުގައި އއ.މާޅޮސް އަދި ދ.ކުޑަހުވަދޫ ކުޅުނު މެޗު އެއްވަރުވެއްޖެއެވެ.

ހޮނިހިރު ދުވަހުގެ ހަވީރު ގަލޮޅު ދަނޑުގައި މި ދެ ޓީމު ކުޅުނު މެޗު އެއްވަރުވެފައި ވަނީ 3-3 ގެ ނަތީޖާއަކުންނެވެ. ދެ ޓީމުގެ ފަރާތުން ވެސް ވާދަވެރި ކުޅުމެއް ފެނިގެން ދިޔަ މި މެޗުގައި ދެ ޓީމުން ވެސް ވަނީ ލަނޑު ޖެހުމަށް ރަނގަޅު ފުރުސަތުތަކެއް ތަނަވަސް ކޮށްފައެވެ.

މި މެޗުގައި މާޅޮހުގެ ޓީމުން ވަނީ ގިނަ ވަގުތު ބޯޅަ ގެންގުޅެ ކުޑަހުވަދޫގެ ގޯލަށް ބާރު ބޮޑުކޮށްފައެވެ. އެގޮތުން މެޗުގެ ފުރަތަމަ ލަނޑުޖަހާ ލީޑު ނަގާފައި ވަނީ މާޅޮހުންނެވެ. މެޗުގެ 12 ވަނަ މިނެޓުގައި އެ ޓީމަށް މި ލަނޑު ޖަހައިދިނީ އެ ޓީމުގެ ޖާޒީ ނަމްބަރު 10 އިބްރާހިމް ނާއިފްއެވެ. މި ލަނޑަށް ފަހު ކުޑަހުވަދޫއިން އެ ޓީމުގެ ކުޅުން ރަނގަޅު ކުރުމުގެ ނަތީޖާއަކަށް ވެގެންދިޔައީ މެޗުގެ 29 ވަނަ މިނެޓުގައި އަބްދުލް ހާލިގް ލަނޑެއް ޖަހައިދީ އެ ޓީމަށް ނަތީޖާ ހަމަހަމަ ކޮށްދިނުމެވެ.

އެހެން ނަމަވެސް އަހުމަދު އާރިފް ވަނީ މެޗުގެ ފުރަތަމަ ހާފުގެ އެންމެ ފަހު މިނެޓުގައި ލަނޑެއް ޖަހައިދީ އަލުން އަނބުރާ މާޅޮހަށް ލީޑު ނަގައިދީފައެވެ.

އެއް ލަނޑުގެ ލީޑެއްގައި އޮވެ މާޅޮހުން ފުރަތަމަ ހާފު ނިންމާލިއިރު ކުޑަހުވަދޫއިން ދެވަނަ ހާފަށް ނުކުމެފައި ވަނީ ކުޅުން އިތުރަށް ވަރުގަދަ ކޮށްގެންނެވެ. މި ހާފުގައި އެ ޓީމުން ވަނީ ޑިފެންސަށް ވިސްނައިގެން ކުޅެ ކައުންޓާގައި މާޅޮހުގެ ގޯލާއި އަމާޒުކޮށް ނުރައްކާތެރި ހަމަލާތަކެއް ފޮނުވާލާފައެވެ.

އެގޮތުން ދެވަނަ ހާފު ފެށިގެން ނުވަ މިނެޓު ތެރޭގައި ކުޑަހުވަދޫގެ ބިދޭސީ ފޯވާޑް ކްރިސްޓިއަން ޑޮޑްޒީ ޓޯސޫ ވަނީ ލަނޑެއް ކާމިޔާބުކޮށްދީ އެ ޓީމަށް މެޗުގެ ނަތީޖާ ހަމަހަމަ ކޮށްދީފައެވެ. އޭގެ ދެ މިނެޓު ފަހުން އާދަމް ޝަމީމް ވަނީ ލަނޑެއް ޖަހާ ފުރަތަމަ ފަހަރަށް މެޗުގެ ލީޑު ކުޑަހުވަދޫއަށް ހޯދައިދީފައެވެ.

އެހެން ނަމަވެސް މާޅޮހުގެ ބިދޭސީ ފޯވާޑް އެންހެލް ކަރާސްކޯ މުނޯޒް ވަނީ މެޗު ނިމެން ނުވަ މިނެޓަށް ވެފައިވަނިކޮށް ލަނޑެއް ޖަހައިދީ، އެ ޓީމަށް މި މެޗުން ޕޮއިންޓެއް ހޯދައިދީފައެވެ. މި މެޗުވެސް އެއްވަރުވުމާއި ވިދިގެން ކުޑަހުވަދޫއަށް ލީގުގެ އެއްވެސް މެޗަކުން މޮޅުވެވިފައެއް ނުވެއެވެ.

މި ދެ ޓީމުވެސް ލީގުގައި 14 މެޗު ކުޅެފައިވާއިރު މާޅޮސް އޮތީ ނުވަ ޕޮއިންޓާއެކު ތާވަލުގެ ހަތް ވަނައިގައެވެ. ކުޑަހުވަދޫ އޮތީ އެއްވެސް މެޗަކުން މޮޅު ނުވެ ލިބުނު ތިން ޕޮއިންޓާއެކު ތާވަލުގެ ފުލުގައެވެ.