ޔުއެފާ ޗެމްޕިއަންސް ލީގުގައި ޕީއެސްޖީން ސެލްޓިކް ބަލިކުރިއިރު ބަޔާން މިއުނިކް ކުޅުނު މެޗު ކާމިޔާބުކޮށް އެ ޓީމު ގަދަ 16އަށް ކޮލިފައިވެއްޖެއެވެ.

ޗެމްޕިއަންސް ލީގުގެ ގްރޫޕް "ބީ" ގައި ސްކޮޓްލޭންޑުގެ ސެލްޓިކާ ދެކޮޅަށް އަމިއްލަ ދަނޑުގައި ކުޅުނު މެޗުން ޕީއެސްޖީ މޮޅުވެފައި ވަނީ 7-1 ގެ ތަފާތު ބޮޑު ނަތީޖާއަކުންނެވެ. ޕީއެސްޖީގެ ފަރާތުން ތަފާތު މޮޅު ކުޅުމެއް ފެނިގެންދިޔަ މި މެޗުގެ ފުރަތަމަ ލަނޑު ޖަހައި ލީޑު ނަގާފައި ވަނީ ސެލްޓިކް އިންނެވެ.  ޕީއެސްޖީގެ ސްޓޭޑިއަމް އެއްކޮށް އަޑު މަޑުވެގެން ދިޔައީ މެޗު ފެށިގެން މިނެޓެއް ނުވަނީސް ސެލްޓިކްގެ މޫސާ ޑެމްބެލޭ ލަނޑެއް ޖަހައިދީ އެ ޓީމަށް ލީޑު ނަގައިދިނުމުންނެވެ. އެހެންނަމަސް ސެލްޓިކްގެ ލީޑު ދެމިއޮތީ އެންމެ ނުވަ މިނެޓަށެވެ.

ސެލްޓިކްގެ މި ލަނޑަށް ޕީއެސްޖީން ރައްދުގައި ހަތް ލަނޑު ޖެހިއިރު އެ ލަނޑުތަކުގެ ތެރެއިން އެންމެ ފުރަތަމަ ލަނޑު އެ ޓީމަށް ޖަހައިދިނީ ނޭމާއެވެ. މެޗުގެ 22 ވަނަ މިނެޓުގައި ނޭމާ އޭނާގެ ދެވަނަ ލަނޑުޖަހައިދީ ޕީއެސްޖީއަށް ލީޑު ނަގައިދިން އިރު ޕީއެސްޖީގެ ތިން ވަނަ ލަނޑު މެޗުގެ 28 ވަނަ މިނެޓުގައި ނޭމާގެ އެހީތެރިކަމާ އެކު ޖަހައިދިނީ އެޑިންސަން ކަވާނީއެވެ. ޕީއެސްޖީގެ ހަތަރު ވަނަ ލަނޑު މެޗުގެ 35 ވަނަ މިނެޓުގައި ޖަހައިދިނީ ޒުވާން ފޯވާޑް ކިލިއަން އެމްބާޕޭއެވެ.

ފުރަތަމަ ހާފު 4-1 ގެ ނަތީޖާއަކުން ޕީއެސްޖީ ކުރީގައި އޮވެގެން ނިމުނުއިރު އެ ޓީމުން ވަނީ ދެވަނަ ހާފުގައި ވެސް ފުރަތަމަ ހާފެކޭ އެއްގޮތަށް މޮޅު އެޓޭކިން ފުޓްބޯޅައެއް ކުޅެފައެވެ. އެގޮތުން މެޗުގެ 75 ވަނަ މިނެޓުގައި މާކޯ ވެރާޓީ ލަނޑެއް ޖަހައިދިންއިރު ކަވާނީ ވަނީ މެޗުގެ 79 ވަނަ މިނެޓުގައި އިތުރު ލަނޑެއް ޖަހައިދީ ޕީއެސްޖީގެ ލީޑު ފުޅާކޮށްދީފައެވެ. ޕީއެސްޖީގެ ހަތްވަނަ ލަނޑު ޖަހައިދިނީ ބްރެޒިލްގެ ތަޖުރިބާކާރު ޑިފެންޑަރު ޑެނީ އަލްވޭސްއެވެ.

މި ގްރޫޕުގެ ދެވަނަ މެޗުގައި ޖަރުމަނުގެ ބަޔާން މިއުނިކް ވަނީ ރަށުން ބޭރުގައި 2-1 ގެ ނަތީޖާއަކުން ބެލްޖިއަމްގެ އަންޑަލެކްޓް ބަލިކޮށް ދެވަނަ ބުރުގެ ޖާގައެއް ކަށަވަރު ކޮށްފައެވެ. މި މެޗުގެ ހުރިހާ ލަނޑެއް ވެސް ފެނިގެން ގޮސްފައި ވަނީ ދެވަނަ ހާފުގައެވެ.

އެގޮތުން މެޗުގެ 51 ވަނަ މިނެޓުގައި ކޮރެންޓިން ޓޮލީސޯގެ އެހީތެރިކަމާ އެކު ރޮބާޓް ލެވަންޑޯސްކީ ލީޑު ނަގައިދިން ނަމަވެސް އެންޑަލެކްޓްގެ ސޮފިއަން ހަންނީ ވަނީ 63 ވަނަ މިނެޓުގައި ލަނޑެއް ޖަހައިދީ މެޗުގެ ނަތީޖާ ހަމަހަމަކޮށްދީފައެވެ. އެހެނަސް މެޗުގެ 77 ވަނަ މިނެޓުގައި ޓޮލީސޯ ވަނީ ލަނޑެއް ޖަހައިދީ އަނެއްކާ ވެސް ބަޔާންއަށް މެޗުގެ ލީޑު ނަގައިދީފައެވެ.

މި ގްރޫޕުގެ އެއްވަނައިގައި 15 ޕޮއިންޓާ އެކު ޕީއެސްޖީ އޮތްއިރު ދެވަނައިގައި 12 ޕޮއިންޓާ އެކު އޮތީ ބަޔާން މިއުނިކްއެވެ. މި ގްރޫޕުގެ ތިންވަނަ ތިން ޕޮއިންޓާއެކު ސެލްޓިކްއަށް ލިބޭއިރު ގްރޫޕުގެ ފުލުގައި އެއްވެސް ޕޮއިންޓެއް ނުލިބި އޮތީ އެންޑަލެކްޓްއެވެ.