ސައުދީ އަރަބިއްޔާގެ ވަލީއަހުދު މިހާރު އަޅުއްވަމުން އެ ގެންދަވާ ފިޔަވަޅުތަކާ މެދު ކަންބޮޑުވުން ފާޅުކުރައްވައި އެ ކަމުގެ ސަބަބުން އެމެރިކާގެ މަސްލަހަތަށް ބުރޫ އަރާފާނެ ކަމަށް އެމެރިކާގެ އޮފިޝަލުން ވިދާޅުވެއްޖެ ކަމަށް ނިއުޔޯކް ޓައިމްސް ރިޕޯޓްކޮށްފިއެވެ.

"ވަލީއަހުދު ސަލްމާން ކަންކަން ކުރައްވަނީ ފަހުން ވެދާނެ ގޮތެއް ބެއްލެވުމެއް ނެތި, ވަރަށް ޒިންމާދާރުކަން ކުޑަކޮށް" ކަމަށް ޕެންޓަގަން އަދި ސެންޓްރަލް އިންޓެލިޖެންސް އޭޖެންސީ ހިމެނޭ ގޮތަށް އެމެރިކާގެ އޮފިޝަލުން ވިދާޅުވި ކަމަށް އަންގާރަ ދުވަހު ނިއުޔޯކް ޓައިމްސްގައި ރިޕޯޓްކޮށްފައި ވެއެވެ.

އުމުރުފުޅުން 32 އަހަރުގެ ސަލްމާން މިދިޔަ ޖޫން މަހުގެ ތެރޭގައި ވަލީއަހުދު ކަމަށް އައްޔަން ކުރައްވައި ތަޚުތާ ގާތަށް ގެންނެވުމާ އެކު އެ މަނިކުފާނު ގެންދަވަނީ ވެރިކަމުގެ ކޮއިލުގައި ބާރުގަދަ ކުރައްވަމުންނެވެ.

ވަލީއަހުދު މުހައްމަދު ރިޔާސަތުގައި އިންނަވައި އެންޓި ކޮރަޕްޝަން ކޮމިޓީން ވަނީ ކޮރަޕްޝަން ހުއްޓުވުމުގެ ނަމުގައި ފަށާފައިވާ މަސައްކަތެއްގެ ތެރެއިން ކަމަށް ބުނެ ނޮވެމްބަރު މަހުގެ 4 ވަނަ ދުވަހު ސައުދީގެ އިސް ފަރާތްތަކެއް ހައްޔަރު ކޮށްފައެވެ.

ރިޒްކާލްޓަން ހޮޓަލުގައި ބަންދުގައި ބައިތިއްބާފައިވާ ފަރާތްތަކުގެ ތެރޭގައި 11 ވަޒީރަކާއި ނުފޫޒު ގަދަ ބައެއް ވިޔަފާރިވެރިން ހިމެނިވަޑައިގަންނަވައެވެ.

އީރާނުން ލުބްނާނުގެ ދާޚިލީ ކަންކަމާ ބެހޭ ކަމަށް ބުނެ، ލުބްނާނުގެ ބޮޑުވަޒީރު ސައުދުލް ހަރީރީ ވަނީ ހަމަ އެ ދުވަހު ސައުދީގައި ހުންނަވައި މަޤާމުން އިސްތިއުފާ ދެއްވާފައެވެ.

ހަރީރީ އަދިވެސް އެނބުރި ގައުމަށް ވަޑައިގެންފައިނުވާއިރު ލުބުނާނުގެ ވެރިން ތުހުމަތު ކުރައްވަމުން ގެންދަވަނީ އެ މަނިކުފާނު އެ ގައުމުގައި ހުންނެވީ ގޭބަންދުގައި ކަމަށެވެ. ނަމަވެސް ހަރީވަނީ ޓީވީ މެދުވެރިކޮށް ދެއްވި ތަގުރީރެއްގައި އެކަން ދޮގުކުރައްވައި އަވަސް ގޮތެއްގައި ގައުމަށް ވަޑައިގެން އިސްތިއުފާގެ ކަންކަން ގާނޫނު އަސާސީގައިވާ ގޮތުގެ މަތިން ނިންމަވާނެ ކަމަށް ވިދާޅުވެފައެވެ.

ހިޒްބުﷲގެ ލީޑަރު ހަސަން ނަސްރުﷲ ވަނީ ހަރީރި އިސްތިއުފާ ދެއްވާފައިވަނީ ސައުދީ އަރަބިއްޔާއިން " މަޖުބޫރު" ކޮށްގެން ކަމަށް ވިދާޅުވެފައެވެ.

ސްޓޭޓް ޑިޕާޓްމަންޓްގެ އޮފިޝަލުން ދެއްކެވި ވާހަކަފުޅާ އެކު އަނެއްކާ ވެސް ވަނީ ރައީސް ޑޮނަލްޑް ޓްރަމްޕްގެ ސަރުކާރުގެ ތެރޭގައި ބަދަހިކަން ކުޑަކަން ހާމަވެފައެވެ.

ސައުދީގެ އިސް ފަރާތްތައް ހައްޔަރު ކުރުމާ އެކު ރައީސް ޓްރަމްޕް ކުރެއްވި ޓްވީޓެއްގައި ވިދާޅުވެފައި ވަނީ ރަސްގެފާނު ސަލްމާން އާއި ވަލީއަހުދަށް އެ ކުރެއްވެނީ ކޮންކަމެއްކަން އެ ބޭފުޅުންނަށް އެނގިވަޑައިގަންނަވާނެ ކަމާ މެދު ފުރިހަމައަށް އިތުބާރު އެބަ އޮތް ކަމަށެވެ. އަދި ހައްޔަރުކޮށްފައިވާ ފަރާތްތަކަށް ނިސްބަތްކުރައްވާ ވިދާޅުވެފައި ވަނީ މިއަދު ހަރުކަށިކޮށް އެ ބަޔަކާ މެދު އަމަލުކުރެވެމުންދާ ބައެއް ފަރާތްތަކަކީ ޒަމާންތަކެއް ވަންދެން "ގައުމު ފެލަމުން" ދިޔަ މީހުން ކަމަށެވެ.

ސައުދީ އިސްވެ އޮވެ އަރަބި ބައެއް ގައުމުތަކުން ޖޫން މަހުގެ ފަސް ވަނަ ދުވަހު ވަނީ އަވަށްޓެރި ގަތަރާ ގުޅުން ކަނޑާލައި އެގައުމަށް ދަތިކުރުމުގެ ފިޔަވަޅުއަޅާފައެވެ. ޓެރެރިޒަމްގެ ތުހުމަތުކޮށް ގުޅުން ކަނޑާލިއިރު ގަތަރުން ދަނީ އެ ތުހުމަތުތައް ދޮގުކުރަމުންނެވެ.