ފައްތާހު ފިލްމީ ދާއިރާއިން ދެން ނުފެންނާނެ

ރާއްޖޭގެ ފިލްމީ ދާއިރާގައި އެތަކެއް ދުވަސްތަކެއް ވޭތުކޮށްފައިވާ އެންމެ ކާމިޔާބު އެއް ޑައިރެކްޓަރު ކަމަށްވާ އަބްދުލް ފައްތާހު އެ ދާއިރާއިން ދެން ނުފެންނާނެކަން އިއުލާނުކޮށްފިއެވެ.

ފައްތާހުގެ ފޭސްބުކް އެކައުންޓްއިން އާދީއްތަ ދުވަހުގެ ރޭގެ ވަގުތެއްގައި ކުރި ޕޯސްޓެއްގައި ބުނެފައި ވަނީ ފިލްމީ ދާއިރާއިން ދެން ނުފެންނާނެ ކަމަށެވެ. މި ޕޯސްޓުގައި އޭނާ ވަނީ ފިލްމީ ދާއިރާގައި އޭނާއާއެކު މަސައްކަތްކުރި ހުރިހާ ފަރަތްތަކަށް ޝުކުރު އަދާކޮށްފައެވެ.

ރާއްޖެއެމްވީއަށް މައުލޫމާތު ދެމުން ފައްތާހު ބުނެފައިވަނީ މިއީ ކުރިން ވިސްނާފައި އޮތް ކަމެއް ކަމަށާއި އެގޮތުން އެންމެ ފަހުން އޭނާ އުފެއްދި ފިލްމު ކަމަށްވާ 'ހައްދު'ގެ މަސައްކަތް ކުރިޔަށް ގެންދިޔަ އިރުވެސް ފިލްމީ ދާއިރާއިން ދުރުވާން ނިންމާފައިވާ ކަމަށެވެ. ހަމައެހެންމެ ޓީވީގެ ކުރިމަތިން އަދި ފުރަގަހުން ވެސް އެއްވެސް މަސައްކަތެއްގައި ދެން ފެނިގެން ނުދާނެ ކަމަށް ފައްތާހު ވަނީ ބުނެފައެވެ.

އަންނަ ޖެނުއަރީ މަހު ވެސް ފައްތާހު ފިލްމެއް ލޯންޗް ކުރަން ނިންމާފައި އޮތް ނަމަވެސް ރާއްޖެއެމްވީއާ ވާހަކަ ދައްކަމުން ފައްތާހު ބުނީ އޭނާ އިއުލާނުކޮށްފައިވާ އެއްވެސް މަސައްކަތެއް ވެސް ކުރިޔަށް ނުގެންދާނެ ކަމަށެވެ. މިގޮތަށް ނިންމި އެއްވެސް ސަބަބެއް ފައްތާހު ހާމަކޮށްފައި ނުވާއިރު އޭނާ ވަނީ މިކަމާ ގުޅޭ ގޮތުން ކެމެރާ ކުރިމަތީގެ އިންޓަވިއުއެއް ދިނުމަށްވެސް ދެކޮޅު ހަދާފައެވެ.

މި ނިންމުމާއެކު އޭނާގެ އެންމެ ކާމިޔާބު އެއް އުފެއްދުން ކަމަށްވާ 'ވައްޓަފާޅި' ޑޮކިއުމެންޓަރީ ސީރީސްއަށް ވެސް ނިމުމެއް އަންނާނެ ކަމަށް ފައްތާހު ވަނީ ބުނެފައެވެ.

ފައްތާހުއަކީ ރާއްޖޭގެ އެންމެ ކާމިޔާބު އެއް ޑައިރެކްޓަރަށް ވާއިރު އޭނާ ވަނީ ފިލްމީ ދާއިރާގައި 21 އަހަރު ވޭތުކޮށްފައެވެ. މި 21 އަހަރުގެ ތެރޭގައި އޭނާ ވަނީ އެތަކެއް ކާމިޔާބު ޑްރާމާ ސިލްސިލާތަކާއި ފިލްމް، ބެލުންތެރިންނާއި ހަމަޔަށް ގެނެސްދީފައެވެ.

ފައްތާހު ފިލްމީ ދައިރާ ދޫކޮށްލިކަން އިއުލާނު ކޮށްފައިވާއިރު ފިލްމީ ދާއިރާގައި އުޅޭ ފަރާތްތަށް މިގޮތަށް ނިންމުންތަށް ނިންމައެވެ. އެހެނަސް އެގޮތަށް އަމަލުކުރާތަން ފެންނަމުން ދަނީ ވަރަށް މަދުންކަން ފާހަގަކޮށްލެވެއެވެ.